‘पशुपतिप्रसाद’मा बाँचिरहेका चर्चित पात्र

A+ A A-

‘खगेन्द्र, पशुपतिप्रसाद रिलिज भएको छ वर्ष पूरा भएछ नि,’ शनिबार बिहान अभिनेता खगेन्द्र लामिछानेलाई फोन गर्दै निर्देशक दीपेन्द्र के खनालले सुनाए ।

दीपेन्द्रको टाइमलाइनमा छ वर्षअघिका कुरा फेसबुकले स्मरण गराएपछि उनीहरूले सम्झना साटासाट गरे । खगेन्द्रले पशुपतिप्रसाद अवतारका तस्वीर फेसबुकमा शेयर गरे । वर्षा शिवाकोटीले शेयर गर्दै लेखिन्, ‘बुनु भएर चिनिएको छ वर्ष !’

‘पशुपतिप्रसाद’ भुइँमान्छेको कथा थियो । त्यसैले प्रदर्शन भएको छ वर्ष बितिसक्दा पनि फिल्मका हरेक पात्रहरू उत्तिकै चर्चामा आइरहे । खगेन्द्रलाई पात्र पशुपतिप्रसादको निकै माया लाग्छ । सोझो, इमानदार तर दुःखी । जसले भूकम्पमा घर भत्केर आमाबुबा गुमायो । बाबुको ऋण तिर्न भनेर पैसा कमाउन काठमाडौं आयो । र, पशुपतिको घाटमा कहिले मजदुरी त कहिले कपडाको व्यापार गर्‍यो ।

‘मलाई बुढा बा–आमाहरूले उही ज्ञानी पशुपति सम्झेर माया गर्नुहुन्छ,’ खगेन्द्र सम्झन्छन् ।

शनिबार खगेन्द्रको स्मृतिमा एउटी बुढी आमाको अनुहार नाचिरहेको थियो । पशुपतिप्रसाद प्रदर्शन भएपछि उनी नाटक खेलिरहेका थिए । नाति लिएर ७० वर्षकी वृद्धा नाटक हेर्न आइन् ।

नाटक हेरिसकेपछि उनले खगेन्द्रलाई भनिन्, ‘बाबु, तपाईंको फिल्म हेरेपछि धेरै भेट्न मन लागेको थियो । मैले अहिलेसम्म नाटक हेरेको थिइनँ । पत्रिकामा तपाईंको नाटक चलिरहेको छ भनेर थाहा पाएँ । अनि नातिलाई लिएर आएँ ।’

ती आमाको आत्मीयताले खगेन्द्रलाई छोयो । ‘हामी मर्छौं होला, तर आममान्छेको स्मृतिमा यो पात्र कहिल्यै मर्ने छैन,’ खगेन्द्र भन्छन् ।

खगेन्द्रका फिल्म नछुटाई हेर्ने उनका आमाबुबाले हेर्न नचाहेको 'पशुपति प्रसाद'को एउटा दृश्य

हनुमानसँग डराउने भष्मे

पशुपतिलाई सधैँ दपेटिरहने अर्को पात्र छ– भष्मे डन । यो चरित्र फिल्म प्रदर्शनपछि सबैभन्दा धेरै प्रशंसा पाउने मध्येमा पर्छ । भष्मे डनको चरित्र निभाएका विपिन कार्कीको फिल्मी करिअर त्यसपछि उचाइमा पुग्यो । ‘मैले पशुपतिप्रसादपछि करिब १० भन्दा बढी फिल्म गरेँ । तर, मैले सबैभन्दा बढी प्रेम गर्ने पात्र नै त्यही हो,’ विपिन भन्छन् ।

उनी सानी छोरीसँग खेल्दा पनि कहिलेकाहीँ ‘भष्मे’को आवाज निकाल्छन् । उनलाई त्यो आवाज निकै प्रिय लाग्छ । सुटिङताकाका भष्मे डनमाथि रमाइला प्रसंगहरू छन् । विपिनले सुटिङ हुनुअघि कपाल खौरिएका थिए ।

जब सुटिङको तयारी हुन थाल्यो, विपिनको दबिएको आवाज सुनेर रवीन्द्र सिंह बानियाँ दंग परे । ‘विपिनले हामीसँग आउँदा दबिएको स्वरमा कुरा गरे । के भएको भनेर सोध्दा उनले घाँटी बस्यो भनेका थिए । तर पनि चिसो र चुराेट अत्यधिक खाने । सुटिङ हुने दिन आइसक्यो, स्वर बिग्रन्छ भनेर गाली पनि गरेँ । तर, उसले खान छाडेनन्,’ रवीन्द्र सुनाउँछन् ।

विपिनको आवाज नफेरिएका कारण रवीन्द्र चिन्तित थिए । तर, विपिनले दबिएको आवाज निकाल्दा निकाल्दै आफ्नो वास्तविक आवाज निकाले । रवीन्द्र छक्क परे । ‘दाइ, फिल्ममा मेरो क्यारेक्टरको आवाज यस्तै हुन्छ । कसैलाई नभन्नु है । सबैलाई आवाज नै यस्तै छ भनेर पार्नुपर्छ । नत्र मलाई सुटिङबाहिर जिस्क्याउँछन्’, उनले भनेका थिए ।

विपिनकी आमा बिरामी भएर अस्पतालमा थिइन् । उनले आमाको अगाडि पनि बारम्बार दबिएको स्वरमा कुरा गरेछन् । ‘त्यसरी बोलेपछि आमा रुनुभएछ । पछि विपिनले एक्टिङका लागि प्राक्टिस गरेको भनेर सम्झाएछन्,’ रवीन्द्र सम्झन्छन् ।

सुटिङ अवधिभर विपिनले दबिएकै आवाजमा कुरा गरे । धेरैलाई लाग्यो, उनको आवाज नै यस्तै हो । ‘फिल्मको आमा क्यारेक्टरले त आवाज सुधार्न भन्दै औषधि पनि ल्याएर खान दिनुभयो,’ रवीन्द्र सुनाउँछन् ।

दर्शकले ‘पशुपतिप्रसाद’मा सम्झिरहने अर्को पात्र हो– हनुमान । ‘हनुमान’को चरित्रमा थिए रवीन्द्र सिंह बानियाँ । भष्मे डन र हनुमानबीचको एउटा रहस्य फिल्ममा यत्तिकै छाडिएको छ ।

बेला–बेला सामाजिक सञ्जालमा ट्रोलहरू बनिरहन्छन्, ‘भष्मे डन हनुमानसँग किन डराउँछ ?’ यसको उत्तर फिल्म अवधिभर दर्शकहरूले हेरुञ्जेल पाएका हुँदैनन् ।

भष्मे डन हनुमानसँग किन डराउँछ ?

फिल्ममा हनुमानसँग भष्मे डन डराउनुको कारण खुलाउने दुईवटा सिन थिए । ‘भष्मेले हनुमान आपराधिक क्रियाकलापमा सहभागी भएको कुरा देखेको थियो । यो कुराले पनि भष्मे डराएको हुन्छ । अर्को सिनचाहिँ भष्मेले पकेट मारेको बेला हनुमानले गधाले हानेर लडाएको थियो,’ विपिन रहस्य खुलाउँछन् ।

तर, पछि निर्देशक दीपेन्द्रले यो सिन राख्न चाहनेन् । त्यसकारण फिल्म हेरिसकेपछि यसको रहस्य पर्दाबाहिरै छुट्यो ।

जब रवीन्द्रको खुट्टा ढोगियो

स्क्रिप्ट लेख्ने क्रममा रवीन्द्र पशुपतिमा क्यारेक्टर खोज्न हिँडे । उनले एउटा हनुमानको मुकुण्डो लगाएको पात्रलाई देखे । सोचे- यो पात्रको डबल मिनिङ र मेटाफोर हुन्छ ।

त्यसपछि उनले हनुमान क्यारेक्टरको विकास गरे । सुटिङ अवधिभर हनुमान बन्दाका रमाइला स्मृति उनीसँग छन् । सुटिङको समयमा हनुमानको पहिरन खोल्न र लगाउन अप्ठेरो हुन्थ्यो । उनले त्यो पहिरन र मुकुण्डो एकैपटक साँझ मात्र खोल्थे । कतिपय मान्छेले त उनलाई पैसा पो दिन थाले । ‘त्यो बेलामा १७ सय जम्मा भएछ । जुन मसँग अहिले पनि सुरक्षित छ,’ उनी हाँस्दै सुनाउँछन् । कतिले देख्नेबित्तिकै आश्चर्य पर्दै भन्थे, ‘त्याँ हेर त, नयाँ हनुमान आएछ ।’

कतिपयले त गाली गर्थे, ‘यत्रो लाठे भएर पनि मागेर खान्छन् ?’

‘जोगीहरूले माया गर्थे, किन यत्रो खर्च गरेर गधा किन्यौ, पुच्छर किन्यौ भनेर सम्झाउँथे । यहाँ केही छैन तिमी शहर पस भन्थे । कसैले खुट्टा ढोग्थे । म आफैँलाई हाँसो उठ्थ्यो त्यतिबेला,’ रवीन्द्र सम्झिन्छन् ।

सम्झिरहने बुनु

वर्षा शिवाकोटीलाई सम्झनेहरूले अहिलेसम्म पनि ‘बुनु’ भनेर चिन्छन् । पहिलो पटक देख्नेहरू भन्छन्, ‘तिमी उही बुनु हैन ।’

उनले अहिलेसम्म्म आठवटा फिल्ममा काम गरिन् । तर, वर्षालाई अहिलेसम्म सम्झाइरहने क्यारेक्टर पशुपतिप्रसादको बुनु नै बन्यो । उनको करिअरको पहिलो फिल्म हो, पशुपतिप्रसाद । फिल्ममा ‘बुनु’ बोल्न सक्दिनन् । नबोलीकनै उनको क्यारेक्टरले दर्शकलाई प्रभाव पारेको छ । ‘मैले यो क्यारेक्टरका लागि सिग्नल ल्याङ्ग्वेज नक्सालस्थित एक स्कुलमा गएर सिकेको पनि थिएँ,’ वर्षा सम्झिन्छिन् ।

उनलाई लागेको थिएन कि फिल्म प्रदर्शनपछि यति धेरै प्रतिक्रिया आउँछ । पहिलो पटक भेट्दा एक जना महिलाले दिएको प्रतिक्रिया वर्षा सम्झिरहन्छिन्, ‘तपाईं साँच्चै बोल्न सक्नुहुन्न भन्ने ठानेको थिएँ, तर बोल्नु पो हुँदोरहेछ ।’

वर्षा त्यतिबेला निकै खुसी भएकी थिइन् ।

त्यसैगरी ‘मित बा’को भूमिकामा देखिएका प्रकाश घिमिरेलगायत अन्य क्यारेक्टर पनि दर्शकका लागि सम्झनालायकका र अर्थपूर्ण छन् ।

अब 'पशुपतिप्रसाद'को सिक्वेल

पशुपतिप्रसाद व्यावसायिक हिसाबमा मात्र हैन, फिल्म समीक्षकको दृष्टिकोणमा पनि सफल हुन पुग्यो । फिल्म निर्देशक दीपेन्द्र के खनाल यसको फिल्मको सिक्वेल बनाउने तयारीमा छन् ।

यसका लागि खगेन्द्र र दीपेन्द्र स्क्रिप्टमा काम गरिरहेका छन् । ‘हामीले धेरै पटक स्क्रिप्ट लेखिसक्यौँ । अब छिट्टै फाइनल गर्दैछौँ । फिल्मको घोषणा गर्ने दिन पनि अब चाँडै आउनेछ,’ दीपेन्द्र भन्छन् । तर, सिक्वेल बनाउने कुरामा आफूहरू निकै सचेत रहेको उनी बताउँछन् ।

‘सिक्वेल बनाएर मात्र हुन्न । यसको लिगेसी बचाउनुपर्‍यो । व्यावसायिक लाभका लागि सोचेको थियौँ भने उहिल्यै बनाउँथ्यौँ,’ उनी भन्छन्, ‘त्यसकारण लामो समयदेखि तयारी गरिरहेका छौँ ।’

फिल्ममा पशुपतिप्रसादको मृत्यु भइसकेको छ । त्यसो भए लिड क्यारेक्टर को त ? दीपेन्द्र भन्छन्, ‘अब फिल्ममा लिड क्यारेक्टर भष्मे डनको हुन्छ । हामीले भष्मेलाई केन्द्रमा राखेर स्क्रिप्ट लेखिरहेका छौँ ।’

प्रकाशित मिति: आइतबार, माघ १६, २०७८ १९:५६