६० पेजको किताबमा गण्डकी सरकारको चार वर्षका काम

A+ A A-

गण्डकी प्रदेश सरकार स्थापना भएको बुधबार चार वर्ष पूरा भएको छ । २०७४ साल फागुन ४ मा पृथ्वीसुब्बा गुरूङले शपथ लिएसँगै प्रदेश सरकार स्थापना भएको थियो । अहिले कांग्रेस नेता कृष्णचन्द्र नेपाली पोखरेल गठबन्धन सरकारको मुख्यमन्त्री छन् ।

पहिलोपटक गण्डकी रत्न घोषणासँगै प्रदेशका उत्कृष्ट कार्यालय र कर्मचारीलाई सम्मान गरेर चौँथो वार्षिकोत्सव मनाइएको छ । सरकारका चार वर्षे उपलब्धी समेटेर तयार पारिएको ६० पेजको पुस्तक पनि विमोचन गरिएको छ ।

चार वर्षको अवधिमा भौतिक विकासतर्फ ८ सय ७३ किमी सडक निर्माण भएको फेहरिस्त मुख्यमन्त्री पोखरेलले सार्वजनिक गरेका छन् । ४७ वटा मोटरेबल पुल बनेको र ८९ वटा निर्माणाधीन रहेको प्रदेश सरकारले जनाएको छ । ३२ वटा झोलुंगे पुलको निर्माण सम्पन्न भएको छ भने, ३३ वटा झोलुंगे पुल आगामी वर्ष सकिने मुख्यमन्त्री पोखरेलको दाबी छ । मुस्ताङको कोरलादेखि नवलपुरको त्रिवेणी जोड्ने कोरला करिडोर सडकको स्तरोन्नति गर्ने र सम्पूर्ण सडकलाई दुई लेनको बनाउने कार्य तीव्रताका साथ भइरहेको उनले बताए ।

प्रदेशसभा २०७५ माघ २२ मा स्थापना भएपछि संवैधानिक दायित्त्वबमोजिम प्रदेशसभाले ५० वटा ऐन पारित गरेको छ । नागरिकका जीविकासँग जोडिएका, सार्वजनिक महत्त्वका तथा दीर्घकालीन लाभका विषयमा प्रदेश सभामा जीवन्त छलफल हुने गरेको उनले बताए । उनका अनुसार सरकारले ऐन कार्यान्वयनका लागि १२ वटा नियमावली तर्जुमा गरेको छ ।

शिक्षा र स्वास्थ्य नीति जारी भएको छ भने, श्रम नीति, वन नीति, भू उपयोग नीतिको मस्यौदा तयार भएको छ । मुख्यमन्त्री पोखरेलका अनुसार चार वटा गठन आदेश र विभिन्न कार्यविधि/निर्देशिका/मापदण्ड कार्यान्वयनमा छन् ।

प्रदेश सरकार स्थापना हुँदा विद्युत्मा पहुँच प्राप्त परिवार ८२.२ प्रतिशत थियो । प्रदेश सरकारका अनुसार हाल ९३ प्रतिशत परिवारमा पहुँच पुगेको छ । त्यस्तै चार सय २२ वटा खानेपानी आयोजना सम्पन्न भई ८२ हजार १ सय ७० निजी धारा जडान भएका छन् । आगामी वर्षसम्म सबै घरमा आधारभूत खानेपानी सुविधा पुर्‍याउने प्रदेश सरकारको योजना छ ।

प्रदेश सरकारले चार वर्षमा गरेका काम

प्रकाशित मिति: बुधबार, फागुन ४, २०७८ १८:१९