संसदमा एमसीसी अघि बढाउन प्रधानमन्त्रीको आग्रह, सभामुखको जवाफ- सहमति भए बाधक बन्दिनँ

संसदमा एमसीसी अघि बढाउन प्रधानमन्त्रीको आग्रह, सभामुखको जवाफ- सहमति भए बाधक बन्दिनँ

A+ A A-

सभामुख अग्निप्रसाद सापकोटाले अमेरिकी सहायता परियोजना एमसीसीसम्बन्धी प्रस्ताव सरकारले राष्ट्रिय सहमतिमार्फत ल्याएमा त्यसलाई टेबल गर्न आफू बाधक नहुने बताएका छन् । सर्वदलीय बैठकमा प्रधानमन्त्री शेरबहादुर देउवाले सदनमा एमसीसी अघि बढाउन आग्रह गरेपछि सापकोटाले यस्तो संकेत गरेका हुन् ।

बैठकमा प्रधानमन्त्री शेरबहादुर देउवाले सभामुख सापकोटालाई संसदमा एमसीसी अघि बढाउनका निम्ति सहयोग गर्न आग्रह गरेका थिए । 'एमसीसीको विषय संसदमा छलफल गरौँ संसदमा लैजाऔँ,' बैठकमा प्रधानमन्त्रीले गरेको आग्रह उद्धृत गर्दै नेपाल मजदुर किसान पार्टीका सांसद प्रेम सुवालले भने ।

प्रधानमन्त्री देउवाले यस्तो आग्रह गरेपछि सभामुख सापकोटाले सबै सहमति कायम हुनुपर्ने बताए । 'म २ सय ७५ जनाकै सांसद हुँ । सबैको सहमति भए म बाधक बन्दिनँ,' सापकोटाको भनाइ थियो ।

सभामुख सापकोटाले दलीय सहमतिका लागि प्रतिपक्षी दलसँग समेत संवाद गर्न सत्तारुढ दललाई आग्रह गरेका छन् । 'दलीय सहमति हुँदा मैले अन्यथा गर्ने कुरै रहेन, तपाईंहरूले सदन निर्वाध रूपमा सञ्चालनको वातावरण पनि बनाउनुस्, प्रतिपक्षी दलसँग पनि छलफल गर्नुस्,' सापकोटाको भनाइ उद्धृत गर्दै माओवादी केन्द्रका प्रमुख सचेतक देव गुरुङले भने ।

बैठकपछि सञ्चारकर्मीहरूसँग कुरा गर्दै सापकोटाले एमसीसीको विषयमा आफू अम्पायर मात्रै भएको बताउँदै दलहरू नै निर्णायक रहेको बताए । 'सभामुखको हैसियतमा मैले स्वतन्त्र र निष्पक्ष रूपमा काम गर्नुपर्ने हुन्छ । एमसीसीको विषयमा म अम्पायर न हुँ, निर्णायक भूमिका त दलहरूको हुन्छ,' उनले बैठकपछि भने ।

सत्तारुढ दलबीच एमसीसी अघि बढाउने सहमति शनिबार नै बनिसकेको छ । एमसीसीलाई संसदमा उपस्थित संख्याको सामान्य बहुमतले पास गर्ने र त्यस बैठकमा माओवादी केन्द्र र एकीकृत समाजवादीका सांसदले अनुपस्थिति जनाउने गरी गठबन्धनमा सहमति भएको छ ।

प्रधानमन्त्री देउवाले नै यस प्रस्ताव माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका नेता माधवकुमार नेपालसँग राखेका थिए । 'एमसीसी रोकौँ भनेर हामीले प्रधानमन्त्रीलाई कन्भिन्स गर्न सकेनौँ यसले टाउकै खाइसक्यो । यही बहानामा गठबन्धन टुटाउने विभिन्न प्रयत्न पनि भइरहेका छन् । प्रधानमन्त्रीले गठबन्धन जोगाउने विकल्पसहित एमसीसी अघि बढाउन खोज्नुभएको छ,' नेता नेपालले भनेका छन् ।

संसदको कार्यव्यवस्था परामर्श समितिको बैठकमा एमसीसीको विषयमा छलफल हुने एकीकृत समाजवादीका प्रमुख सचेतक जीवनराम श्रेष्ठले बताए । 'एमसीसीको विषयमा कार्यव्यवस्था समितिमा छलफल हुन्छ । त्यहाँ दलहरूले आ-आफ्नो धारणा व्यक्त गर्नुहुनेछ । सर्वदलीय बैठक सदनलाई प्रभावकारी रूपमा छलफल गर्नेमा केन्द्रित बन्यो । राष्ट्रिय राजनीतिका विभिन्न मुद्दा र सदनमा विचाराधीन विषयलाई अघि बढाउने विषयमा छलफल भएको छ,' श्रेष्ठले भने ।

अघिल्लो साता कानुनमन्त्री दिलेन्द्र बडूले सभामुख सापकोटासँग भेट गर्दै कार्यव्यवस्था समितिमा आफूले यो प्रस्ताव छलफलका लागि ल्याउने बताएका थिए । विगत चार वर्षदेखि कार्यव्यवस्थामा एमसीसीसम्बन्धी औपचारिक प्रस्ताव नै नआएको सभामुखको सचिवालयको दाबी छ ।

सोमबारको सर्वदलीय बैठकमा सभामुख सापकोटाले नागरिकता विधेयक पारित नहुँदा लाखौँ युवा तथा वयस्क नागरिक हुनबाट वञ्चित भएको भन्दै उक्त विधेयक अघि बढाउन सरकारलाई ध्यानाकर्षण गराएका छन् । 'नागरिकता विधेयक पारित नहुँदा विभिन्न सुविधाबाट वञ्चित भएको गुनासो मसमक्ष आएपछि यसलाई गम्भीरतापूर्वक लिन मैले दलहरूलाई ध्यानाकर्षण गराएको छु,' सापकोटाले भने ।

संसदमा ४८ वटा विधेयक विचाराधीन अवस्थामा रहेको छ । प्रमुख प्रतिपक्षी एमालेको अवरोधको कारण सरकारले विधेयक अघि बढाउन नसकेको सरकारको भनाइ छ ।

प्रकाशित मिति: सोमबार, फागुन २, २०७८ १९:३८