हिजाब विवादले हल्लियाे कर्नाटक, अमेरिका पनि बाेल्याे

A+ A A-

विदेशमा धार्मिक स्वतन्त्रताको निगरानी गर्ने अमेरिकी सरकारको एक संस्थाले मुस्लिम छात्राहरूले हिजाब लगाउन पाउनुपर्ने भन्दै गरेको मागप्रति भइरहेको विवादकाबीच भारतको कर्नाटक राज्य सरकारको आलोचना गरेको छ ।

इन्टरनेशनल रिलिजियस फ्रिडम (आईआरएफ)का राजदूत रशद हुसैनले कर्नाटकमा छेडिएको विवादबारे ट्वीट गरेर भनेका छन्, ‘विद्यालयमा हिजाबमाथि रोक लगाउनु धार्मिक स्वतन्त्रताको उल्लंघन हो ।’

Religious freedom includes the ability to choose one's religious attire. The Indian state of Karnataka should not determine permissibility of religious clothing. Hijab bans in schools violate religious freedom and stigmatize and marginalize women and girls.
— Amb. at Large for International Religious Freedom (@IRF_Ambassador) February 11, 2022

उनले भनेका छन्, ‘धार्मिक स्वतन्त्रतामा कुनै पनि व्यक्तिलाई आफ्नो धार्मिक पहिरन छनोटको स्वतन्त्रता हुन्छ । भारतको कर्नाटक राज्यले धार्मिक पोशाक तय गर्नु हुँदैन । विद्यालयमा हिजाबमाथि प्रतिबन्धले धार्मिक स्वतन्त्रताको उल्लंघन गर्छ ।’

यद्यपि भारतले अहिलेसम्म हुसैनको टिप्पणीमाथि कुनै प्रतिक्रिया जनाएको छैन । कर्नाटक हाई कोर्टले हिजाब प्रतिबन्धलाई चुनौती दिइएको याचिकामाथि सोमबार सुनुवाइ गर्ने बताएको छ ।

यसरी सुरु भयो विवाद

सन् २०२१ को डिसेम्बरमा कर्नाटक राज्यको उडुपीमा रहेको एक सरकारी कलेजले छात्रालाई हिजाब (टाउको र घाँटी छोप्ने पहिरन) लगाएर कक्षामा आउन रोक लगायो । कलेज परिसरमा हिजाब लगाउने छुट दिए पनि कक्षामा भने हिजाब लगाउन नपाइने नियम बनायो कलेजले ।

कक्षाकोठामा हिजाब लगाउन नपाइने कलेजको नियमविरुद्ध मुस्लिम छात्राहरूले विरोध गरे । कलेजले उनीहरूको माग सुनुवाइ नगरेपछि मुस्लिम छात्राहरू कर्नाटक उच्च अदालतको ढोका ढकढकाउन पुगे ।

मुस्लिम युवतीहरूले हिजाब लगाएर कक्षामा बस्न पाउनुपर्ने माग राखेपछि हिन्दुवादी संगठनमा आवद्ध विद्यार्थीहरूले पनि गेरुवा रंगको मफ्लर र गम्छा लगाएर कलेज र विद्यालय आउन पाउनुपर्ने भन्दै आन्दोलन चर्काए । विवाव बढ्दै गएर हिजाब लगाउने र गेरुवा गम्छा लगाउने दुई समुह आम्ने–साम्ने हुन पुगे ।

यता उडुपीको सरकारी कलेजले भने हिजाब लगाएकै कारण मुस्लिम छात्रालाई कक्षाकोठा र कलेजमा प्रवेश बन्द गर्‍यो । मुस्लिम छात्राले संविधानले नै पहिरन र धार्मिक स्वतन्त्रताको हक दिएको भन्दै विरोध गरे ।

गएको मंगलबार कर्नाटकको माड्या भन्ने स्थानमा रहेको एक उच्च शिक्षालयमा प्रवेश गर्दै गरेकी मुस्लिम छात्रालाई हिजाब लगाएको भन्दै हिन्दु अतिवादीले दुर्व्यवहार गरेको भिडियो सार्वजनिक भयो ।

मुस्कान नाम गरेकी ति युवतिले हिन्दु अतिवादीसँग डटेर प्रतिकार गरिन् ।

बीबीसी हिन्दीसँगको कुराकानीमा उनले भनिन्, ‘म सधैँ जसरी कलेजमा गएकी हुँ । त्यो भिडले मलाई गेट बाहिरै रोकेर हिजाब लगाएर कलेज भित्र नछिर भन्दै धम्की दियो । अनि जसै म कलेज भित्र छिरेँ मलाई घेरे । अनि मैले पनि अल्लाहको नाम लिँदै प्रतिवाद गरेँ, उनीहरूले मलाई पछाडिबाट नाराबाजी गर्दै घेरा हाले ।’

अदालत पुगेको यो विषयमा कर्नाटक उच्च अदालतका तीन जना न्यायाधीशले सुनुवाइ गर्दैछन् । हिजाबको नाममा उठाइएको यो विवादले सम्पूर्ण कर्नाटक राज्य तनावग्रस्त भएको छ ।

यो विवाद कानुन बहसको मात्र नरहेर अहिले राजनीतिको पनि बनेको छ । प्रदेशहरूमा चुनावको मौसम भएकाले पनि यो विवाद झन चर्किएको हो । भारतको मोदी सरकार हिन्दुवादीको समर्थनमा छ । विपक्षीहरूले मोदी सरकारले धार्मिक अल्पसंख्यकमाथि दमन गरेको आरोप लगाउने गरेका छन् ।

प्रकाशित मिति: शनिबार, माघ २९, २०७८ ०९:०७