प्रदेश १ को नाम विराट राख्न राजवंशी समुदायको माग

A+ A A-

प्रदेश १ को नाम 'विराट प्रदेश' राख्न राजवंशी समुदायले माग गरेका छन् । सोमबार विराटनगरमा पत्रकार सम्मेलन गर्दै राजवंशी समाज उत्थान समिति (विराट) ले प्रदेशको नाम विराट राख्न माग गरेको हो ।

राजवंशी समाज उत्थान समितिले विराट राजवंशीहरू पूर्वी नेपालको आदिवासी भएकाले सामूहिक पहिचानका लागि प्रदेशको नाम विराट हुनुपर्ने माग गरेको हो । समितिले प्रदेशको नाम विराट नराखिए कडा आन्दोन गर्ने चेतावनीसमेत दिएको छ ।

प्रदेश स्थापना भएको करिब चार वर्ष पुग्न लागे पनि नामकरण हुन सकेको छैन । प्रदेश १ मा राजधानीको टुंगो लागे पनि प्रदेश सरकारले नामकरणको प्रस्ताव ल्याउन सकेको छैन ।

पछिल्लो समय प्रदेश नामरणको चर्चा चलेसँगै विभिन्न जातीय संगठनहरूले पहिचानका आधारमा नामकण गर्न माग गर्दै आएका छन् । समितिले आगामी ६ फागुनमा हुने १५औँ बृहत भेलाको तयारीबारे जानकारी दिने उदेश्यले आयोजना गरेको पत्रकार सम्मेलनमा विराट राजवंशीलाई आदिवासी जनजाति उत्थान राष्ट्रिय प्रतिष्ठानमा सूचिकृत गर्नुपर्ने मागगमेत गरेको छ ।

समितिले विराट राजवंशीलाई राज्यको हरेक अंगमा स्थान सुरक्षित गर्नुपर्ने, सो समुदायलाई विराटनगरको प्रथम जातिको रूपमा घोषणा गर्नुपर्ने, प्रदेशसभा सदस्यमा यस जातिलाई समानुपातिक रूपमा प्रतिनिधित्व सुनिश्चित गर्नुपर्ने, विराटनगर महानगरपालिका, कटहरी, जहदा बुढीगंगा, धनपालथान र ग्रामथान गाउँपालिका क्षेत्रलाई विराट राजवंशी स्वायत्त परिषद्को व्यवस्था गर्नुपर्ने माग गरेको छ ।

समुदायको उत्थानका लागि प्रत्येक तह र अङ्गहरूमा छुट्टै आरक्षणको व्यवस्था गनुपर्ने, विराटनगरको भेडियारीस्थित विराट दरबार क्षेत्रको संरक्षण र प्रवर्द्धनका लागि विराट राजवंशी समुदायको नेतृत्वमा पर्यटकीय क्षेत्रको रूपमा विकास गर्नुपर्नेलगायतका माग संघीय र प्रदेश सरकारले यथाशीघ्र कार्यान्वयन गर्नुपर्ने समितिको माग छ ।

आगामी ६ फागुनमा मोरङको जहदा गाउँपालिका–३, वभनटोलीमा हुने भेलामा मोरङ, सुनसरी र झापाका विराट राजवंशीको बृहत् सहभागिता हुने पत्रकार सम्मेलनमा जनाइएको छ ।

२०६८ सालको जनगणनाअनुसार मोरङ, सुनसरी र झापामा सो समुदायको जनसङ्ख्या ४० हजार रहेको अध्यक्ष मण्डलले जानकारी दिए ।

प्रकाशित मिति: सोमबार, फागुन २, २०७८ १८:५७