प्रहरीमा अग्रवाल दाजुभाइ खोज्नेको भिड, ३ अर्बभन्दा धेरै ऋण लिएर सम्पर्कविहीन

प्रहरीमा अग्रवाल दाजुभाइ खोज्नेको भिड, ३ अर्बभन्दा धेरै ऋण लिएर सम्पर्कविहीन

A+ A A-

ग्रीनलाइन सेन्टर प्रालिका सञ्चालक अभिषेक अग्रवाल र अमित अग्रवाल सम्पर्कविहीन भएपछि अहिले काठमाडौं प्रहरी परिसरमा पैसा डुबेकाे भन्दै फोन आइरहेकाे छ । कतिपय परिसरमै पुगेर गुनासो गरिरहेका छन् । ‘अग्रवाल दाजुभाइ सम्पर्कमा छैनन् भन्ने खबर आयो, मेरो ऋण लिएको छ के गर्ने होला...?’ भन्दै प्रहरीमा गुनासाे गरिरहेका छन् ।

ग्रीनलाइन सेन्टर कम्पनीमा अमित अग्रवाल प्रमुख कार्यकारी अधिकृत र अभिषेक अग्रवाल प्रबन्ध निर्देशक छन् । उनीहरू सहोदर दाजुभाइ हुन् भने उनका बुबा ओमप्रकाश अग्रवालले नै यो कम्पनी स्थापना गरेका हुन् ।

ग्रीनलाइन सेन्टर नेपालमा महँगो रक्सी बेच्ने कम्पनी हो । १ बोतलकाे ६ लाख रुपैयाँ पर्ने रक्सीसमेत यो सेन्टरले बेच्ने गरेको थियाे ।

२२ वर्षदेखि विदेशी मदिरा नेपाल भित्र्याएर बेच्ने यो कम्पनी नेपालको सबैभन्दा महँगो रक्सी बेच्ने कम्पनीमा गनिन्छ ।

प्रहरीमा तनाव, राष्ट्र बैंकको चासो

अग्रवाल दाजुभाइ सम्पर्कविहीन भएपछि काठमाडौं प्रहरी परिसरमा दबाब बढेको छ । थुप्रै बैंक तथा वित्तीय संस्थाबाट ऋण लिएर उनीहरू भागेकाे आशंकामा राष्ट्र बैंकको सुपरिवेक्षण विभागले ऋणका फाइलहरू मगाएर अध्‍ययन गरिरहेको जनाएको छ ।

‘दिनदिनै व्यक्तिगत गुनासो आइरहेको छ, चेक बाउन्स भएको पनि गुनासो गरेका छन् । तर, अहिलेसम्म आर्थिक कारोबारको विषयमा उजुरी भने आएको छैन । यद्यपि पारिवारिक स्रोतले सम्पर्कमा नरहेको भनेर निवेदन दिएपछि हाम्रो वाच लिस्टमा अग्रवाल दाजुभाइ छन्’, काठमाडौं प्रहरी परिसर प्रमुख वरिष्ठ प्रहरी उपरीक्षक (एसएसपी) सुदिप गिरीले शिलापत्रसँग भने ।

एसएसपी गिरी उनीहरू विगतमा पनि भारतमा गएर लामो समय बसेका कारण अहिले अन्‍य विषयमा अनुसन्धान गर्ने अवस्था नरहेकाे बताउँछन् । ‘पारिवारिक स्रोतसँग बुझ्दा उनीहरू विगतमा पनि तीन/चार महिना भारतमा गएर बस्ने गरेको देखियो । यस हिसाबले अहिले पनि उनीहरू सम्पर्कमा आउन सक्‍ने आधार छन्’, गिरीले भने ।

तर मालिगाउँ प्रहरी स्रोतका अनुसार उनीहरू ऋणकै कारण भागेको देखिएकोले तत्काल आउने सम्भावना कम देखिन्छ । व्यक्तिबाट मिटर ब्याजमा पैसा उठाउनुका साथै बैंकमा धितो राखेको जग्गा देखाएर सहकारी तथा फाइनान्स कम्पनीहरूबाट पनि उनीहरूले ठूलो ऋण उठाएकाे आशंका छ । मिटर ब्याजकै पैसाका कारण उनीहरूलाई धम्की आएकाे र ऋण तिर्ने आधार कमजोर बनेपछि उनीहरू सम्पर्कविहीन बनेकाे प्रहरीकाे आशंका छ ।

राष्ट्र बैंकका डेपुटी गभर्नर बमबहादुर मिश्रले बैंकहरूको ठूलो रकम ऋण लिएको अवस्थामा यस विषयमा राष्ट्र बैंकले चासो राखेको प्रतिक्रिया दिएका छन् । राष्ट्र बैंक कार्यकारी निर्देशक डा. गुणाकर भट्टले पनि बैंकहरूबाट ऋणको फाइल मगाएर अध्ययन गर्न थालेको जानकारी गराए ।

राष्ट्र बैंक स्रोतका अनुसार अहिलेसम्म पाँचवटा वाणिज्य बैंकका ऋणका फाइल मगाइएको छ । जसमा नेपाल इन्भेस्टमेन्ट बैंक, एभरेस्ट बैंक, ग्लोबल आईएमई बैंक, एनआईसी एशिया बैंक र मेगा बैंक रहेका छन् ।

कसको कति ऋण ?

नेपाल इन्भेस्टमेन्ट बैंक	३२ करोड
मेगा बैंक	२५ करोड
एभरेस्ट बैंक	२२ करोड
ग्लोबल आईएमई बैंक	१८ करोड

बैंकिङ स्रोतका अनुसार एनआईसी एशिया बैंक र केही विकास बैंकले पनि ग्रीनलाइनलाई ऋण दिएका छन् । वाणिज्य र विकास बैंकको मात्रै डेढ अर्ब रुपैयाँसम्मको ऋण भएको अनुमान गरिएको छ । हिमालयन बैंकले भने तारन्तार अत्याएपछि गत वर्ष नै आफ्नो ऋण उठाइसकेको छ ।

त्यस्तै, केही फाइनान्स कम्पनी र सहकारीले समेत ऋण दिएका र ठूलो मात्रामा व्याक्तिगत ऋण दिएको गुनासो प्रहरीसमक्ष पुगेको छ ।

विभिन्न समयमा विभिन्न संस्थाबाट लिएको ऋणमध्ये केही ऋण हाइपोथेटिकल कर्जा अन्तर्गत पर्छ । यस्तो कर्जा कुनै कम्पनी वा व्यवसायीसँग भएको स्टक सामानलाई आधार मानेर दिने गरिन्छ । यसमा अन्य सम्पत्ति नभएर उसले कारोबार गर्ने सामानको मूल्यलाई आधार मानेर ऋण दिने गरिन्छ । कतिपय बैंकहरूले ८० प्रतिशतसम्म ऋण दिने गरेका छन् ।

यही कर्जाअन्तर्गतको कर्जा दिएका कारण अहिले नेपाल इन्भेस्टमेन्ट बैंक र एभरेस्ट बैंकले ग्रीनलाइनका स्टाेरमा सूचना टाँस गरेर आफ्नो स्वामित्व भएको दाबी गरेका छन् ।

उनीहरूले हाइपोथेटिकल कर्जासहित जग्गा तथा अपार्टमेन्ट कर्जा पनि दिएका छन् । जसमध्ये एभरेस्ट बैंकले ज्ञानेश्वरमा रहेको १७ आना जग्गा धितोमा राखेर ऋण उपलब्ध गराएको छ । उसले यसका साथै स्टक रक्‍सीलाई पनि आधार मानेर ऋण दिएको छ ।

यी बैंकले दिएको सबै ऋण हाइपोथेटिकल भने होइन । विभिन्न ठाउँमा रहेका चारवटा फ्ल्याट, घरजग्गालगायतका सम्पत्ति धिताे राखेर ऋण दिइएको छ । मेगा बैंकले स्टक र धितो दुवै राखेर ऋण दिएको छ । एभरेस्ट बैंकले ज्ञानेश्वर चोकमा १७ आना जग्गा र घरसहित विभिन्न ठाउँका फ्ल्याट राखेर ऋण दिएको छ । ग्लोबल आईएमईले ज्ञानेश्वरकै अर्को १७ आना जग्गा धितोमा राखेर ऋण दिएको छ । इन्भेस्टमेन्ट बैंकको पनि धितो र स्टकमा ऋण छ । मेगा बैंकले स्टक मदिरासहित फ्ल्याट धितोमा राखेर ऋण दिएको छ ।

अहिले बैंकहरूले दिएको ऋण र कम्पनीको सम्पत्तिका साथै मौज्दात रक्सीको रकमले ऋण तिर्न पुग्ने अवस्था रहेको राष्ट्र बैंक स्रोतले जनाएको छ । एउटै जग्‍गा वा उही परिमाणको सामान राखेर छुट्टाछुट्टै ऋण निकालेको समेत पाइएको छ । यसमा बैंक तथा वित्तीय संस्थाको कमजोरी देखिएको छ ।

व्यक्ति र सहकारीहरूबाट लिएको ऋणको समेत विवरण आउँदा ठूलो परिमाणको ऋण तिर्नुपर्ने हुन सक्ने प्रहरीको आशंका छ ।

मदिरामा जमेका व्यवसायी

अग्रवाल दाजुभाइको मुख्य व्यवसाय नै मदिरा हो । महँगो मदिरामा उनीहरूको साम्राज्य नै भएको मदिरा व्यवसायीहरू बताउँछन् । ‘विदेशका जुनसुकै कुनामा पाइने नयाँ र महँगा मदिरा उनीहरूले केही महिनाभित्र नेपाल भित्र्यानै हाल्थे । महँगा मदिरामा उनीहरूको एक प्रकारको साम्राज्य नै थियो’, एक व्यवसायीले भने, ‘मदिरा बेचेर अत्यधिक नाफा कमाएका उनीहरूले नेपालमा मदिरा उद्योग खोल्न पनि चाहेका थिए । पछिल्लो पटक भने होटलहरूबाट वक्यौता नउठेको र परिमाण कटौती भएपछि उनीहरू समस्यामा परेका थिए ।

मदिरामा अग्रवाल दाजुभाइ दोस्रो पुस्ताका हुन् । भारतबाट नेपाल आएर नेपालको नागरिकता लिएका बुबा ओमप्रकाश अग्रवालले विदेशबाट मदिरा ल्याएर नेपालमा बेच्ने व्यवसाय गरेका थिए । उनीहरूले मुख्यत: तीनवटा कम्पनीमार्फत मदिराको कारोबार गर्दै आएका थिए । जस अन्तर्गत ग्रीनलाइन स्टोरले मदिराको खुद्रा कारोबार गर्दै आएको थियो भने एलायन्स डिस्ट्रिब्युटर्समार्फत विदेशबाट मदिरा आयात र अमिअभि ट्रेडिङ कम्पनीमार्फत होलसेलको कारोबार गर्दै आएका थिए ।

सम्बन्धित समाचार