'एमसीसीले टाउको खाइसक्यो, प्रधानमन्त्रीलाई मनाउन नै सकेनौँ'

A+ A A-

अमेरिकी सहायक विदेशमन्त्री डोनाल्ड लूले बिहीबार सत्ता गठबन्धनमा आवद्ध नेताहरू र प्रमुख प्रतिपक्षी एमालेका अध्यक्ष केपी ओलीलाई फोन गरेर एमसीसी परियोजना १६ फागुनभित्र संसदबाट पारित नभए यसको कारण चिनिँया दबाब रहेको बुझिने र अमेरिकाले नेपाल नीति परिवर्तन गर्ने चेतावनी दिए । लूले यो आशय प्रधानमन्त्री शेरबहादुर देउवा, एमाले अध्यक्ष ओली, माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधवकुमार नेपालसमक्ष प्रकट गरेका थिए ।

अमेरिकी चेतावनीसँगै शीर्ष नेताहरुले एमसीसीबारे आपसी संवादलाई बढाएका छन् । प्रचण्ड र नेपालले शनिबार प्रधानमन्त्रीलाई भेटे । उनीहरूले एमसीसीलाई धेकेल्न प्रधानमन्त्रीलाई मनाउन खोजेका थिए । तर, उनीहरूको प्रयास निरर्थक बनेको छ ।

अमेरिकी चेतावनीसँगै नेताहरूबीच एमसीसी केन्द्रित छलफल बढिरहेको छ । लूको फोनपछि माओवादी केन्द्रका अध्यक्ष प्रचण्डले एमाले अध्यक्ष ओलीलाई फोन गरेर एमसीसीको विषयमा सहयोग मागे ।

ओलीले सत्ता गठबन्धनले आफूलाई सत्ताबाट हटाएछि पारित गर्छौं भनेर अमेरिकालाई लिखित जवाफ दिएकाले पहिले गठबन्धनले निर्णय गर्नुपर्ने जवाफ दिए । ‘तपाईंहरूले पहिले केपी ओलीलाई हटाएपछि पारित गर्छौं भनेर बचन दिनुभएको छ,' ओलीको जवाफ थियो, 'हटाइसकेपछि ४-५ महिनामा पारित गर्छौं’ भनेर लिखित कागज नै गर्नुभएको रहेछ । अहिले सत्ता चलाइरहनुभएको छ, प्रतिनिधिसभामा १ सय ६५ सदस्य छन् । पहिले आफूले निर्णय गर्नूस् नेकपा (एमाले) त निर्णय गरिहाल्छ ।’

एमाले अध्यक्ष ओलीबाट सकरात्मक संकेत नपाए पनि शनिबार प्रधानमन्त्री देउवासँग संवाद गरेका माओवादी केन्द्रका अध्यक्ष प्रचण्डले यो विषयमा प्रतिपक्षीसँग सघन छलफलको प्रस्ताव प्रधानमन्त्री समक्ष गरेका छन् । 'चुनावअघि एमसीसी अघि नबढाऔँ, यो विषयमा प्रतिपक्षीसँग पनि सघन छलफल गरौँ । एमसीसी अहिले पारित हुँदा गठबन्धनमा पनि संकट हुनसक्छ, संसद बैठक सारेर सघन छलफल गरौँ,' प्रचण्डको प्रधानमन्त्रीलाई प्रस्ताव थियो ।

प्रचण्डले २ फागुनमा डाकिएको संसद ४ फागुनसम्म स्थगित गर्नका निम्ति प्रस्ताव राखेका छन् । यो प्रस्तावमा प्रधानमन्त्री देउवा भने सहमत भएनन् । 'तपाइँहरूकै आग्रहमा पटक-पटक संसद बैठक स्थगित भइरहेको छ । एमसीसी अघि नबढाउँदा अब मुलुकलाई नै समस्या पर्ने भइसक्यो,' देउवाले बैठकमा भनेका छन, 'एमसीसी पारित हुँदैमा गठबन्धनलाई कुनै संकट पर्दैन । संसदमा पेस गरौँ त्यहाँबाटै निर्णय हुन दिऔँ।'

बैठकमा सहभागी एकीकृत समाजवादीका अध्यक्ष नेपालले एमसीसीलाई धेकल्न प्रधानमन्त्रीलाई मनाउने कोसिस गरे पनि आफूहरूको प्रयास असफल भएको बताए । 'प्रधानमन्त्रीलाई एमसीसी अनुमोदन तत्काल नगर्न कन्भिन्स गर्न खोज्यौँ तर, सकेनौँ,' नेता नेपालले शिलापत्रसँग भने ।

सत्ता गठबन्धनमा एमसीसीको सकसबारे नेता नेपालले भने, 'एमसीसीले टाउको खाइसक्यो । गठबन्धन टुटाउनका निम्ति विभिन्न दबाब र प्रलोभन देखाइएको छ । धेरैको चाहाना गठबन्धन भत्किए हुन्थ्यो भन्ने छ । यसलाई बचाउन पनि निरन्तर संवादमा छौँ,' उनले भने ।

प्रधानमन्त्री देउवालाई पार्टीभित्र पनि एमसीसी अघि बढाउनैपर्ने दबाब छ । गठबन्धनको मतलब नगरीकन यो प्रस्ताव अघि बढाउनुपर्ने मत कांग्रेसको कार्यसम्पादन समितिमा प्रकट भइसकेको छ । वर्तमान गठबन्धनलाई अप्राकृतिक करार गर्दै चुनावमा एक्लै जानका निम्ति नेता शेखर कोइरालाले कांग्रेसको कार्यसम्पादन समितिमा लिखित प्रस्ताव राखिसकेका छन् ।

शनिबारको बैठकमा प्रधानमन्त्रीलाई एमसीसीबारे मनाउन नसकेपछि फेरि बैठक बस्नेगरी नेताहरूउठेका छन् । आगामी बैठकबारे नेता नेपाल भन्छन्, 'धेरैको कोशिस गठबन्धन भत्काउनैमै केन्द्रित छ । यो गठबन्धनलाई जोगाउन र प्रधानमन्त्रीलाई कन्भिन्स गराउन अझै छलफल जरुरी छ । हामी फेरि संवादमा जुट्नेछौँ ।'

प्रकाशित मिति: शनिबार, माघ २९, २०७८ १८:०५