राष्ट्रियसभा निर्वाचन : गण्डकीमा दुई जनाले मत हालेनन्

A+ A A-

राष्ट्रियसभा निर्वाचनअन्तर्गत गण्डकीमा दुई सय २७ जनाले मतदान गरेका छन् । बुधबार पोखरामा भएको मतदानअन्तर्गत कुल दुई सय २९ मतदाता रहेकोमा एमाले र राप्रपाका एक–एक जनाले मतदान गरेनन् ।

गण्डकीमा स्थानीय तह प्रमुख र उपप्रमुख एक सय ७० र प्रदेशसभा सदस्य ५९ गरेर दुई सय २९ जना मतदाता थिए । प्रदेश सांसद सबैले मतदान गरेका छन् ।

मुस्ताङको लो–घेकर दामोदरकुण्ड गाउँपालिकाका अध्यक्ष लोप्साङ छोम्फेल विष्ट र बागलुङ नगरपालिका बागलुङका उपमेयर सुरेन्द्र खड्काले मत नहालेका हुन् ।

एमालेबाट निर्वाचित लो–घेकरका अध्यक्ष विष्ट अमेरिका छन् । अर्का मतदाता खड्का राप्रपाका हुन् । राप्रपाले आफ्नो पार्टीको उम्मेदवार भएको प्रदेश १ बाहेक अन्य प्रदेशमा मतदानमा सहभागी नहुने निर्णय गरेको थियो ।

राप्रपाबाटै निर्वाचित बेनी नगरपालिका म्याग्दीकी उपाध्यक्ष सन्जु बरुवालले भने पार्टीको निर्णय विपरीत मत हालेकी छन् ।

राष्ट्रियसभा निर्वाचनमा स्थानीय तहका प्रमुख तथा उपप्रमुख र प्रदेशसभा सदस्य मतदाता हुन्छन् । गण्डकीमा ८५ स्थानीय तह छन् भने ६० सदस्यीय (एक रिक्तसहित) प्रदेशसभा छ । राष्ट्रियसभा निर्वाचनमा स्थानीय तहका एक जनप्रतिनिधि बराबर १८ मतभार हुन्छ । त्यस्तै प्रदेश सांसदको मतभार एक जना बराबर ४८ हुन्छ ।

गण्डकी प्रदेशमा सत्ता गठबन्धनसँग स्वतन्त्र सांसदसहित कुल ३ हजार ३ सय मतभार छ। एमालेसँग एक्लै २५ सय ५६ मतभार छ । राप्रपासँग दुई मतदातामध्ये ३६ मतभार रहेकोमा एक जना मतदानमा सहभागी भएकी छन् । मत हालेकी बेनी नगरपालिकाकी उपप्रमुख बरुवालले एमाले उम्मेदवारलाई मत हालेको चर्चा छ ।

मतगणना बुधबारै गरिनेछ ।

राष्ट्रियसभामा रिक्त हुन लागेको १९ पदमध्ये तीन जना सदस्य गण्डकी प्रदेशका हुन् । गण्डकीबाट महिला क्लस्टरकी शान्तिकुमारी अधिकारी जिसी, खुलाका दीनानाथ शर्मा र दलित कोटाका खिमबहादुर विकको चार वर्षे कार्यकाल सकिन लागेको हो । रिक्त हुन लागेका पदका लागि ६ जना आकांक्षी छन् ।

एमालेबाट महिलामा लिला पोखरेल थनेत, दलितमा अर्जुनकुमार सुनाम र अन्यमा पुण्यप्रसाद पौडेल उम्मेदवार छन् । गठबन्धनबाट महिलामा नेपाली कांग्रेसकी कमला पन्त, दलितमा माओवादी केन्द्रका भुवनबहादुर सुनार र अन्यमा माओवादीकै सुरेश आलेमगर एमाले उम्मेदवारविरुद्ध मैदानमा छन् ।

प्रकाशित मिति: बुधबार, माघ १२, २०७८ १६:१९