प्रदेश १ को मन्त्रिपरिषद्लाई पूर्णता दिने तयारी, को-को बन्दैछन् मन्त्री ?

A+ A A-

लामो रस्साकस्सीपछि प्रदेश १ को मन्त्रिपरिषद्ले आइतबार पूर्णता पाउने भएको छ । सत्ता गठबन्धनमा आबद्ध दलहरूबीच मन्त्रालय भागवण्डामा सहमति जुटेपछि मुख्यमन्त्री राजेन्द्र राईले मन्त्रिपरिषद् विस्तार गर्न लागेका हुन् ।

प्रदेश १ को सत्ता गठबन्धनमा नेपाली कांग्रेस, मओवादी केन्द्र, एकीकृत समाजवादी, जनता समाजवादी र संयुक्त लोकतान्त्रिक राष्ट्रिय मञ्च आबद्ध छन् ।

मुख्यमन्त्री राईनिकट स्रोतका अनुसार आइतबार ११ बजेसम्म मन्त्रीपरिषद विस्तार गर्ने तयारी छ । कांग्रेसले अहिले रहेको मन्त्रालयसहित पाँच, माओवादी केन्द्रले तीन र एकीकृत समाजवादीले मुख्यमन्त्रीसहित तीन मन्त्रालय लिने सहमति जुटिसकेको छ ।

‘१२ सदस्यीय मन्त्रिपरिषद् बन्ने टुंगो लागि सकेको छ,’ मुख्यमन्त्री राईनिकट स्रोतले शिलापत्रसँग भन्यो, ‘भोलि ११ बजेसम्म मन्त्रीमण्डल विस्तार हुन्छ ।’

आइतबार नियुक्त हुने मन्त्रीहरूको शपथग्रहणको तयारी समेत भइसकेको स्रोतले जनाएको छ ।

तर, प्रदेशसभामा तीन सिट रहेको जनता समाजवादी पार्टी पनि थप एक मन्त्रालय पाउनुपर्ने दाबी गरेको छ । ‘एउटा मन्त्रालय पाउनुपर्ने हाम्रो पनि दाबी छ,’ सामाजिक विकासमन्त्रीसमेत रहेका जसपा संसदीय दलका नेता जयराम यादवले शिलापत्रसँग भने, ‘मुख्यमन्त्रीले गठबन्धनलाई मिलाएर लानुपर्छ । अब हेरौँ के हुन्छ ।’

१५ कात्तिकमा विश्वासको मत प्राप्त गर्न सक्ने अवस्था नहुँदा तत्कालीन मुख्यमन्त्री भीम आचार्यले राजीनामा दिएपछि त्यसको भोलिपल्ट (१६ कात्तिकमा) राई मुख्यमन्त्रीमा नियुक्त भएका थिए । मुख्यमन्त्रीको शपथ लिएपछि राईले गठबन्धनमा आबद्ध कांग्रेसबाट दुई र अन्य दलबाट एक/एक जना गरी ६ सदस्यीय मन्त्रिपरिषद् गठन गरेका थिए ।

मुख्यमन्त्री राईले आर्थिक मामिला तथा योजना मन्त्रीमा नेकपा माओवादी केन्द्र संसदीय दलका नेता इन्द्रबहादुर आङ्बो, भौतिक पूर्वाधार विकासमन्त्रीमा नेपाली कांग्रेसका हिमाल कार्की, आन्तरिक मामिला तथा कानुन मन्त्रीमा कांग्रेसकै केदार कार्की, सामाजिक विकासमन्त्रीमा जनता समाजवादीका जयराम यादव र सोही मन्त्रालयको राज्यमन्त्रीमा संघीय लोकतान्त्रिक राष्ट्रिय मञ्चकी विष्णु तुम्बाहाम्फेलाई नियुक्त गरेका थिए ।

मुख्यमन्त्री राईले मन्त्रिपरिषद्को आकार विस्तार गर्दै १२ सदस्यीय बनाउन लागेका हुन् । १६ माघमा बसेको मन्त्रिपरिषद् बैठकले मन्त्रालय फुटाएर मन्त्रिपरिषद्को आकार बढाउने निर्णय गरेको थियो ।

को–को बन्दैछन् मन्त्री ?

आइतबार विस्तार हुने मन्त्रीमण्डलमा नेपाली कांग्रेसबाट झापाका ओम प्रकाश सरावगी, ताप्लेजुङका प्रताप प्रकाश हाङगाम, मोरङका खेशर चन्द्र थपा, मोरङकै विन्दीया कार्की र धनकुटाकी लिला सुब्बामध्ये एक जना मन्त्री बन्ने चर्चा छ ।

त्यस्तै एकीकृत समाजवादीबाट इलामकी खिनु लाङ्बा र खोटाङका राजन राई मन्त्री बन्ने टुंगो लागिसकेको स्रोतले जनाएको छ ।

माओवादी केन्द्रबाट खोटाङका रामकुमार राई र झापाका झलकबहादुर मगरको चर्चा छ । त्यस्तै सुनसरीकी उमिता विश्वकर्मा र धनकुटाकी कुसुम कुमारी श्रेष्ठमध्ये एक जना मन्त्री बन्ने जनाइएको छ ।

प्रकाशित मिति: शनिबार, माघ २२, २०७८ २२:१८