कांग्रेसका भ्रातृ संगठनमा रिक्तता, नयाँ नेतृत्व वा पुरानै समितिलाई निरन्तरता दिनेबारे भोलि निर्णय हुने

कांग्रेसका भ्रातृ संगठनमा रिक्तता, नयाँ नेतृत्व वा पुरानै समितिलाई निरन्तरता दिनेबारे भोलि निर्णय हुने

A+ A A-

पाँच भ्रातृ संगठनका अध्यक्ष माउ पार्टी कांग्रेसको केन्द्रीय समितिमा पुगेसँगै ती संगठन नेतृत्वविहीन भएका छन् । नेपाल महिला संघ, नेपाल तरुण दल, नेपाल विद्यार्थी संघ, नेपाल दलित संघ र नेपाल मुस्लिम संघका अध्यक्ष कांग्रेस केन्द्रीय सदस्य भएपछि विधानत: यी भ्रातृ संगठन नेतृत्वविहीन भएका हुन् ।

भ्रातृ संगठनको पुरानै नेतृत्वलाई निरन्तरता दिने वा नयाँ चयनको प्रक्रिया अघि बढाउने भन्ने विषयमा बिहीबारको केन्द्रीय कार्यसम्पादन समितिले निर्णय लिने महामन्त्री गगन थापाले बताए । 'हामीले हाम्रो भ्रातृ संस्थालाई चलायमान बनाउनुपर्ने अवस्था छ । यसअर्थमा नयाँ नेतृत्वको प्रक्रिया आरम्भ कसरी गर्ने भन्ने विषयमा छलफल गरेर हामी निर्णय लिनेछौँ,' उनले भने ।

कांग्रेस विधानको धारा ४२ ले भ्रातृ संघको कार्यसमितिका पदाधिकारी वा सदस्य पार्टीको कार्यसमितिमा निर्वाचित वा मनोनीत हुँदा भ्रातृ संघको पद स्वत: निष्क्रिय हुने उल्लेख छ । १४औँ महाधिवेशनबाट नेपाल विद्यार्थी संघका अध्यक्ष राजीव ढुंगाना, नेपाल तरुण दलका अध्यक्ष जीतजंग बस्नेत र नेपाल मुस्लिम संघका अध्यक्ष अब्दुल सत्तार केन्द्रीय सदस्यमा निर्वाचित भएका थिए । यता नेपाल महिला संघकी अध्यक्ष उमा रेग्मी र नेपाल दलित संघका महाधिवेशन आयोजक समितिका संयोजक मीन विश्वकर्मालाई सभापति शेरबहादुर देउवाले केन्द्रीय सदस्यमा मनोनीत गरेसँगै पद रिक्त भएको हो ।

कांग्रेसको विधानको धारा ४२ ले भ्रातृ संघको परिकल्पना गरेको छ । त्यसअनुसार पार्टीको आदर्श, उद्देश्य र सिद्धान्तलाई मान्ने वर्गीय वा अन्य रचनात्मक क्रियाकलापमा संलग्न संस्थालाई केन्द्रीय कार्य समितिमार्फत निर्णय गर्दै भ्रातृ संघको मान्यता दिइने व्यवस्था छ । कांग्रेसले १३ संस्थालाई भ्रातृ संगठनको मान्यता दिएको छ । तीमध्ये नेपाल भूतपूर्व सैनिक संघ र नेपाल राष्ट्रिय मगर संघबाहेक अन्य ११ वटा भ्रातृ संघलाई म्याद थप्दै सक्रिय बनाइरहेको छ ।

कांग्रेस सह-महामन्त्री फरमुल्लाह मन्सुर भ्रातृ संगठनलाई चलायमान बनाउन नयाँ नेतृत्व चयनबारे पार्टीले निर्णय लिनैपर्ने बताए । 'अब सबै पार्टी पंक्तिलाई निर्वाचनमा केन्द्रित गराउनुपर्नेछ । नेतृत्व चयन नहुँदा विभिन्न तहमा असन्तुष्टि देखा पर्न सक्छ,' मन्सुरले भने, 'बिहीबारको बैठकले यसमा केही न केही निर्णय लिनेछ ।'

म्‍याद सकिएका भ्रातृ संगठनको अधिवेशन र जिल्ला अधिवेशनबारे पदाधिकारीमा अनौपचारिक छलफल भइरहेको सह-महामन्त्री बद्री पाण्डेले बताए । 'चुनावअघि महाधिवेशन गरेर भ्रातृ संगठनलाई चुनावमा चलायमान गराउने वा तदर्थ समिति गठन गर्ने भन्ने प्रस्तावमा अनौपचारिक छलफल भइरहेको छ । कार्यसम्पादन समितिमार्फत निष्कर्षमा पुगिनेछ,' उनले भने ।

बिहीबारको बैठकले टुंगो लगाउन नसके पदाधिकारीबीच छलफल गरेर उचित निष्कर्ष निकाल्ने तयारी रहेको पाण्डेले बताए । कार्यसम्पादन समितिको बैठकमा सरकारको समीक्षा, स्थानीय चुनाव, क्रियाशील सदस्यता विवादको निरुपण, जिल्ला अधिवेशन, भ्रातृ संगठनलगायतका विषयमा छलफल गर्ने एजेण्डा तय भएको छ ।

प्रकाशित मिति: बुधबार, माघ २६, २०७८ १६:४९