कांग्रेस कार्यसम्पादन समिति : १६ फागुनभित्रै एमसीसी पास गर्न देउवालाई दबाब, निर्वाचन घोषणाको स्वागत

कांग्रेस कार्यसम्पादन समिति : १६ फागुनभित्रै एमसीसी पास गर्न देउवालाई दबाब, निर्वाचन घोषणाको स्वागत

A+ A A-

१६ फागुनभित्रै अमेरिकी सहायता परियोजना एमसीसी पारितका लागि गठबन्धनका सहयात्रीहरूलाई मनाउन प्रधानमन्त्री तथा कांग्रेस सभापति शेरबहादुर देउवालाई पार्टी केन्द्रीय सदस्यहरूले ध्यानाकर्षण गराएका छन् । बिहीबार सानेपास्थित पार्टी कार्यालयमा बसेको केन्द्रीय कार्यसम्पादन समितिको बैठकमा धारणा राख्दै सदस्यहरूले एमसीसी पारित गर्नुपर्ने मत राखेका हुन् ।

बैठकमा बोल्दै नेताहरू बलबहादुर केसी, रामशरण महत, आनन्द ढुंगाना, शशांक कोइराला, विमलेन्द्र निधि, सुनिल थापा रमेश रिजाल लगायतका नेताहरूले एमसीसीमा कुनै पनि रणनीतिक स्वार्थ नलुकेको प्रस्ट भएकाले एमसीसी मुख्यालयले दिएको म्यादभित्रै यसलाई अघि बढाउनुपर्ने मत राखेका छन् ।

सहायताबारे सरकारले निर्णय नगर्दा दुई मुलुकबीचको विश्वसनीयतामा आँच पुग्ने र अन्तर्राष्ट्रिय सहायता रोकिन सक्ने खतरा भएकाले यसलाई अघि बढाउनैपर्ने मत सदस्यहरूले राखेका हुन् ।

बैठकमा पूर्वअर्थमन्त्रीसमेत रहेका नेता रामशरण महतले एमसीसीबारे प्रस्‍तुति दिएका थिए । 'पूर्वाधार निर्माणका लागि ठूलै अनुदान आउँदैछ, यो विषयलाई राजनीतीकरण गरेर धेरै गिजोल्दा अन्य सहयोगसमेत रोकिन सक्नेमा सचेत हुनुपर्छ । सभापतीजीकै सरकारको पालामा यसको हस्ताक्षर भएको थियो । अब उहाँले नै यसको छिनोफानो गर्नैपर्छ,' महतले ब्रिफिङ्मा भने, 'रणनीतिक स्वार्थ लुकेको भनेर अति राजनीतीकरण भइरहेको छ, यसले अन्तर्राष्ट्रिय सम्बन्धमा पनि असर गर्छ।'

उनको प्रस्तुतिपछि सभापति देउवाले एमसीसीको विषयमा भ्रम चिर्नेगरी सामाग्री बनाउन महतलाई निर्देशन पनि दिएका छन् । 'जनतालाई पनि यसको विषयमा बुझाउनुपर्छ चुनाव पनि आउँदैछ एमसीसीको भ्रम चिर्नेगरी जनतामा बाँड्ने सामाग्री बनाउनुस्,' देउवाको निर्देशन उल्लेख गर्दै नेता रमेश रिजालले भने ।

बैठकमा नेता शशांक कोइरालाले गठबन्धनको विषयमा कुनै पनि चिन्ता नगरी सरकारले एमसीसी अघि बढाउनुपर्ने प्रस्ताव गरेका छन् । कांग्रेस एक्लै निर्वाचनमा जानका निम्ति काफी रहेकाले गठबन्धनको जरुरी नरहेको उनको प्रस्ताव थियो । बैठकपछि सञ्चारकर्मीहरूसँग कुरा गर्दै कोइरालाले भने, 'एमसीसीमा कुनै पनि रणनीतिक स्वार्थ नरहेकाले यसलाई जसरी पनि अघि बढाउनुपर्ने बैठकको निष्कर्ष छ,' कोइरालाले भनेका छन्, 'कांग्रेसको आफ्नै अस्तित्व छ त्यसै अनुसार अघि बढ्नुपर्छ । एमसीसीकै कारण गठबन्धन टुट्ने कुरालाई ध्यानमा राखेर यसलाई रोकिराख्‍नुहुन्न भनेको छु।'

बैठकमा बोल्दै नेता रिजालले १६ फागुनभित्रै एमसीसी पारित गर्नुपर्ने मत आफूले राखेको बताए । 'एमसीसी पारित नहुँदा नेपालले विश्वसनीयता गुमाउँछ यसमा सबै दलको सहभागिता छ । राजनीतिक स्वार्थमा कसैले पनि बन्धक बनाउने कुरा होइन सत्ता सहयात्रीलाई प्रधानमन्त्रीको हैसियतमा कन्भिन्स गर्नुपर्छ भनेको छु,' रिजालले भने ।

यस्तै बैठकमा परराष्ट्रमन्त्रीसमेत रहेका नेता नारायण खड्काले नेपाल आफैँले यो सहयोग मागेकाले पारित गर्नुपर्ने मत राखेका छन् । 'नेपालले नै फारम भरेर बुझाएपछि अमेरिकाले दिएको सहयोग हो । आफैँले सहयोग मागेर आफैँ तिरष्कार गर्ने काम नैतिक हुँदैन, सरकारले अघि बढाउनैपर्छ,' उनले बैठकमा भनेका थिए ।

कार्यसम्पादन समितिको बैठकमा बोल्दै नेता सुनिलबहादुर थापाले एमसीसीमा सबै राजनीतिक दलको सहभागिता रहेकाले यसलाई धेरै गिजोल्न नहुने मत राखेका थिए । 'यो सम्झौतामा हस्ताक्षर गर्ने निर्णय मन्त्रिपरिषद्ले गर्दा कांग्रेस, माओवादी केन्द्र राप्रपा, राप्रपा नेपाल,संघीय समाजवादी सबैको स्वीकृति थियो,' आफ्नो भनाइबारे थापाले भने, 'नेकपाको सरकार हुँदा केपी ओलीले पनि अघि बढाउन खोज्नुभएको हो । सबै राजनीतिक दल निर्णय तहमा सहभागी छन् अब यसलाई कसैले पनि स्वार्थ अनुकुल व्याख्या गर्न मिल्दैन । अमेरिकाको डेडलाइनभित्रै पारित गरौँ ।'

निर्वाचनको स्वागत भ्रातृ संगठनको अधिवेशन निर्वाचनपछि

बैठकमा बोल्ने नेताहरूले ३० वैशाखमा स्थानीय चुनाव गर्ने निर्णयलाई स्वागत गरेका छन् । यस्तै भ्रातृ संगठनको अधिवेशन भने निर्वाचनपछि गर्दा उत्तम हुने सुझाव नेतृत्त्वलाई दिएको नेताहरूले जानकारी दिए । 'भ्रातृ संगठनमा नयाँ तदर्थ समिति बनाउने विषयमा छलफल भइरहेको छ,' नेता कोइरालाले भने ।

यस्तै नेता रिजालले चुनावको समयमा समग्र पार्टीलाई एकतावद्ध रुपमा परिचालन गर्न भ्रातृ संगठनलाई चलायमान बनाउने विषयमा निर्णयका लागि नेतृत्त्वको ध्यानाकर्षण गराइएको बताए । 'महाधिवेशनले तीनै तहमा आफ्नो नेतृत्त्वको सरकारको नीति पारित गरेकाले त्यसलाई कार्यान्वयन गर्न पार्टी पंक्ति एकढिक्का भएर मैदानमा जानुपर्छ । भ्रातृ संगठनलाई पनि चलायमान बनाउन निर्णय लिनुपर्ने अवस्था छ,' उनले भनेका थिए ।

पाँच भ्रातृ संगठनका अध्यक्ष कांग्रेसको केन्द्रीय समितिमा पुगेसँगै ती संगठन नेतृत्वविहीन भएका छन् । नेपाल महिला संघ, नेपाल तरुण दल, नेपाल विद्यार्थी संघ, नेपाल दलित संघ र नेपाल मुस्लिम संघका अध्यक्ष कांग्रेस केन्द्रीय सदस्य भएपछि विधानत: यी भ्रातृ संगठन नेतृत्वविहीन भएका हुन् ।

कार्यसम्पादन समितिको बैठक एमसीसी, निर्वाचन र भ्रातृ संगठनको अधिवेशनमा केन्द्रित छ । बैठक शुक्रबार दिउँसो २ बजे पनि बस्दैछ ।

प्रकाशित मिति: बिहीबार, माघ २७, २०७८ १९:२३