प्रदेश १ मा एमालेकाे आक्रामक चुनावी तयारी, केन्द्रकाे निर्देशन कुर्दै कांग्रेस

प्रदेश १ मा एमालेकाे आक्रामक चुनावी तयारी, केन्द्रकाे निर्देशन कुर्दै कांग्रेस

A+ A A-

सरकारले ३० वैशाख २०७९ मा स्थानीय तहको चुनाव गर्ने घोषणा गरेपछि प्रदेश १ का राजनीतिक दलहरू चुनाव लक्षित रणनीति बनाएर निर्वाचनको तयारीमा जुटेका छन् । ठूला राजनीतिक दलहरू निर्वाचन परिणाम आफ्नो पक्षमा पार्ने रणनीति बनाएर तल्लो तहसम्म चुनावी अभियानमा जुटेका हुन् ।

साना दलहरू भने अझै अलमलमा देखिएका छन् । २०७४ सालको चुनावमा सबैभन्दा धेरै स्थानीय तह जितेको प्रमुख प्रतिपक्षी दल नेकपा (एमाले) आफ्नो विरासत जोगाउने रणनीतिमा छ । यस्तै सत्ता गठबन्धनमा रहेका नेपाली कांग्रेस र माओवादी केन्द्र बढी सिट जित्ने योजनासहित चुनावी अभियान बनाउन जुटेका छन् । अन्य दलहरूले भने निर्वाचन केन्द्रित गतिविधिलाई अझै अघि बढाएका छैनन् ।

सर्वाेच्च अदालतको फैसलाका कारण सत्ताच्यूत भएदेखि नै एमाले जनमत सिर्जना गर्न आक्रामक ढंगले संगठन विस्तारको अभियानमा जुटेको थियो । सत्ताको नेतृत्वबाट बाहिरिने बित्तिकै एमालेले वडा तहसम्म संगठन सुदृढीकरणको अभियानलाई तीव्र पारेको थियो ।

एमाले प्रदेश १ का अध्यक्ष तुलसी न्यौपानेले आफूहरू एजेण्डासहित जनताकोबीचमा पुगिरहेकाे बताए । वडा, पालिका र जिल्ला अधिवेशन सम्पन्न गरिसकेको एमाले निर्वाचन घोषणापछि प्रदेश १ मा आफ्नो विरासत फर्काउने अभियानसहित चुनावी माहोलमा होमिएकाे अध्यक्ष न्यौपाने बताउँछन् ।

‘संविधानको कार्यान्वयन गर्न भनेर नागरिक समाज, हाम्रा जनसंगठन, पार्टीले व्यपाक रूपमा जनदबाब सिर्जना गर्याैँ । त्यही दबाबका अगाडि घुँडा टेकेर सरकार स्थानीय तहको निर्वाचन घोषणा गर्न बाध्य भयो’, उनले शिलापत्रसँग भने, ‘हाम्रो जनपरिचालन अभियान त एकवर्ष अघिदेखि नै सुरु भइसकेको थियो । हाम्रो पार्टीले जनपरिचालनसहित तल्लो तहसम्म भेला, बैठक, प्रशिक्षण, र विभिन्न योजनासहित कार्यक्रमहरू गरिरहेको छ ।’

एमालेको प्रदेशस्तरीय कार्यक्रम

अध्यक्ष न्यौपानेले निर्वाचनलाई लक्षित गरेर आगामी १ र २ फागुनमा प्रदेश राजधानी विराटनगरमा प्रदेश स्तरीय बृहत अगुवा कार्यकर्ता भेला आयोजना गरिएको जानकारी दिए । ‘अहिलेको सरकारले जसरी जनताप्रति बेइमानी र धोखाधडी गरिरहेको छ । अघिल्लो सरकारले सुरु गरेका रणनीतिक सडक योजना, थुप्रै विकास र समृद्धिका योजना खारेज गरेको छ । बजेट घटाएको छ, विकास निर्माण ठप्प छ, मुलुकको अर्थतन्त्र ध्वस्त छ, नागरिकको जिउधनको सुरक्षा छैन, त्रासदीपूर्ण वातावरण छ’, उनले भने, ‘यो सरकारले सीमाको विषयमा बोल्न सकेको छैन । कालापनी, लिुपुलेक र लिम्पियाधुरालाई हामी नेतृत्वको सरकारले नक्सामा समेटे पनि भोगाधिकारका विषयमा अहिलेको परमादेशी सरकार चुप छ । तुइन काट्दा बोल्न सक्दैन, थियोमिचोमा पनि चुप छ, राष्ट्रियताका विषयमा निरिह छ, कुटनीतिक मर्यादामा पनि झुकिरहेको छ । सरकारले जनविरोधी र राष्ट्रियता विरोधी कामहरू गरिरहेकाले यिनै विषयलाई लिएर हामी जनतामा गइरहेका छौँ ।’

‘सरकार उल्टो गतिमा हिँडिरहेको छ । यसलाई ताजा जनादेशबाट करेक्सन गर्नुपर्ने छ । हामी नयाँ निर्वाचनमा जनपरिचालनसहित जाँदैछौँ’, उनले अगाडि भने, ‘केही दल चुनावबाट भाग्न खोज्दैछन् । चुनावबाट भाग्नेलाई निर्वाचनमार्फत जनताको कठघरामा उभ्याउन बाध्य पार्छौँ । अहिले हाम्रा अरु अभियान प्रदेश, जिल्ला, पालिका, वडा र टोल तहमा पनि जारी छन् ।’

केन्द्रको निर्देशन कुर्दै कांग्रेस

यता सत्तारुढ दल नेपाली कांग्रेस भने चुनावी अभियान अघि बढाउन पार्टी केन्द्रको निर्णय कुरेर बसिरहेको छ । नेपाली कांग्रेस प्रदेश १ का सभापति उद्धव थापाले निर्वाचन केन्द्रित भएर कसरी अघि बढ्ने भनेर पार्टी केन्द्रको निर्देशन नआएको बताए । उनले केन्द्रको निर्देशन आएपछि व्यापक तयारीमा लाग्ने जानकारी दिए ।

‘सरकारले भर्खर निर्णय गरेको छ । अहिले हामी पूर्णरूपमा निर्वाचन प्रकृयामा कसरी जाने, के गर्ने भनेर लागि सकेको छैनौँ । पार्टी केन्द्रले हामीलाई निर्देशन गर्छ । त्यसपछि तयारीमा लाग्छौँ', थापा भन्छन्,‘अहिले त केवल निर्वाचन घोषणा भएको छ । निर्वाचन सम्बन्धी कार्यक्रममा अहिले कांग्रेस छैन । रणनीतिक हिसाबले अहिले नै हामीले कार्यक्रमहरू बनाइसकेका छैनौँ ।’

सभापति थापाले आगामी स्थानीय तहको निर्वाचनमा पार्टीका सबै उम्मेदवारलाई विजयी गराउने विषयमा सामान्य छलफल र सल्लाह मात्र भइरहेको बताए । ‘पार्टीका गतिविधिहरू त चलिरहेका छन्’, उनले भने, ‘चुनावमा आफ्ना उम्मेदवारलाई जिताउनुपर्छ भन्ने सरसल्लाह र कुराकानी मात्र भइरहेको छ । केन्द्रले निर्देशन नगरेसम्म यस्तै जारी रहन्छ ।’

संगठन निर्माणमा जुट्दै माओवादी केन्द्र

एमालेले जस्तै सत्ता साझेदार दल नेकपा माओवादी केन्द्रले पनि प्रदेश १ मा चुनाव केन्द्रीत कार्यक्रमहरू सुरु गरिसकेको छ । अहिले संगठन सुदृढीकरण अभियानसँगै पालिका र वडा कमिटीका भेला एवम बैठकहरू भइरहेको माओवादी केन्द्र प्रदेश १ का अध्यक्ष हर्कबहादुर नेम्वाङले बताए ।

‘संगठन विस्तार गर्ने, संगठन सुदृढीकरण गर्ने कामलाई विषेश जोड दिएर प्रदेश १ मा हामीले चुनावी कार्यक्रमलाई अघि बढाएका छौँ । जनवर्गीय संगठन, पार्टीका संगठनहरू, मोर्चा संगठनहरू, पेशागत र मोर्चा संगठनहरूलाई एकीकृत हिसाबले परिचालन गरिएको छ’, उनले भने, ‘फागुन ११ गते प्रदेश कमिटीको बैठक बस्दैछौँ । अहिले पालिका र वडा कमिटीको बैठकहरूमार्फत चुनावका कार्यक्रमहरू अगाडि बढेको छ ।’

अलमलममै साना दल

एमाले, कांग्रेस, माओवादीलगायतका दलहरूले रणनीतिक योजना बनाउँदै चुनावी अभियानमा जुटे पनि साना दलहरू भने अझै पनि अन्यौलमै रहेको देखिएको छ । अहिलेका ठूला दलहरूले संगठनको बलमा चुनाव लक्षित कार्यक्रमलाई अघि बढाए पनि स्थानीय तहमा प्रतिनिधित्वको हिसाबले साना रहेका दलहरूले अझै निर्वाचन लक्षित रणनीतिक योजना नबनाईसकेको बताएका छन् ।

जनता समाजवादी पार्टी (जसपा) प्रदेश १ का अध्यक्ष प्रविण चाम्लिङले निर्वाचनको तयारीका लागि आफ्नो पार्टीले योजना बनाउन लागेको बताए । ‘चुनावलाई तोकिएकै मितिमा र समयमै सफल बनाउनुपर्छ । तलमाथि गर्नु हुँदैन । स्थानीय चुनावमा जानका लागि हाम्रो पार्टी सशक्तरूपमा तयार छ’, उनले भने, ‘हामी अब योजना बनाउछौँ । चुनावी गतिविधि सुरु गर्ने चरणमा अब बिस्तारै लाग्छौँ ।’

यता राष्ट्रिय प्रजातन्त्र पार्टी (राप्रपा) का प्रदेश १ अध्यक्ष राम थापाले पनि भर्खरै निर्वाचन घोषणा भएकाले उचित समयमा निर्णय गरेर चुनावी अभियानमा जाने बताए । ‘चुनाव जनताको सेवा गर्ने सशक्त माध्यम हो । यो निर्वाचनलाई स्वीकारेर अघि बढ्छौँ’, उनले भने, ‘भर्खरै घोषणा भएकाले उचित समयमा निर्णय गरेर चुनावी अभियानमा जान्छौँ ।’

प्रकाशित मिति: शनिबार, माघ २९, २०७८ ११:०५