प्रदेश १ मा ३६१ जनाले गरे मतदान, फरार सांसद खातुनसहित ३ जना अनुपस्थित

A+ A A-

राष्ट्रियसभा निर्वाचनमा प्रदेश १ मा ३ सय ६१ जनाले मतदान गरेका छन् । बुधबार तीन बजेसम्म भएको मतदानमा २७० जना स्थानीय तहका प्रमुख तथा उपपप्रमुख र ९१ जना प्रदेशसभा सदस्यहरुले मतदान गरेको प्रदेश निर्वाचन कार्यालयका प्रमुख लेवन कश्यप अधिकारीले शिलापत्रलाई जानकारी दिए ।

स्थानीय तहका प्रमुख तथा उपप्रमुख र प्रदेशसभाका सदस्य मतदाता हुने राष्ट्रियसभा निर्वाचनमा प्रदेश १ मा ३६४ मतदाता थिए । प्रदेश १ मा ९२ जना प्रदेशसभा सदस्य र र २७२ जना स्थानीय तहका प्रमुख तथा उपप्रमुख छन् ।

मतदानमा तीन जना अनुपस्थित भएका छन् । झापाको गौरीगञ्ज गाउँपालिकाका अध्यक्ष बाबुराम श्रेष्ठ र विराटनगर महानगरपालिकाकी उपमेयर इन्दीरा कार्की अनुपस्थित भएका छन् । श्रेष्ठ छोरीको विवाहका कारण र कार्की विरामीका कारण उपचाररत रहेकाले निर्वाचनमा मतदान गर्न आएनन् । त्यस्तै प्रहरीको फरार सूचीमा रहेकी नेकपा (एमाले) की सांसद गुलेफल खातुन पक्राउ पर्ने डरले मतदान गर्न आइनन् ।

पहिलो मतदान प्रदेश १ का सामाजिक विकास मन्त्री जयराम यादवले गरेका थिए । राष्ट्रियसभा निर्वाचनका लागि २ वटा मतदान केन्द्रमा मतदान केन्द्र तोकिएको थियो । स्थानीय तहका प्रमुख र उपप्रमुखका लागि विराटनगर–१० तीनटोलीयास्थित प्रदेश निर्वाचन कार्यालय र प्रदेशसभा सदस्यका लागि प्रदेश निर्वाचन कार्यालयसँगै रहेको बाली संरक्षण कार्यालयमा मतदानस्थाल तोकिएको थियो । मतपरिणाम बुधबारै आउने निर्वाचन कार्यालयका प्रमुख अधिकारीले बताए ।

प्रदेश १ मा तीन राष्ट्रिसभा सदस्यका लागि आठ जना प्रतिष्पर्धामा छन् । सत्ता साझेदार पाँचदलीय गठबन्धनले नेपाली कांग्रेसका तर्फबाट गोपाल बस्नेत, एकीकृत समाजवादीकी जयन्ती राई र जनता समाजवादीका हेमराज थुलुङ राईलाई अघि सारेको छ ।

प्रमुख प्रतिपक्षी दल नेकपा (एमाले)बाट गुरुप्रसाद बराल, सुमित्रा भण्डारी र सोनाम ग्याल्जेन शेर्पा चुनावी मैदानमा छन् । राष्ट्रिय प्रजातन्त्र पार्टीका तर्फबाट खुलामा झापाका अमर विष्ट र रञ्जु प्याकुरेल महिलातर्फ चुनावी प्रतिष्पर्धामा छन् ।

प्रकाशित मिति: बुधबार, माघ १२, २०७८ १६:०८