प्रदेश १ मा मन्त्रालय फुटाएर मन्त्रिपरिषद् विस्तार, शपथकाे तयारी

A+ A A-

प्रदेश १ को मन्त्रिपरिषद्ले आज पूर्णता पाउने भएको छ । सत्ता गठबन्धनमा रहेका दलहरूबीच भागबण्डामा सहमति जुटेपछि मुख्यमन्त्री राजेन्द्र राईले मन्त्रिपरिषद् विस्तार गर्न लागेका हुन् । प्रदेश १ को सत्ता गठबन्धनमा नेपाली कांग्रेस, मओवादी केन्द्र, नेकपा (एस), जनता समाजवादी र संयुक्त लोकतान्त्रिक राष्ट्रिय मञ्च छन् ।

श्राेतका अनुसार गठबन्धनमा रहेकाे नेपाली कांग्रेसले अहिले रहेको मन्त्रालयसहित पाँच, माओवादी केन्द्रले तीन र एकीकृत समाजवादीले मुख्यमन्त्रीसहित तीन मन्त्रालय लिने सहमति जुटिसकेको छ । आइतबार नियुक्त हुने मन्त्रीहरूको बिहान ११ बजेपछि शपथको तयारी भइसकेको श्राेतले जनाएको छ ।

१५ कात्तिकमा विश्वासको मत प्राप्त गर्न सक्ने अवस्था नहुँदा तत्कालीन मुख्यमन्त्री भीम आचार्यले राजीनामा दिएपछि त्यसको भोलिपल्ट (१६ कात्तिकमा) राई मुख्यमन्त्रीमा नियुक्त भएका थिए । मुख्यमन्त्रीको शपथ लिएपछि राईले गठबन्धनमा रहेका प्रदेशसभाको दोस्रो ठूलो दल नेपाली कांग्रेसबाट दुई र अन्य दलबाट एक/एक जना गरी ६ सदस्यीय मन्त्रिपरिषद् गठन गरेका थिए ।

मुख्यमन्त्री राईले आर्थिक मामिला तथा योजना मन्त्रीमा नेकपा माओवादी केन्द्र संसदीय दलका नेता इन्द्रबहादुर आङ्बो, भौतिक पूर्वाधार विकासमन्त्रीमा नेपाली कांग्रेसका हिमाल कार्की, आन्तरिक मामिला तथा कानुनमन्त्रीमा कांग्रेसकै केदार कार्की, सामाजिक विकास मन्त्रीमा जनता समाजवादी पार्टीका नेता जयराम यादव र सोही मन्त्रालयको राज्यमन्त्रीमा संघीय लोकतान्त्रिक राष्ट्रिय मञ्चकी विष्णु तुम्बाहाम्फेलाई नियुक्त गरेका थिए ।

मुख्यमन्त्री राईले मन्त्रिपरिषद्को आकार बढाएका छन् । १६ माघमा बसेको मन्त्रिपरिषद् बैठकले मन्त्रालय फुटाएर मन्त्रिपरिषद्को आकार बढाउने निर्णय गरेको थियो ।

को–को बन्दैछन् मन्त्री ?

नेपाली कांग्रेसबाट झापाका ओमप्रकाश सरावगी, ताप्लेजुङका प्रतापप्रकाश हाङगाम, मोरङका खेशरचन्द्र थपा, मोरङकै विन्दीया कार्की र धनकुटाकी लिला सुब्बा मध्ये एक जना मन्त्री बन्ने चर्चा छ । त्यस्तै नेकपा (एस) बाट इलामकी खिनु लाङ्बा र खोटाङका राजन राई मन्त्री बन्ने टुंगो लागिसकेको श्राेतले जनाएको छ ।

माओवादी केन्द्रबाट खोटाङका रामकुमार राई र झापाका झलकबहादुर मगरको टुंगो लागेको छ । त्यस्तै माओवादी केन्द्रबाटै सुनसरीकी उमिता विश्वकर्मा र धनकुटाकी कुसुमकुमारी श्रेष्ठमध्ये एक जना मन्त्री बन्ने जनाइएको छ ।

प्रकाशित मिति: आइतबार, माघ २३, २०७८ १०:१७