बागमतीको संसदीय समितिमा गठबन्धनले उम्मेदवारी दिएन, दुवै सभापतिमा एमालेबाट मात्रै उम्मेदवारी

बागमतीको संसदीय समितिमा गठबन्धनले उम्मेदवारी दिएन, दुवै सभापतिमा एमालेबाट मात्रै उम्मेदवारी

A+ A A-

बागमती प्रदेशसभा अन्तर्गतका दुई महत्त्वपूर्ण संसदीय समितिको सभापति निर्वाचन नजित्ने निश्चित भएपछि सत्ता गठबन्धनले उम्मेदवारी नै दिएन ।

वैशाखदेखि रिक्त प्रदेशसभाको अर्थ तथा विकास समिति र पुसदेखि रिक्त शिक्षा, स्वास्थ्य तथा कृषि समिति सभापति चयन गर्न सोमबार निर्वाचन हुँदैछ । प्रदेशसभा सचिवालयका अनुसार अर्थ तथा विकास समितिको सोमबार मध्यान्ह १२ बजे र शिक्षा, स्वास्थ्य तथा कृषि समितिको दिउँसो २ बजे निर्वाचन तोकिएको छ ।

यी दुवै समितिको निर्वाचनमा सत्ता गठबन्धनका नेकपा माओवादी केन्द्र, नेपाली कांग्रेस र नेकपा (एकीकृत समाजवादी) का तर्फबाट उम्मेद्वार छैनन् । समितिको सभापति पदको प्रस्ताव दर्ता गर्ने समय आइतबार साँझ ५ बजेभित्र सभापतिमा प्रमुख प्रतिपक्षी दल नेकपा एमालेबाट मात्रै प्रस्ताव दर्ता भएको छ । सभापति पदमा एमालेबाट मात्रै प्रस्ताव दर्ता भएको प्रदेसभा सचिवालयका सचिव कृष्णहरि खड्काले शिलापत्रलाई जानकारी दिए ।

एमालेबाट अर्थ तथा विकास समिति सभापतिमा काठमाडौंका नारायणबहादुर सिलवालले प्रस्ताव दर्ता गराएका छन् । यसैगरी शिक्षा, स्वास्थ्य तथा कृषि समिति सभापतिमा काठमाडौंका केशवप्रसाद पोखरेलले प्रस्ताव दर्ता गराए ।

यसअघि अर्थ समितिको सभापति सरेश नेपाल थिए । उनी तत्कालीन एमाले सरकारमा उद्योग, पर्यटन, वन तथा वातावरण मन्त्री बनेसँगै उक्त पद रिक्त थियो । शिक्षा, स्वास्थ्य तथा कृषि समितिका सभापति घनश्याम दाहाल थिए । दहाल वर्तमान गठबन्धन सरकारमा श्रम, रोजगार तथा यातायात मन्त्री भएपछि उक्त पद रिक्त रहेको थियो ।

अर्थ र शिक्षा समितिमा गठबन्धनको बहुमत पुग्दैन् । समितिमा अल्पमत भएपछि गठबन्धन संसदीय समितिको निर्वाचनबाट पछि हटेको हो । अर्थ र शिक्षा समितिमा एमालेको बहुमत छ । २० जना सदस्य रहेको अर्थ समितिमा एमालेका १२ जना, नेकपा माओवादी केन्द्रका ४ जना, नेकपा (एकीकृत समाजवादी) का २ जना, नेपाली कांग्रेसका १ जना र विवेकशील साझा पार्टीका १ जना सदस्य रहेका छन् ।

शिक्षा समितिमा पनि एमालेका १२ जना, माओवादी केन्द्रका ३ जना, नेपाली कांग्रेसका ३ जना र नेपाल मजदुर किसान पार्टी का १ जना सदस्य छन् ।

सोमबारको निर्वाचनमा एमालेका उम्मेदवारको जित पक्का छ । दुवै समितिको सोमबार तोकिएको समयमा अनिवार्य बैठक बस्ने र बहुमतले सभापति चयन हुने प्रदेशसभा सचिवालयले जानकारी दिएको छ । बैठकमा प्रस्तावकहरूलाई उपस्थित सदस्यमध्ये ज्येष्ठ सदस्यले निर्णयार्थ प्रस्तुत गर्ने र बहुमत सदस्य संख्याले सभापति चयन हुने सचिवालयले जनाएको छ ।

सभामुखसँग असन्तुष्टि

संसदीय समितिको निर्वाचन गर्नेबारे बागमतीका सभामुख सानुकुमार श्रेष्ठसँग सत्ता गठबन्धन असन्तुष्ट बनेको छ ।

गठबन्धनले सभामुख सानुकुमार श्रेष्ठले कुनै छलफल नै नगरी समिति सभापतिको निर्वाचन राखेको आरोप लगाएको छ । सभामुख श्रेष्ठले सत्तारुढ दलहरूसँग छलफल र सहमति नगरी निर्वाचन प्रक्रिया अगाडि बढाएकाले सभापति पदमा प्रस्ताव दर्ता नगराएको अर्थ तथा विकास समिति सदस्यसमेत रहेका नेकपा माओवादी केन्द्रका युवराज दुलालले बताए।

उनले गठबन्धन निर्वाचन प्रक्रियामा पनि सहभागी नहुने बताए । ‘हामीले एक वर्षदेखि रिक्त रहेको पदमा निर्वाचन गरौँ भन्दा सभामुख आलटाल गरेर बस्नुभयो । अहिले उहाँले छलफल नै नगरी एक्कासि निर्वाचन घोषणा गरेर अघि बढ्नुभएको छ । यसमा हाम्रो असहमति छ’, दुलालले शिलापत्रसँग भने, ‘ हामी निर्वाचनमै सहभागी हुँदैनौं ।’

उनले समिति निर्माण गर्दा सहमतिमा गर्नुपर्ने भन्दै सभामुखले एकलौटी गर्न खोजेको सांसद आरोप लगाए । ‘एकलौटी गर्न उहाँहरूलाई छुट छ । यसले राम्रो सन्देश जाँदैन्,’ दुलाल भन्छन् ।

प्रकाशित मिति: आइतबार, माघ १६, २०७८ २२:११