२६ माघमै संसदमा एमसीसी लैजान दबाब बढाउँदै देउवा, खोजे सभामुख र एमालेको साथ

A+ A A-

आगामी संसद बैठकमा अमेरिकी सहायता परियोजना एमसीसी प्रस्ताव अघि बढाउन खोजेका प्रधानमन्त्री शेरबहादुर देउवाले सभामुख र एमालेलाई एमसीसी प्रस्तावमा सहयोगका लागि आग्रह गरेका छन् ।

राष्ट्रिय सहमतिबिना एमसीसी प्रस्ताव अघि नबढाउने अडानमा रहेका सभामुख अग्निप्रसाद सापकोटालाई उनले कानुनमन्त्री दिलेन्द्र बडूमार्फत् सहयोगको आग्रह गरेका छन् भने प्रमुख प्रतिपक्षी एमालेका अध्यक्ष केपी ओलीसँग बालुवाटारमा आफैँले छलफल गरेका हुन् ।

बालुवाटारमा एमाले अध्यक्ष ओलीलाई प्रधानमन्त्री शेरबहादुर देउवाले एमसीसी पास गर्नका लागि सहयोग गर्न आग्रह गरेका थिए । जबाफमा ओलीले प्रतिनिधिसभाभित्र एमालेले विरोध जनाउनुपर्ने अवस्थाको अन्त्य नभएसम्म एमसीसीमा सहयोग गर्न नसकिने बताएका छन् ।

माओवादी केन्द्रका अध्यक्ष पुष्पकमल दाहाल प्रचण्डसमेत उपस्थित बैठकमा प्रधानमन्त्री देउवाले एमसीसी पास गर्न ओलीको सहयोग खोजेका हुन् । 'संसदबाट एमसीसी पारित गर्नुपर्‍यो । बैठक चल्न दिएर प्रस्ताव अघि बढाउन सहयोग गर्नुस्,' देउवाले ओलीलाई आग्रह गरेका थिए ।

प्रधानमन्त्रीको आग्रहपछि ओलीले प्रतिनिधिसभामा अवरोधको स्थिति सभामुख सापकोटाको पूर्वाग्रही व्यवहारले आएकाले सापकोटाले आफ्नो गल्ती सच्याउनुपर्ने वा मार्गप्रशस्त गर्नुपर्ने अडान लिएका थिए । 'संसदमा गैरसांसद राखेर बैठक चलाउन नमिल्ने प्रतिनिधिसभाको नियमावलीमा प्रष्टै छ । सदन सञ्चालनको जिम्मेवारी सरकारको पनि भएकाले सभामुखको गल्ती सच्याउन पहल गर्नुपर्‍यो । अन्यथा उहाँलाई मार्गप्रशस्त गर्न भन्नुपर्‍यो,' ओलीको भनाई उद्दृत गर्दै एमाले महासचिव शंकर पोखरेलले भने, 'प्रतिनिधिसभामा एमालेको अवरोध अन्त्य हुने स्थिति नआएसम्म संसदको कुनै पनि प्रस्तावमा एमालेले सहयोग गर्न सक्दैन ।'

बैठकपछि सञ्चारकर्मीसँग एमाले महासचिव शंकर पोखरेल । तस्वीर : सुशील श्रेष्ठ/शिलापत्र

प्रधानमन्त्री देउवाले कानुनमन्त्री बडूमार्फत् सभामुख सापकोटालाई पनि प्रस्ताव अघि बढाउने विषयमा सहयोगको लागि आग्रह गरेका छन् । आइतबार प्रधानमन्त्रीको सन्देश बोकेर कानुनमन्त्री बडू संसद सचिवालय पुगेका थिए । उनले सभामुख सापकोटलाई एमसीसी टेबुल गर्ने वातावरण बनाउन आग्रह गरेको शिलापत्रलाई बताए । 'कार्यव्यवस्था परामर्श समितिको बैठक बोलाएर यस प्रस्तावको विषयमा छलफल गर्न र प्रस्ताव अघि बढाउने वातावरण बनाउने सन्दर्भमा सम्माननीय सभामुखसँग छलफल भयो,' उनले भने ।

मन्त्री बडूलाई सभामुख सापकोटाले यस विषयमा आफू पनि कानुनी परामर्शमै रहेको जानकारी गराएका छन् ।

एमसीसीका लागि दबाब बढाउँदै देउवा

प्रधानमन्त्री शेरबहादुर देउवाले एमसीसी अघि बढाउन दबाब बढाएका छन् । एमसीसीको विषयमा अलग-अलग अभिव्यक्ति दिइरहेका माओवादी केन्द्रका अध्यक्ष प्रचण्डमाथि दबाब सिर्जना हुने गरी प्रचण्डले समेत हस्ताक्षर गरेको ६ बुँदे प्रतिबद्धता पत्र सार्वजनिक भएको छ । उक्त पत्र बालुवाटारले सार्वजनिक गरेको माओवादी नेताहरूले बताएका छन् ।

ग्लास्गो सम्मेलनबाट फर्केन क्रममा त्रिभुवन विमानस्थलमा १८ कात्तिकमा प्रचण्डले एमसीसी पास गर्न सहयोग गर्ने पत्र पठाएको अभिव्यक्ति देउवाले दिएका थिए । उक्त प्रतिबद्धता पत्र बाहिरिएपछि प्रचण्डले देउवासँग फोन संवादमार्फत नै असन्तुष्टि पोखेका छन् । पार्टीको निर्णयविपरीत प्रतिबद्धता पत्र पठाएपछि प्रचण्डमाथि पार्टीभित्रै विचलनको आरोपसमेत लागेको छ ।

माओवादी केन्द्रका नेताहरूले उक्त पत्रबाट भ्रममा नपर्न भन्दै कार्यकर्तालाई आग्रह समेत गरेका छन् । पत्रबारे माओवादी केन्द्रका प्रमुख सचेत देव गुरुङ भन्छन्, 'यो पत्र पठाउने कुरा नै गलत थियो । पाँच दलीय सहमतिमा अघि बढाउने विषयमा दुई दलका नेताको हस्ताक्षरसहित पत्र पठाउनुपर्ने कारण थिएन । अर्थ मन्त्रालयको कर्मचारीले पत्राचार गर्दा पुग्ने विषयमा सामान्य पोर्टफोलियो पनि ख्याल भएन । अध्यक्ष प्रचण्डमा कार्यशैलीगत विचलन देखियो ।'

प्रधानमन्त्रीको आग्रहविपरीत प्रचण्डको प्रस्ताव

बालुवाटारको बैठकमा प्रचण्डले चुनावअघि एमसीसी पास नगर्ने विषयमा सबै दलबीच सहमति हुनुपर्ने प्रस्ताव अघि बढाएका छन् । 'यो विषयप्रति जनमानसमा राम्रो सन्देश छैन । चुनावअघि यसलाई अघि बढाउने प्रयत्न नगर्नु नै सबैको हितकर छ,' प्रचण्डले बैठकमा भनेका थिए, 'चुनावअघि यो प्रस्ताव नलाने विषयमा सहमति गरौँ ।'

प्रधानमन्त्रीको आग्रहविपरीत आएको प्रचण्डको प्रस्तावलाई एमाले अध्यक्ष केपी शर्मा ओलीले अनैतिक भनेका छन् । अन्तर्राष्ट्रिय सवालमा सत्ता गठबन्धनले द्वैध चरित्र देखाएको भन्दै ओलीले एमसीसीको विषयमा सत्ता गठबन्धन अनिर्णीत हुनु नहुने र गठबन्धनका नेताहरूले विरोधाभासी अभिव्यक्ति बन्द गर्नुपर्ने बताएका थिए ।

'जनतासँग एउटा कुरा र अन्तर्राष्ट्रिय समुदायसँग अर्को कुरा गरेर सत्ता गठबन्धनका नेताहरूले द्वैध चरित्र देखाइरहनुभएको छ । एमसीसीको विषयमा गठबन्धनभित्रै विरोधभास हुनु अनैतिक कुरो हो,' बैठकमा ओलीको भनाइ उद्धृत गर्दै एमाले महासचिव शंकर पोखरेलले भने, 'प्रधानमन्त्रीय पद्धतिमा अन्तर्राष्ट्रिय मामिलामा सत्ता गठबन्धनभित्रै विरोधाभास कुरा हुनु लोकतन्त्रका लागि सुखद होइन । एउटा अन्तर्राष्ट्रिय सहयोगको विषयमा सरकार अनिर्णीत बनिराख्न मिल्दैन ।'

एमसीसीका विषयमा सत्ता गठबन्धनले निर्णय लिएपछि एमालेले आफ्नो आधिकारिक धारणा बनाउने पोखरेलले बताए ।

यता सरकारका प्रवक्ता ज्ञानेन्द्रबहादुर कार्कीले पनि बैठकमा भिन्न दृष्टिकोण प्रस्तुत भएको बताएका छन् । 'एमसीसीको सवालमा विभिन्न दृष्टिकोणबाट छलफल भए पनि यसलाई निष्कर्षमा पुर्‍याउनका निम्ती सकरात्मक ढंगले छलफल भएको छ । अब सबै दलसँग प्रधानमन्त्रीले फेरि पनि छलफल गर्नुहुनेछ,' कार्कीले भने ।

ज्ञानेन्द्रबहादुर कार्की । तस्वीरः सुशील श्रेष्ठ/शिलापत्र

प्रधानमन्त्री देउवा एमसीसीलाई अघि बढाउने विषयमा दृढ रहेको कार्कीले बताए । 'प्रधानमन्त्रीले एमसीसी अघि बढाउने विषयमा पहल गर्नुभएको छ । मैले यहाँहरूलाई निवेदन गरेँ एमसीसीको भ्रम र आशंका छिट्टै निवारण भएर यो अनुदान कार्यान्वयनमा जान्छ ।'

प्रधानमन्त्री देउवाले एमसीसीकै विषयमा गठबन्धनमा छिट्टै छलफल गर्ने मन्त्री कार्कीले बताए ।

प्रकाशित मिति: आइतबार, माघ २३, २०७८ २०:१७