अग्रवाल परिवारकाे पत्र : थाहा छैन मरिन्छ कि बाँचिन्छ, हाम्रो सम्पत्ति बाँडेर लिनुहोला

अग्रवाल परिवारकाे पत्र : थाहा छैन मरिन्छ कि बाँचिन्छ, हाम्रो सम्पत्ति बाँडेर लिनुहोला

A+ A A-

विदेशी कम्पनीका मदिराको व्यवसाय गर्दै आएका अभिषेक र अमित अग्रवालको परिवार आर्थिक अवस्था बिग्रेपछि सम्पर्कविहीन भएको खुलेको छ । उनीहरूले ऋण तिर्न नसकेर भाग्‍न बाध्य भएको खुलाएका छन् ।

अभिषेकका बुबा ओमप्रकाश अग्रवालले छोराहरू अभिषेक र अमितले सञ्चालन गर्दै आएको ग्रीनलाइन सेन्टर प्रालि कोरोना संक्रमणपछि धरापमा परेको र त्यो सञ्चालन गर्न बैंक तथा अन्य विभिन्न व्यक्तिबाट लिएको ऋण तिर्न नसक्दा यो अवस्था भोग्‍नुपरेको पत्रमा खुलाएका छन् । काठमाडौं ज्ञानेश्वरमा बस्दै आएका अग्रवाल परिवार सम्पर्कविहीन हुँदा घरमा पत्र छोडेका थिए ।

पत्र अभिषेकका ७३ वर्षीय बुबा ओमप्रकाश अग्रवालले लेखेका छन् । उनले विभिन्न व्यक्तिबाट मिटर ब्याजमा लिएको रकमका कारण बाँच्नु न मर्नुको अवस्थामा पुगेको समेत पत्रमा खुलाएका छन् । ‘हामीले ग्रीनलाइनबाट कमाएको नाफाले ब्याज तिर्दै आएका थियौँ । तर, २१ असोजमा बैंकहरूले ग्रीनलाइनलाई पनि ताल्चा लगाइदिएकाले हामीले मिटर ब्याजीका लागि पैसा तिर्न सक्ने अवस्था रहेन,’ पत्रमा भनिएको छ ।

आफूहरूको नाममा रहेको कम्पनी, बैंक तथा मिटर ब्याजमा दिनेहरूले कानुनी रूपमा बाँडेर लिन पनि अग्रवाल परिवारले भनेकाे छ । तर, उनीहरूको सम्पत्तिभन्दा बढी तिर्नुपर्ने ऋण देखिएको छ भने व्यक्तिगत ऋण पनि ठूलो मात्रामा भएका कारण डुब्ने खतरा देखिएको छ ।

ग्रीनलाइन सेन्टर नेपालमा महँगो विदेशी रक्सी बेच्ने कम्पनी हो । उक्त कम्पनीले एक बोतलकै ६ लाख रुपैयाँ पर्ने रक्सीसमेत आयात गरेर बेच्ने गरेकाे थियाे । २२ वर्षदेखि विदेशी मदिरा नेपाल भित्र्याएर बेच्ने यो कम्पनी नेपालको सबैभन्दा महँगो रक्सी बेच्ने कम्पनीमध्येको एक हो ।

अग्रवाल परिवारका सदस्यहरू २२ पुसदेखि बेपत्ता भएका हुन् । विभिन्न बैंक तथा वित्तीय संस्था र व्यक्तिबाट उनीहरू करिब ३ अर्बभन्दा बढी रकम ऋण लिएर भागेकाे प्रहरीकाे अनुमान छ ।

पत्रमा ओमप्रकाश, उनकी पत्नी उषा, छाेराहरू अभिषेक र अमितले हस्ताक्षर गरेको कागज भेटिएको छ । पत्रमा 'मरिन्छ वा बाँचिन्छ' भन्ने शब्द देखिएको र पत्र भावुक रहेकाले उनीहरू तनावमा रहेकाे बुझिन्छ । ‘साहुहरूको नाम तथा मिटर ब्याजीहरूले दिए गराएका कागजपत्र तथा तिनीहरूको नामावली थाहा पाई एउटा प्रतिष्ठित परिवारलाई आत्महत्या गराउने अवस्थामा पुर्‍याउन लगाएको मानिसहरूलाई दण्ड सजाय दिई मेरो परिवारको आत्मालाई शान्ति प्रदान गर्न सरकारसँग माग गर्दछौँ,’ पत्रमा उल्लेख छ ।

ओमप्रकाशकी छोरीले आमाबुबा तथा परिवारका सदस्यको खोजीका लागि प्रहरीमा निवेदन दिएकी छन् ।