२६ माघमा एमसीसी प्रस्ताव टेबुल गर्न देउवाको जोडबल, प्रतिपक्षीसँग पनि छलफल गर्ने

२६ माघमा एमसीसी प्रस्ताव टेबुल गर्न देउवाको जोडबल, प्रतिपक्षीसँग पनि छलफल गर्ने

A+ A A-

प्रधानमन्त्री शेरबहादुर देउवाले २६ माघमा बस्ने संसद बैठकमा अमेरिकी सहायता परियोजना एमसीसी प्रस्ताव टेबुल गर्न जोडबल गरेका छन् । बालुवाटारमा आन्तरिक परामर्श गर्दै देउवाले २६ गतेको संसदमा प्रस्ताव अघि बढाउने विषयमा जोड गरेका हुन् ।

देउवाले बिहीबार साँझ गृहमन्त्री बालकृष्ण खाँण, सञ्चार तथा सूचना प्रविधिमन्त्री ज्ञानेन्द्रबहादुर कार्की र कांग्रेस सचेतक पुष्पा भुसालसँग छलफल गरेका हुन् । छलफलमा देउवाले सदनको अवरोध हटाउन र प्रस्ताव अघि बढाउने विषयमा आफूले पनि निर्णायक पहल थाल्ने भन्दै अन्य पार्टीसँग परामर्श गर्ने जिम्मेवारी मन्त्रीद्वय खाँण र कार्कीलाई दिएका छन् ।

मन्त्री खाँणले एमसीसीकै विषयमा बुधबार एकीकृत समाजवादीका अध्यक्ष माधवकुमार नेपालसँग परामर्श गरेका थिए । यता मन्त्री कार्की र कांग्रेस उपसभापति पूर्णबहादुर खड्काले पनि माओवादी केन्द्रका अध्यक्ष पुष्पकमल दाहाल 'प्रचण्ड'सँग छलफल गरेका थिए ।

प्रचण्ड र नेपाल कार्यदलको सुझावअनुसार एमसीसी अघि बढाउनुपर्ने पक्षमा छन् । उनीहरूले एमसीसी अघि बढाउँदा कार्यदलले दिएको मौखिक सुझावलाई ध्यानमा राख्न पनि प्रधानमन्त्री देउवासँग बुधबार भएको छलफलमा ध्यानाकर्षण गराएका थिए । एमसीसीकै कारण गठबन्धन भत्किने परिस्थिति आउन नदिन दुबै नेताको देउवालाई जोड थियो ।

गठबन्धनका नेताहरूले तत्काल एमसीसी अघि बढाउँदा चुनावी नतिजा प्रभावित हुनसक्ने तर्फ देउवालाई सचेत गराइरहेका छन् । यता देउवाले गठबन्धन प्रति आफू प्रतिबद्ध रहेको आश्वासन दिँदै एमसीसीका सवालमा प्रधानमन्त्रीका रूपमा आफ्नो बाध्यतालाई बुझेर सहयोग गर्न आग्रह गरेका थिए ।

बुधबार गठबन्धनमा आबद्ध माओवादी केन्द्र र एकीकृत समाजवादीका अध्यक्षसँग छलफल गरेका देउवाले बिहीबार आन्तरिक परामर्श गरेका हुन् । बैठकमा प्रधानमन्त्री देउवाले एमसीसी अघि बढाउने विषयमा नै जोड दिएको बैठकमा सहभागी कांग्रेस सचेतक भुसालले बताइन् ।

'प्रधानमन्त्रीले एमसीसीलाई विगतदेखि नै प्राथामिकता दिनुभएको हो । अहिले पनि उहाँले यही एजेण्डालाई प्राथामिकतामा राख्नुभएको छ । २६ गतेको सदनमा प्रस्ताव लाने र संसदलाई प्रभावकारी रूपमा सञ्चालन गर्ने सेरोफेरोमा कुरा भएको छ,' भुसालले भनिन् ।

एमसीसीका सन्दर्भमा सभामुख अग्निप्रसाद सापकोटाले राष्ट्रिय सहमतिबिना अघि नबढाउने अडान लिइरहेका छन् । सरकारको प्रस्ताव अघि बढाउनका निम्ती सभामुखसमेत बाधक बन्ने देखेपछि प्रधानमन्त्री देउवाले सभामुखसँग पनि परामर्श गर्ने तयारी गरेका छन् ।

'आगामी बैठकमा नै यो प्रस्ताव अघि बढाउने वातावरण तयार गर्न प्रधानमन्त्रीको निर्देशन छ । यसका लागि उहाँले पनि राजनीतिक दल, सभामुखसहित सम्बद्ध सबै पक्षसँग छलफल गर्ने भन्नुभएको छ,' बैठकमा सहभागि एक मन्त्रीले भने ।

चुनावी नतिजा प्रभावित हुने विषयमा देउवाको ध्यानाकर्षण

एमसीसी सम्झौतामा हस्ताक्षर गर्नका निम्ती १९ भदौ २०७४ मा देउवा नेतृत्वकै मन्त्रपरिषद्‍ले स्वीकृति दिएको थियो । उनी नै हाल प्रधानमन्त्री रहेको अवस्थामा अमेरिकाले देउवा स्वयंमलाई दबाब दिइरहेको छ । त्यसैले देउवाले आफ्नो बाध्यता बुझिदिन गठबन्धनमा रहेका दलहरूलाई समेत भनिरहेका छन् ।

कांग्रेसले १७ पुस २०७६ को बैठकले तत्कालीन प्रधानमन्त्री केपी शर्मा ओलीको सरकारले एमसीसी अघि बढाउन आनाकानी गरेको भन्दै कांग्रेसको केन्द्रीय कार्यसमितिको बैठकले एमसीसी अघि बढाउनैपर्ने निर्णय गरेको थियो । 'मुलुकको आर्थिक समृद्धिका लागि नेपाली कांग्रेसको नेतृत्वमा रहेको सरकारले हालसम्म सबैभन्दा ठूलो अनुदान सहयोगसम्बन्धी अमेरिकी सरकारसँग गरेको सम्झौता मिलेनियम च्यालेन्ज कर्पोरेसनलाई यो वा त्यो बहानामा अवरुद्ध बनाउन खोजिएको घटनालाई गम्भीरतापूर्वक लिँदै यो बैठक सम्झौतालाई संसदमा यथाशीघ्र पेस गर्न सरकार समक्ष माग गर्दछ,' निर्णयमा भनिएको थियो ।

अहिले एमसीसी अघि नबढेको अवस्थामा नेपाल भूराजनीतिक चपेटामा पर्ने र विकास नियोगहरूको सम्‍पूर्ण सहयोग अबरुद्ध हुने चिन्ता देउवाले गठबन्धन दलका नेताहरूसँग र आन्तरिक छलफलमा प्रकट गरिरहेका छन् ।

'विभिन्न विकास नियोगको सहयोग अबरुद्ध हुने र नेपाललाई कुटनीतिक अफ्ठ्यारो पर्ने चिन्ता सभापतिले व्यक्त गरिरहनुभएको छ । उहाँ जे हुन्छ हुन्छ टेबल गर्नुपर्छ भनिरहनुभएको छ,' कांग्रेस उपसभापति धनराज गुरुङले भने ।

१४ माघमा बसेको कांग्रेस पदाधिकारीको अनौपचारिक बैठकमा गुरुङसहितका अन्य पदाधिकारीले पनि चुनावको मुखमा एमसीसी अघि बढाए पार्टीका लागि घातक हुने सुझाव दिएका थिए । आफूले दिएको सुझावबारे गुरुङ भन्छन्, 'पदाधिकारीहरूबीचको अनौपचारिक संवादमा मैले यो प्रस्तावलाई अहिले अघि बढाउँदा पार्टीलाई नकरात्मक प्रभावपर्छ अघि नबढौँ भनेको हुँ उहाँले जे हुन्छ हुन्छ अघि बढाउँछु भन्नुभयो ।'

कांग्रेस महामन्त्री विश्वप्रकाश शर्माले एमसीसीको विषयमा तत्कालीन अवस्थामा अहिले परिस्थिति भिन्न रहेकाले पार्टीको कार्यसम्पादन समितिमा छलफल गरेर पार्टीलाई नयाँ परिस्थितिमा नयाँ मार्गनिर्देश गर्न सकिने बताउँछन् । 'पार्टीको कार्यसम्पादन समितिको बैठकको मितिको टुंगो लागेपछि एमसीसीको एजेण्डामा छलफल होला । त्यसले नयाँ परिस्थितिमा नयाँ ढंगले पार्टीलाई मार्गनिर्देशन गर्ने नै छ,' शर्माले भने ।

गत १४ गतेको बसेको केन्द्रीय कार्यसमितिको बैठकले ३७ सदस्यीय कार्यसम्पादन समिति गठन गरेको थियो । त्यसको बैठक एक साताभित्र राख्ने निर्णय भए पनि बैठक भने अझै बोलाइएको छैन । त्यस बैठकमा सरकारको समीक्षा, स्थानीय निकाय र एमसीसी, भ्रातृ संगठनको अधिवेश, क्रियाशील सदस्यको विवादको टुंगो, बाँकी रहेका स्थानमा जिल्ला अधिवेशन गर्ने लगायतका विषयमा छलफल गर्ने तयारी छ ।

प्रकाशित मिति: बिहीबार, माघ २०, २०७८ २२:०२