एमसीसीको संसदीय अनुमोदनबारे देउवाको ब्रिफिङः माधव नेपालसँग विश्वस्त, प्रचण्डप्रति सशंकित

एमसीसीको संसदीय अनुमोदनबारे देउवाको ब्रिफिङः माधव नेपालसँग विश्वस्त, प्रचण्डप्रति सशंकित

A+ A A-

प्रधानमन्त्री शेरबहादुर देउवाले अमेरिकी सहायता परियोजना एमसीसी अघि बढाउनका निम्ति एकीकृत समाजवादीका अध्यक्ष माधव नेपालप्रति विश्वस्त भए पनि माओवादी केन्द्रका अध्यक्ष पुष्पकमल दाहाल 'प्रचण्ड'को भूमिकाप्रति अझै संशय व्यक्त गरेका छन् ।

मंगलबारको संसदीय दलको बैठकमा ब्रिफिङ गर्दै देउवाले एकीकृत समाजवादीका अध्यक्ष नेपालले सहयोग गर्नेमा विश्वस्त रहेको बताएका हुन् । 'म विश्वस्त छु माधवजीको सहयोग हुन्छ,' देउवाको ब्रिफिङबारे कांग्रेस महामन्त्री तथा सांसद गगन थापाले भने ।

प्रचण्डप्रति भने देउवा विश्वस्त हुन सकेका छैनन् । गठबन्धनको बैठकमा प्रचण्ड र नेपालले एमसीसी संसदमा अघि बढाउन सहमति जनाए पनि सभामुख अग्नि सापकोटाले प्रचण्डकै इसारामा अहसयोग गर्न खोजेको सूचना प्राप्त भएपछि देउवाले संसदीय दलको बैठक चल्दै गर्दा बैठकबाट बाहिरिएर संसद भवन प्राङ्गणबाटै सापकोटालाई फोन गरेका थिए । बैठकस्थलबाट निस्किँदै देउवाले प्रमुख सचेतक पुष्पा भुसाललाई सभामुखलाई फोन लगाउन भनेका थिए । फोन संवादमार्फत देउवाले कार्यव्यवस्था परामर्श समितिमा छलफल गरेर एमसीसीलाई कार्यसूचीमा समावेश गर्न आग्रह गरेको भुसालले बताइन् । 'प्रधानमन्त्रीले कार्यव्यवस्थाको बैठक राखेर एमसीसीलाई कार्यसूचीमा राख्न भन्नुभएको थियो,' उनले भनिन् ।

सभामुखसँगको संवादका क्रममा भावभंगी हेर्दा सभामुखले अहसयोग गर्ने संकेत देखापरेको सांसद प्रकाश रसाइलीले बताए । 'फोनका क्रममा सभापतिको गेस्चर हेर्दा सभामुखबाट सहयोग हुने जस्तो देखिएन,' उनले भने ।

कांग्रेस संसदीय दलले एमसीसी पारित गर्ने निर्णय गरेको छ । यसका निम्ति सहयोग गर्न संसदमा प्रतिनिधित्व गर्ने सबै दललाई कांग्रेसले आह्वान पनि गरेको छ । बैठकमा कांग्रेस सभापतिसमेत रहेका देउवाले तत्कालीन केपी ओली नेतृत्वकै सरकारले दर्ता गराएको एमसीसी वर्तमान सरकारले अघि बढाउन खोजेको बताएका छन् । यसमा एमालेको भूमिका उदेग लाग्दो रहेको देउवाको भनाइ थियो । 'ओलीजीको सरकार हुँदा संसदमा दर्ता गर्ने अनि अहिले उहाँले नै दर्ता गराएको विधेयक अघि बढाउन खोज्दा हामीलाई षडयन्त्रको आरोप लगाउने एमालेको चरित्र उदेग लाग्दो छ,' देउवाले बैठकमा भने ।

प्रधानमन्त्रीले भने- भाेलिकाे संसद बैठकमा एमसीसी टेबुल हुन्छ, पारित गर्न दलहरूलाई आह्वान

निर्वाचनमा हानी हुने विषयको लेखाजोखा गरेर वैदेशिक सहायता र कूटनीतिक सम्बन्धमा राष्ट्रलाई नोक्सान पुर्‍याउने काम कांग्रेसले नगर्ने देउवाको भनाइ थियो । 'निर्वाचनमा हानी होला भनेर सत्तामा बस्दा एउटा कुरा प्रतिपक्षीमा बस्‍दा अर्को कुरा कांग्रेसले गर्दैन । सबै राजनीतिक दलको यो प्रक्रियामा सहभागिता छ । संसदमा पेस भएपछि फरक-फरक कित्तामा उभिनुनपर्ने हो । एमसीसी संसदबाट पारित हुन्छ,' देउवाको भनाइ उद्दृत गर्दै सांसद थापाले भने ।

बैठकमा प्रधानमन्त्री देउवाले गठबन्धनका दलले एमसीसीमा असहयोग गर्दा निर्वाचनमा सँगै जाने विषयमा पनि अप्ठ्यारो हुनसक्ने बताएका थिए । 'एमसीसी अघि बढाउँदा असहयोग गर्ने अनि भोलि चुनावमा सँगै मत माग्न उहाँहरू कसरी जाने त?' देउवाको प्रश्न थियो ।

बैठकमा पूर्वअर्थमन्त्री रामशरण महत, परराष्ट्रमन्त्री नारायण खड्काले एमसीसी सम्झौताबारे सांसदहरूलाई ब्रिफिङ गरेका थिए । नेता महतले नौ बुँदे ब्रिफिङ प्रस्तुत गर्दै एमसीसी पास नगर्दा मुलुकलाई विकास र पूर्वाधारको क्षेत्रमा ठूलो धक्का पुग्ने बताएका थिए । यस्तै परराष्ट्रमन्त्री खड्काले चीनको बीआरआई परियोजनामा सहभागी भएपछि एमसीसी पनि अनुमोदन गर्नुपर्ने तर्क गरेका थिए । 'जापापनको सहयोग जाइकाको नाममाबाट र चीनको सहयोग बीआरआईको नाममा आएजस्तै एमसीसी पनि त्यस्तै हो यसमा कुनै पनि रणनीति जोडिएको छैन,' उनको भनाइ थियो ।

बैठकमा महामन्त्री थापा, सांसदहरू सुजाता कोइराला, मिनेनन्द्र रिजाल, दिव्यमणीराज भण्डारी, अमरेश कुमार सिंह, पार्वती डिसी चौधरी, प्रकाश रसाइलीलगायतका सांसदले एमसीसीबारे धारणा राखेका थिए । उनीहरूले राजनीतिक आवरणमा यसलाई धेरै गिजोल्न नमिल्ने मत राखेका थिए । कांग्रेस संसदीय दलको बैठकले निलम्बित प्रधानन्यायाधीश चोलेन्द्र शमशेर राणाविरुद्धको महाभियोग पारितका लागि सहयोग गर्न प्रतिपक्षी दललाई समेत आग्रह गरेको छ ।

प्रकाशित मिति: मंगलबार, फागुन ३, २०७८ १४:४७