गण्डकी प्रदेशबाट सत्ता गठनबन्धनका तीनै उम्मेदवार विजयी

A+ A A-

राष्ट्रियसभा निर्वाचनअन्तर्गत गण्डकी प्रदेशमा गठबन्धनका उम्मेदवार विजयी भएका छन् । बुधबार तीन पदका लागि भएको निर्वाचनमा तीनै जना गठबन्धनका उम्मेदवार विजयी भएका हुन् ।

गठबन्धनका उम्मेदवार महिलातर्फ कमला पन्त, दलितमा भुवनबहादुर सुनार, अन्यमा सुरेश आलेमगर विजयी भएका छन् । पन्त कांग्रेसकी हुन् भने सुनार र आलेमगर माओवादीका हुन् । चुनावमा एमालेका उम्मेदवार महिलातर्फ लीला थनेत, दलितमा अर्जुनकुमार सुनाम र अन्यमा पुण्यप्रसाद पौडेल प्रतिस्पर्धामा थिए ।

गण्डकीमा गठबन्धनसँग स्थानीय तहतर्फ ९९ र प्रदेशमा ३१ जना जनप्रतिनिधि थिए । त्यस्तै एमालेसँग स्थानीय तहमा ७० र प्रदेशमा २७ सांसद थिए । अन्तिम मत परिणामअनुसार स्थानीय तहमा गठबन्धनको धेरै मत क्रस भएको छ भने दुई जना प्रदेश सांसदले पनि एमाले उम्मेदवारलाई मत हालेका छन् ।

कसले कति मत पाए ?

महिला क्लस्टरमा कांग्रेसकी कमला पन्तले प्रदेशमा २९ जनाको मत पाइन् । उनीसँगै प्रतिस्पर्धामा रहेकी एमालेकी लीला थनेतले पनि २९ जनाको मत पाइन् । ५९ मतदाता रहेकोमा एउटा मतपत्र खाली थियो । स्थानीय तहमा एक सय ६८ मत खसेकोमा पन्तले ९४ र थनेतले ७४ मत पाइन् ।

दलित क्लस्टरमा पनि दुवै उम्मेदवारले प्रदेशसभाका समान २९÷२९ मत पाएका छन् । स्थानीय तहतर्फ सो क्लस्टरमा भुवन सुनारले ९२ र अर्जुनकुमार सुनामले ७४ मत पाए । दुई जनाले कसैलाई पनि मत हालेनन् ।

अन्य क्लस्टरमा ५९ प्रदेशसभा सदस्यमध्ये ३० जनाले गठबन्धनका सुरेश आले मगरलाई मत हाले । त्यस्तै एमालेका पुण्य पौडेललाई २८ जनाले मत दिएका छन् । एक जना सांसदले कुनै पनि क्लस्टरमा कसैलाई मत दिएनन् । यो क्लस्टरमा स्थानीय तहका जनप्रतिनिधिमध्ये ९२ जनाले आलेमगर र ७५ जनाले पौडेललाई मत दिए । एक जना जनप्रतिनिधिले कसैलाई मत दिएनन् ।

पोखरामा बुधबार भएको मतदानअन्तर्गत कुल दुई सय २९ मतदाता रहेकोमा दुई जना मतदानमा सहभागी भएनन् । एमाले र राप्रपाका एक–एक जना मतदानमा सहभागी नभएका हुन् ।

गण्डकीमा स्थानीय तह प्रमुख र उपप्रमुख एक सय ७० र प्रदेशसभा सदस्य ५९ गरेर दुई सय २९ जना मतदाता थिए । प्रदेश सांसद सबैले मतदान गरे । मुस्ताङको लो–घेकर दामोदरकुण्ड गाउँपालिकाका अध्यक्ष लोप्साङ छोम्फेल विष्ट र बागलुङ नगरपालिका बागलुङका उपमेयर सुरेन्द्र खड्का मतदानमा सहभागी नभएका हुन् ।

एमालेबाट निर्वाचित लो–घेकरका अध्यक्ष विष्ट अमेरिका छन् । अर्का मतदाता खड्का राप्रपाका हुन् । राप्रपाले आफ्नो पार्टीको उम्मेदवार भएको प्रदेश १ बाहेक अन्य प्रदेशमा मतदानमा सहभागी नहुने निर्णय गरेको थियो । राप्रपाबाटै निर्वाचित बेनी नगरपालिका म्याग्दीकी उपाध्यक्ष सन्जु बरुवालले भने पार्टीको निर्णय विपरीत मत हालेकी छन् ।

राष्ट्रियसभा निर्वाचनमा स्थानीय तहका प्रमुख तथा उपप्रमुख र प्रदेशसभा सदस्य मतदाता हुन्छन् । गण्डकीमा ८५ स्थानीय तह छन् भने ६० सदस्यीय (एक रिक्तसहित) प्रदेशसभा छ । राष्ट्रियसभा निर्वाचनमा स्थानीय तहका एक जनप्रतिनिधि बराबर १८ मतभार हुन्छ । त्यस्तै प्रदेश सांसदको मतभार एक जना बराबर ४८ हुन्छ ।

राष्ट्रियसभामा रिक्त हुन लागेको १९ पदमध्ये गण्डकीबाट महिला क्लस्टरकी शान्तिकुमारी अधिकारी जिसी, खुलाका दीनानाथ शर्मा र दलित कोटाका खिमबहादुर विकको चार वर्षे कार्यकाल सकिन लागेको हो ।

प्रकाशित मिति: बुधबार, माघ १२, २०७८ १९:३६