बालकोट पुगेर रामचन्द्रको ओलीलाई आग्रह- संसदलाई अस्तव्यस्त नबनाउनुस्

A+ A A-

नेपाली कांग्रेसका वरिष्ठ नेता रामचन्द्र पौडेलले एमाले अध्यक्ष केपी ओलीसँग भेट गर्द संसद अवरोध खुलाउन आग्रह गरेका छन् । बालकोटस्थित ‌ओली निवासमै पुगेर पौडेलले संसद अवरोध खुलाउन आग्रह गरेको पौडेलले शिलापत्रलाई बताए ।

आफू सत्तारुढ दलको उच्चस्तरीय राजनीतिक समन्वय समितिको संयोजकको हैसियतमा संसदको गतिरोध अन्त्यको पहलका लागि बालकोट पुगेको उनले बताए । 'मैले उहाँलाई अनन्तकालसम्म संसदमा गतिरोध हुन नदिनुस् । छिटो निकास दिनुहोस् भनेको छु,' पौडेलले भने, 'संसद, अदालत, सरकार सबैतिर गतिरोध हुनु राम्रो होइन । जिम्मेवार नेताको हैसियतमा तपाईंले जिम्मेवारी निर्वाह गर्नुस् भनेँ ।'

जवाफमा ओलीले आफ्नो पार्टीमाथि नियोजित रुपले अन्याय भएकाले त्यसका विरुद्ध सदनमा समेत संघर्ष गर्नुपर्ने स्थिति आइपरेको जवाफ पौडेललाई दिएका थिए । 'यो स्थिति सुखद छैन । एमालेमाथि नियोजित रुपले षड्यन्त्र भएपछि हामी बाध्य भएका हौँ,' ओलीको भनाइ उद्धृत गर्दै पौडेलले भने ।

पौडेलले सत्तारुढ दल र प्रतिपक्षीबीच सधैँ तिक्तताको सम्बन्ध हुँदा मुलुकको विकासमा समेत प्रभाव परेको बताएका थिए । आफू पार्टीभित्र छलफल गरेरै बालकोट पुगेको पौडेलले बताएका छन् । 'म बालकोट जान्छु भनेर साथीहरूसँग पनि भनेको थिएँ,' उनले भने ।

आफ्नो पार्टी विभाजनमा सभामुखको समेत भूमिका रहेको आरोप लगाउँदै र एकीकृत समाजवादीका सांसदलाई गैरसांसद करार गर्दै एमालेले संसद अवरुद्ध गर्दै आएको छ ।