विनोद चौधरीविरुद्ध यादवले दिए कांग्रेस निर्वाचन समितिमा उजुरी, पद खारेज गर्न माग

विनोद चौधरीविरुद्ध यादवले दिए कांग्रेस निर्वाचन समितिमा उजुरी, पद खारेज गर्न माग

A+ A A-

नेपाली कांग्रेसका केन्द्रीय सदस्य विनोद चौधरीविरुद्ध निर्वाचन समितिमा उजुरी परेको छ ।

पार्टीको १४औँ महाधिवेशनबाट मधेसी कोटामा केन्द्रीय सदस्यमा निर्वाचित भएका चौधरीविरुद्ध कांग्रेसको केन्द्रीय निर्वाचन समितिमा उजुरी परेको हो । सिरहा क्षेत्र नम्बर ३ का महासमिति सदस्य डा. सुभाषचन्द्र यादवले चौधरीको केन्द्रीय सदस्य पद खारेज गर्न माग गर्दै उजुरी दिएका हुन् । यादवले चौधरी अवैधानिक रूपमा केन्द्रीय सदस्य बनेकाले पद खारेज गर्न माग गरेका छन् ।

निर्वाचन समितिका संयोजक गोपालकृष्ण घिमिरेले यादवले चौधरीविरुद्ध उजुरी दिएको पुष्टि गरे । 'उहाँले दुई-तीन दिनअघि उजुरी दिनुभएको छ । निर्वाचन समितिले अध्ययन गरिरहेकाले निर्णय हुन बाँकी छ,' घिमिरेले शिलापत्रसँग भने ।

कांग्रेसको विधानमा केन्द्रीय सदस्य बन्न १० वर्ष पार्टीको क्रियाशील सदस्य भएको हुनुपर्ने व्यवस्था छ । तर, चौधरी २०७४ सालको निर्वाचनअघि मात्रै कांग्रेस प्रवेश गरेकाले केन्द्रीय सदस्य बन्ने योग्यता उनको नभएको दाबी यादवले गरेका छन् ।

‘मधेसी खुला पदमा निर्वाचित भएको भनिएका विनोद चौधरी कांग्रेसमा निरन्तर १० वर्ष क्रियाशील सदस्य नभएको निज २०७४ मा कांग्रेसमा प्रवेश गरेकोले निजको केन्द्रीय सदस्यमा उम्मेदवार नै हुन नपाउने स्पष्टै छ,’ उजुरीमा भनिएको छ ।

अवैधानिक ढंगले केन्द्रीय सदस्य बनेको भन्दै चौधरीको पद खारेज गरेर आफूलाई केन्द्रीय सदस्य बनाउन माग पनि यादवले गरेका छन् । चौधरी १४औँ महाधिवेशनमा मधेसी (खुला) कोटाबाट केन्द्रीय सदस्य निर्वाचित भएका थिए ।

प्रकाशित मिति: बिहीबार, पुस २२, २०७८ १०:२१