विकट गाउँमा विद्युत ट्रान्सफर्मर पुर्‍याउन हेलिकप्टर चार्टर्ड

A+ A A-

मकवानपुरको पूर्वी क्षेत्रस्थित बकैया गाउँपालिका भौगोलिक रुपले विकट छ । क्षेत्रफलमा देशकै ठूला स्थानीय तहमध्ये एक बकैयाका धेरै वडा विकट छन् । जसमध्ये बारा जिल्लासँग सीमाना जोडिएको ७ नम्बर वडाको दरबारडाँडा अति विकट क्षेत्र हो।

दरबारडाँडामा हालसम्म पनि सडक पुग्न सकेको छैन् । देशमा संघीयता आएपछि विकासमा कायापलट हुन्छ भन्ने दलका घोषणा पत्रलाई दरबारडाँडाको अवस्थाले गिज्याइरहेको छ । गाउँपालिकाले पनि दरबारडाँडासम्म सडक पुर्‍याउन सकेको छैन् । यसअघि सडक निर्माणकै क्रममा रुखहरू कटान भएको भन्दै डिभिजन वन कार्यालय मकवानपुरले स्थानीय तहका अध्यक्षसहित ३ जनालाई मुद्दा चलाएपछि निर्माण रोकिएको थियो ।

सडक नपुगेकै कारण दरबारडाँडाका करिब ६० घरधुरी बिजुली नहुँदा अहिलेसम्म अँध्यारोमा बस्न बाध्य छन् । टुकी बत्ति बाल्दै आएका दरबारडाँडाका स्थानीयको घरमा भने अब बिजुली बल्ने भएको छ ।

नेपाली कांग्रेस बकैया गाउँपालिका कार्यसमितिको पहलमा हेलिकप्टर चार्टर्ड गरी दरबारडाँडामा ट्रान्सफर्मर पुर्‍याइएको छ । २ लाख रुपैयाँ भाडा तिरेर कांग्रेसका स्थानीय नेताहरूले माउन्टेन नाइन एन एकेबी हेलिकप्टरमा ट्रान्सफर्मर ल्याएको स्थानीय विजय लामा थिङले शिलापत्रलाई बताए ।

थिङका अनुसार यसअघि दरबारडाँडाका स्थानीयले बिजुलीको पोल र तार बोकेरै पुर्‍याएका थिए । ७ नम्बर वडाकै हर्दामाटोकरीबाट करिब ४ घण्टा उकालो चढेपछि दरबारडाँडा पुगिन्छ । ‘बिजुली बाल्ने उद्देश्यले स्थानीयले धेरै दुःख गरेर पोल र तार बोकेरै लैजानु भएको हो । त्यही दुःख देखेर हामीले हेलिकप्टर चार्टर्ड गरेर ट्रान्सफर्मर लगेका हौं,’ बकैया गाउँपालिका अध्यक्ष दामोदर खनालले भने ।

हेलिकप्टर चार्टर्डको लागत १ लाख ९० हजार रुपैयाँ गाउँपालिका अध्यक्ष खनालसहित, नेपाली कांग्रेस बकैयाका सभापति दिलबहादुर बोम्जन, नेपाली कांग्रेस महाधिवेशन प्रतिनिधि ताराचन्द्र बजगाई (निशान)ले व्यहोर्ने भएका छन् ।

गाउँपालिका र नेपाल विद्युत प्राधिकरण हेटौंडा वितरण केन्द्रको सहकार्यमा पोल र तार टाँगिसकेको अध्यक्ष खनालले जानकारी दिए । उनले ट्रान्सफर्मर पुगे पनि जडान भने भइनसकेको भन्दै तत्काल प्राविधिक पठाउने बताए । ‘जनता धेरै खुसी छन् । हामीले सडक पुर्‍याएर बिजुली विस्तार गर्न खोज्दा वन कार्यालयले अवरोध गर्‍यो । जसरी पनि बिजुली पुर्‍याउँछु भन्ने अठोट लिएको थिएँ । आज शनिवार हाम्रो योजना सफल भयो,’ खनालले शिलापत्रसँग भने ।

बकैया–७, चुनढुंगादेखि दरबारडाँडासम्म जोड्ने बाटो निर्माणका लागि चुनदेवी सामुदायिक वन उपभोक्ता समूहको क्षेत्रमा बाटो खनेको आरोपमा डिभिजन वन कार्यालय मकवानपुरले स्काभेटर कब्जा गरी मुद्दा दायर गरेको थियो । जिल्ला अदालत मकवानपुरले गतवर्ष साउनमा गाउँपालिका अध्यक्ष खनाललाई वातावरणीय प्रभाव मूल्याकंन प्रतिवेदनबिना राष्ट्रिय वन क्षेत्रमा सडक निर्माण गरेको अभियोगमा १ लाख रुपैयाँ जरिवाना तोकेको थियो ।

प्रमुख प्रशासकीय अधिकृत लक्ष्मण पुडासैनी, निर्माण समिति अध्यक्ष सिर्जना थिङ र एक्साभेटर सञ्चालकलाई समेत जरिवाना तोकिएको थियो ।

जनही पाँच बर्ष कैद र ११ लाख रुपैयाँ जरिवाना माग गर्दै मुद्दा दायर भएकोमा अध्यक्ष खनाललाई एकलाख रुपैयाँ, प्रमुख प्रशासकीय अधिकृत पुडासैनीलाई ५० हजार, सडक निर्माण उपभोक्ता समितिकी अध्यक्ष थिङलाई ३० हजार र स्काभेटर सञ्चालक मोक्तानलाई ३० हजार रुपैयाँ जरिवाना तोकेको थियो ।

प्रकाशित मिति: शनिबार, माघ २९, २०७८ १७:१२