हिजाब विवादबारे अमेरिकालाई भारतकाे जवाफ- आन्तरिक हस्तक्षेप नहाेस्

A+ A A-

भारतको कर्नाटक राज्यका शिक्षण संस्थामा हिजाब लगाउन रोक लगाइएकोबारे चर्केको विवादका सम्बन्धमा अमेरिकासहित विभिन्न देशहरूबाट भएको ध्यानाकर्षण र अभिव्यक्ति स्वीकार्य नरहेको भारतले जनाएको छ । भारतको विदेश मन्त्रालयले आन्तरिक मामिलामा कुनै खास उद्देश्यबाट प्रेरित भएको टिप्पणीलाई स्वागत नगरिने जनाएको हो ।

पाकिस्तानले हिजाब विवादमा मोदी सरकारको आलोचना गर्दै भारतमा अल्पसंख्यकलाई हँसियामा राख्न खोजिएको बताएको छ भने अमेरिकाले धार्मिक स्वतन्त्रता कुण्ठित गर्न खोजेको भन्दै कर्नाटक राज्य सरकारको आलोचना गरेको छ । तर भारतले भने यस्ता टिप्पणीहरूलाई स्वागत गर्न नसकिने बताएको हो ।

यसबारे जवाफ दिँदै भारतीय विदेश मन्त्रालयका प्रवक्ता अरिन्दम बागचीले भनेका छन्, ‘कर्नाटक राज्यका केही शैक्षिक संस्थाहरूमा युनिफर्म कोडसँग सम्बन्धित विषय कर्नाटक उच्च अदालतको निगरानीमा छ । कुनै पनि विवादको समाधानको लागि हाम्रो संविधानअनुरुप जाने व्यवस्था छ र यसैमार्फत समस्याको हल निस्कने गर्छ ।’

Our response to media queries on India’s reaction to comments by some countries on dress code in some educational institutions in Karnataka:https://t.co/Mrqa0M8fVr pic.twitter.com/pJlGmw82Kp
— Arindam Bagchi (@MEAIndia) February 12, 2022

उनले अगाडि भनेका छन्, ‘जो मानिस भारतलाई राम्ररी चिन्छन्, उनीहरूलाई यो वास्तविकताको सही जानकारी छ । हाम्रो घरेलु मामिलामा कुनै उद्देश्यबाट प्रेरित बयानबाजीलाई स्वागत गरिँदैन ।’

यसअघि विदेशमा धार्मिक स्वतन्त्रताको निगरानी गर्ने अमेरिकी सरकारको एक संस्थाले मुस्लिम छात्राहरूले हिजाब लगाउन पाउनुपर्ने भन्दै गरेको मागप्रति भइरहेको विवादकाबीच भारतको कर्नाटक राज्य सरकारको आलोचना गरेको थियाे । इन्टरनेशनल रिलिजियस फ्रिडम (आईआरएफ)का राजदूत रशद हुसैनले कर्नाटकमा छेडिएको विवादबारे ट्वीट गरेर भनेका थिए, ‘विद्यालयमा हिजाबमाथि रोक लगाउनु धार्मिक स्वतन्त्रताको उल्लंघन हो ।’

‘धार्मिक स्वतन्त्रतामा कुनै पनि व्यक्तिलाई आफ्नो धार्मिक पहिरन छनोटको स्वतन्त्रता हुन्छ । भारतको कर्नाटक राज्यले धार्मिक पोशाक तय गर्नु हुँदैन । विद्यालयमा हिजाबमाथि प्रतिबन्धले धार्मिक स्वतन्त्रताको उल्लंघन गर्छ’, उनले भनेका थिए ।

याे पनि :