संसद गतिरोध एमालेकै लागि गलपासो, विरोधकाे शैली परिवर्तन गर्न आफ्नै सांसदकाे दबाब

संसद गतिरोध एमालेकै लागि गलपासो, विरोधकाे शैली परिवर्तन गर्न आफ्नै सांसदकाे दबाब

A+ A A-

७९ दिन संसदमा अवरोध कायम राखेर आफ्नै रेकर्ड तोडेको संसदकाे ठूलाे दल नेकपा (एमाले) लाई आफ्नै रणनीति अहिले गलपासो बनेको छ ।

२३ भदौयताका सबै बैठक अवरुद्ध गरे पनि कुनै नतिजा हात नपरेपछि एमालेकै सांसदहरूले अध्यक्ष केपी ओलीसँगको भेटमा यसबारे पुनर्विचार गर्न भनेका छन् । विरोधकाे शैली परिवर्तन गर्न आफ्नै सांसदले समेत सुझाएपछि लामाे संसद अवराेध एमालेका लागि गलपासाे भएकाे हाे ।

एमाले सांसद तथा स्थायी कमिटी सदस्य घनश्याम भुसाल एमालेको संसद अवरोध लोकतन्त्र र प्रणालीलाई सुदृढ गराउने उद्देश्य नभएकाले निरन्तरको अवरोधले पार्टीलाई अप्ठ्यारोमा पारेको बताउँछन् । अध्यक्ष केपी ओलीको हठका कारण बैठक अवरुद्ध हुँदा सांसदहरूलाई समेत कठिनाइ भएको भुसाल बताउँछन् ।

'हामीले संसदीय प्रणालीलाई सुदृढ बनाउन वा लोकतन्त्रलाई सबल बनाउनका निम्ति आन्दोलन गरिरहेका छैनौँ,' भुसालले भने, 'अध्यक्षलाई लाग्यो कि हामीले पार्टी र संसदबाट निकालेका व्यक्तिहरू संसदबाट निक्लिएनन् भन्ने उहाँको गुनासोका कारण बैठक अवरुद्ध भइरहेको छ ।'

संसद अवरोध हुनाले एमालेलाई घाटा भइरहेको भन्दै भुसालले यसलाई सुरक्षित अवतरण गराउन सांसदहरूले माग गरिरहेको बताए । यस विषयमा छिट्टै पार्टीभित्र र संसदीय दलमा छलफल हुने उनको भनाइ छ ।

'संसद अवरोधको औचित्यबारे संसदीय दलमा छलफल हुनुपर्ने आवाज बलियो हुँदै गइरहेको छ । पार्टीभित्र संसद अवरुद्ध गर्दा मुलुकका समसामयिक विषयमा छलफल प्रभावित भएको र यो गतिविधि लम्बिनु ठीक नभएको आवाज बुलन्द भइरहेको छ, यसलाई हामी चाँडै सामाधान गर्नेतर्फ लाग्नेछौँ,' भुसालले भने ।

एमाले सांसद कृष्णभक्त पोखरेलले सांसदहरूले अध्यक्ष ओलीसँगको भेटमा विरोधलाई रचानात्मक बनाउन सुझाएको बताउँछन् । 'हामीमाथि अन्याय भएकै हो तर ५-७ मिनेट विरोध गरेर जनताका गाह्रो-साह्रोलाई पनि संसदमा उठाऔँ भनेका छौँ,' उनले भने ।

आफूमाथि भएको अन्यायको विषयमा विरोध जनाउँदै जनताका आवाज पनि सँगसँगै राख्ने नीति एमालेले लिनुपर्ने उनको मत छ । 'कोरोनाको विषय आइरहेको छ, मुलुकको सीमाको विषय आइरहेको छ । हामीले हाम्रो न्यायको मागसँगै जनतालाई पनि न्याय दिलाउन सरकारलाई दबाब दिने काम गर्नुपर्छ,' उनले भने ।

एमालेका एक सांसदले आफ्नो पार्टीले संविधानको व्यवस्थाविपरीत संसदमा विरोध गरेकाले यसले पार्टीलाई घाटा र सरकारलाई फाइदा पुगेको बताए । पार्टी विभाजन सम्बन्धमा आफैँले सर्वोच्चमा हालेको मुद्दामा छलफल गर्नु गैरसंवैधानिक काम भएको ती सांसदको मत छ ।

'संविधानको धारा १०५ मा सर्वोच्चमा विचाराधीन विषयमा संसदमा छलफल नहुने लेखिएको छ,' ती सांसदले भने, 'हामीलाई न्याय दिने त सर्वोच्चले हो, सरकारले पनि होइन सभामुखले पनि होइन । हामीलाई जनताले मलाई अप्ठ्यारो पर्दा बोल्नू भनेर पठाएको हो । आफ्नो हठले जनताका आवाज रोक्दा हामीलाई गाह्रो परिसक्यो ।'

नेकपा एकीकृत समाजवादीले दलीय मान्यता प्राप्त नगरेको भन्दै उनीहरू गैरसांसद हुने तर्क गर्दै एमालेले बैठक अवरोध गर्दै आएको हो । सभामुख अग्नि सापकोटाले आफ्नो दल विभाजनमा भूमिका निर्वाह गरेको भन्दै एमालेले सापकोटामाथि पनि कारबाही हुनुपर्ने माग गर्दै आएको छ ।

एकीकृत समाजवादीलाई संसदमा अस्वीकार, अन्यत्र स्वीकार

एमालेले एकीकृत समाजवादीको दलीय हैसियतका विषयमा मुद्दा विचाराधीन रहेको भन्दै उक्त पार्टी सम्मिलित सर्वदलीय बैठक बहिष्कार र संसद अवरोध गर्दै आएको छ ।

संसद खुलाउन सभामुख सापकोटाले राखेको बैठक र प्रधानमन्त्री शेरबहादुर देउवाले डाकेको सर्वदलीय बैठक पनि एमालेले बहिष्कार गर्दै आएको छ । तर, संसदीय समितिको बैठकमा नेकपा एकीकृत समाजवादीका सांसदहरूको उपस्थित उसले स्वीकार गरेको छ भने गत शुक्रबार निर्वाचन आयोगले स्थानीय तहको निर्वाचनका सन्दर्भमा बोलाएको छलफलमा एकीकृत समाजवादीको उपस्थितिमा एमालेले आपत्ति जनाएन ।

यता संसदको कार्यव्यवस्था समितिको बैठकमा पनि एमालेले एकीकृत समाजवादीको उपस्थिति स्वीकार गरेकाे छ । एमालेका प्रमुख सचेतक विशाल भट्टराई आफूहरूले कसैको पनि अस्तित्वलाई निषेध गर्न नखोजेकाे बताउँछन् ।

'निर्वाचन आयोग वा समितिका बैठकमा हामी जान्छौँ, छलफल गर्छौं । हामीले कसैलाई पनि निषेध गर्न खोजेका होइनौँ । संसदको सन्दर्भममा हामीले सभामुखको निर्णयलाई एजेण्डा बनाएका हौँ,' उनले भने, 'निर्वाचनको विषयका सर्वदलीय बैठकमा हामी जान्छौँ तर संसदको अवरोध खुलाउने विषयमा सामूहिक छलफल आवश्यक छैन भन्ने हो । एक्लाएक्लै छलफल गर्दा प्रधानमन्त्रीसँग पनि छलफल गर्‍यौँ, सभामुखसँग पनि छलफल गर्न तयार छौँ ।'

माघ १६ मा बैठक बसे अवरोध कायमै

संसद खुलाउने विषयमा एमाले अध्यक्ष केपी ओलीसँग बालकोट पुगेरै प्रधानमन्त्री शेरबहादुर देउवाले छलफल गरे पनि एमाले टसमस भएको छैन ।

प्रतिनिधिसभाको २३ पुसयताका बैठक विशेष कारण देखाउँदै सूचना टाँस गरेर स्थगित हुँदै आएको छ । राष्ट्रियसभामा दलीय व्यस्तता र कोरोनाको कारण देखाउँदै १६ माघमा अर्को बैठक बस्ने भन्दै ३ माघको बैठक सूचना टाँस गरेर स्थगित भएको छ ।

१६ माघको बैठकमा पनि एमालेले अवरोध कायमै राख्ने प्रमुख सचेतक भट्टराई बताउँछन् । 'हामीले सभामुखलाई दिएका विकल्पमध्ये कुनै एकमा राजी हुनुपर्‍यो, अन्यथा हाम्रो अवरोध कायमै हुन्छ,' उनले भने ।

एमालेले आफूले कारबाही गरेका सांसदको कारबाही पत्र सदनमा सुनाउने वा राजीनामा दिने विकल्प सभामुख सापकोटालाई दिएको थियो । एमाले सांसद भीम रावल आगामी बैठक पनि अवरोध गरे एमालेकै निम्ति प्रत्युत्पादक हुने बताउँछन् । 'सरकारका कार्यक्रम पास हुन दिने अनि जनता अप्ठ्यारोमा परेको समयमा उनीहरूका आवाज रोक्ने हो भने यो नीति एमालेकै निम्ति घातक हुन्छ । पार्टीभित्र छलफल गरेर विरोधको शैलीलाई परिमार्जन गरिनुपर्छ,' उनले भने ।

प्रकाशित मिति: आइतबार, माघ २, २०७८ १८:०९