डेढ महिनामा राप्रपालाई कमल थापाका दुई पत्र: नयाँ पार्टी बनाउने रिहर्सल हो ?

A+ A A-

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनलाई निवर्तमान अध्यक्ष कमल थापाले दोस्रोपटक पत्र पठाए, १६ माघमा । अध्यक्ष लिङ्देनले राप्रपाको विधानअनुसार पदाधिकारी मनोनीत गरेको एकाध घण्टामा थापाले पत्रचार गरे ।

पत्रमार्फत लिङ्देनमाथि तीन आरोप लगाए । एक- पार्टीमा एकपक्षीय, पूर्वाग्रही र समावेशी मान्यताविपरीत केन्द्रीय सदस्य मनोनीत गरेको । दुई- राष्ट्रियसभा निर्वाचनमा हचुवा नीति अपनाएको । तीन- स्थानीय तह निर्वाचन तयारीमा सुस्तता देखिएको ।

थापाका यी तीन आरोपको प्रतिवाद वा जवाफ लिङ्देनले कसरी दिन्छन्, प्रस्ट छैन । डेढ महिनाअघि २७ मंसिरमा थापाले पहिलो पत्र पठाएका थिए । त्यसको जवाफ लिङ्देनले दिन नपाउँदै थापाले दोस्रो पत्र लेखे ।

थापाले अध्यक्ष लिङ्देनलाई सम्बोधन गर्दै २७ मंसिरमा पठाएको पत्रमा सैद्धान्तिक र राजनीतिक एवम् सांगठनिक विषयमाथि प्रश्न उठाएका थिए । त्यसबाहेक राप्रपाको महाधिवेशनमा निर्मल निवास र पूर्वराजा ज्ञानेन्द्र शाहको भूमिकामाथि छानबिन गर्न माग गरेका थिए । थापाका यी प्रश्नमाथि राप्रपाको पदाधिकारीमा छलफल नै नभएको भने होइन तर ठोस जवाफ तयार भइसकेको छैन ।

महामन्त्री कुन्ती शाहीको भनाइमा पहिलो पत्रमा थापाले उठाएका प्रश्नमाथि सामान्य छलफल भएको थियो तर जवाफ दिन नपाउँदै दोस्रो पत्र आयो । जवाफ नदिएकै कारण थापाले पहिलो पत्रलाई अध्यक्ष लिङ्देनले रद्दीको टोकरीमा फालिदिएको र आफूलाई योजनाबद्ध रूपमा किनारा लगाउन खोजेको आरोप दोस्रो पत्रमा लगाएका छन् ।

दोस्रो पत्रबारे अध्यक्ष लिङ्देनले राप्रपाको पदाधिकारी तहमा छलफल त परको कुरा, औपचारिक जानकारी समेत गराएका छैनन् ।

महाधिवेशन सकिएपछि थापाले दुईवटा काम निरन्तर गरिरहेका छन् । एक- सार्वजनिक रूपमा निर्मल निवास अर्थात् पूर्वराजा ज्ञानेन्द्र शाहले आफूलाई राप्रपाको अध्यक्षमा हराए भनेर स्थापित गराउन खोजेका छन् । दुई- नवनिर्वाचित अध्यक्ष लिङ्देनमाथि निरन्तर दबाब बढाएर राप्रपाभित्र शक्ति आर्जन गर्ने कोसिस गरेका छन् ।

निवर्तमान अध्यक्ष थापाले डेढ महिनामा देखाएको हर्कतले प्रस्ट पार्छ कि राप्रपाको अध्यक्षमा लिङ्देनलाई स्वीकार्न उनलाई समस्या भइरहेको छ । जस्तो, लिङ्देन अध्यक्षमा निर्वाचित भएपछि औपचारिक रूपमा बधाई दिन पनि कन्जुस्याइँ गरे, बधाईको सट्टा निर्मल निवासविरुद्ध फायर खोले ।

लिङ्देनले पदभार ग्रहण गर्दा मात्रै होइन, पहिलो केन्द्रीय कमिटी बैठकमा पनि थापा सहभागी भएनन् । यसबाट के बुझिन्छ भने थापा लिङ्देनलाई अध्यक्ष स्वीकार्न तयार छैनन् । बरु, निर्मल निवासको आलोचना गरेर गणतन्त्र पक्षधरको पनि सहानुभूति बटुल्ने प्रयत्नमा लागेको देखिन्छ ।

राप्रपाका नेताहरूको बुझाइमा थापाले निरन्तर पत्र पठाउनु र सार्वजनिक खपतका लागि निर्मल निवासको आलोचना गर्नुसँग दुईवटा उद्देश्य लुकेको देखिन्छ । एक, राप्रपाभित्रको आफ्नो पुरानो शक्ति संरचनालाई कायम राख्ने । दोस्रो, कार्यकर्ताको सहानुभूति लिने ।

अर्थात् लिङ्देनले नेतृत्व गरेपछि पदाधिकारीदेखि केन्द्रीय समितिसम्म रहेको शक्तिलाई विभाजित हुन नदिने र पटक-पटक आग्रह गर्दा पनि लिङ्देनले नै पार्टी बचाउन नसकेको सन्देश कार्यकर्तामाझ सम्प्रेषित गर्ने रणनीति थापाले अपनाएको देखिन्छ ।

राप्रपा प्रवक्ता मोहन श्रेष्ठको भनाइमा थापाले पार्टीभित्र आफू किनारामा परेको सन्देश प्रवाहित गरेर कार्यकर्ताको सहानुभूति लिनलाई पत्र व्यवहार गरेको देखिन्छ । श्रेष्ठ भन्छन्, ‘निर्मल निवासको हस्तक्षेपको कुरा उठाएर उहाँले पत्र लेख्नुभएको छ, त्यो पार्टीभित्र छलफल हुँदैन र छानबिन समिति बन्दैन भन्ने उहाँलाई पनि थाहा छ, तर पनि पत्र लेखिरहनुभएको छ ।'

थापाका यी सबै प्रयास र रणनीति भनेको अर्काे पार्टी बनाउनकै लागि भएको राप्रपाभित्र चर्चा हुने गरेको छ । राप्रपाका नेताहरूको भनाइमा थापाका अहिलेसम्मको प्रश्न अर्को पार्टी बनाउने रिहर्सलका रूपमा हुन् ।

थापाले स्थानीय निर्वाचनको सम्मुखमा नयाँ पार्टी बनाउन सक्ने आकलन राप्रपाका कतिपय नेताहरूको छ । त्यही कारण थापाले दोस्रो पत्रमा स्थानीय तहको निर्वाचनका लागि पार्टीले तयारी नगरेको आरोप लगाएका छन् ।

स्थानीय तहको निर्वाचनअघि नयाँ पार्टी बनाउने रणनीतिमा रहेका थापालाई अघोषित रूपमा पशुपतिशमशेर राणाले पनि साथ दिएको चर्चा चल्ने गरेको छ । राणा अहिले थापातिर ढल्केको देखिँदा प्रकाशचन्द्र लोहनीचाहिँ लिङ्देनलाई काँध हालेर हिँडेको देखिन्छ ।

राप्रपाकी महामन्त्री शाहीकै भनाइमा पनि राप्रपाबाट थापाले उचित जवाफ नपाए नयाँ पार्टी खोल्न सक्छन् । शाही भन्छिन्, ‘कमल थापाजस्तो राजनीतिक व्यक्ति निष्क्रिय बस्न त सक्दैनन् । त्यसैले थापालाई विकल्प खोज्न दिनुहुँदैन भनेर पार्टीभित्र लागेकी छु ।’

थापानिकट एक नेताले दिएको जानकारीअनुसार थापाले राजसंस्थाको एजेण्डा छोडेर नयाँ पार्टी बनाउने तयारी गरेका छन् । त्यसको मनशाय चाहिँ महाधिवेशन अघिदेखि नै बनेको थियो । ती नेताको दाबीमा थापाले नेतृत्व गर्ने पार्टीको एक मात्र एजेण्डा हिन्दु धर्म हुनेछ ।

थापानिकट ती नेता भन्छन्, ‘महाधिवेशन हारियो भने के गर्ने भन्ने योजनासहित निर्वाचनमा गएका थियौँ । अब थापाको नेतृत्वमा बन्ने पार्टीको एजेण्डा हिन्दु धर्म प्राथमिकतामा रहनेछ ।’ तीन नेताले भनेझैँ थापाले निरन्तर निर्मल निवासप्रति पोखेको आक्रोशले राजसंस्थाको एजेण्डा बोक्लान् भन्ने देखिँदैन । तर, राजसंस्थाको पक्षमा केही न केही मुद्दा भने थापाले बोक्ने अनुमान गर्न सकिन्छ । त्यो किन पनि गर्न सक्छन् भने राजसंस्था छोड्ने हो भने राप्रपाभित्र रहेका थापानिकट केही नेताहरूले थापालाई साथ नदिन सक्छन् ।

थापाले नयाँ पार्टी बनाउँदा राप्रपाको एउटा पंक्ति थापासँग जाने देखिन्छ । यद्यपि राप्रपा अहिले नै थापालाई विकल्प दिनुपर्छ भन्ने पक्षमा छैन । थापाले विकल्प खोज्ने माहोल सिर्जना गर्न पार्टीभित्र योजनाबद्ध रूपमा किनारामा पार्न खोजिएको भनेर पत्रमै लेखेका छन् ।

प्रवक्ता श्रेष्ठ निवर्तमान अध्यक्ष थापाको अभिभावकीय भूमिका आवश्यक रहेको बताउँछन् । श्रेष्ठ भन्छन्, ‘कमल थापाको अभिभावकीय भूमिका आवश्यक छ । त्यसैले बिनासर्त उहाँ पार्टीमा फर्किनुहोस् भन्ने चाहना हाम्रो छ, अन्य विकल्पका लागि उहाँले प्रयास गरेको हो भने त्यो सह्य हुँदैन ।’

प्रकाशित मिति: सोमबार, माघ १७, २०७८ १४:५०