चन्द्रे कामी सार्वजनिक गर्न माग गर्दै सुर्खेतमा प्रदर्शन

A+ A A-

एक सातादेखि बेपत्ता हुम्लाका चन्द्रे कामीको अवस्था सार्वजनिक गर्न कर्णाली प्रदेशको राजधानी सुर्खेतको वीरेन्द्रनगरमा प्रदर्शन भएको छ ।

मुगुकी १७ वर्षीया रमिला मल्ल (सुन्तली) सँग भागीविवाह गरेका चन्द्रे २९ मंसिरदेखि बेपत्ता छन् । उनलाई केटी पक्षले नै बेपत्ता पारेको परिवारको दाबी छ । १५/२० जनाको समूहले मध्यराति छरछिमेकीको घरमा समेत तालाबन्दी गरी चन्द्रे र सुन्तलीलाई लिएर गएको नातामा चन्द्रेका दाइ पर्ने गगन लाेहार बताउँछन् ।

मंगलबार जात व्यवस्था उन्मूलन मोर्चा जिल्ला कार्यसमिति सुर्खेतले चन्द्रे कामीको अवस्था सार्वजनिक गर्न माग गर्दै वीरेन्द्रनगरको वीरेन्द्रचोकमा प्रदर्शन गरेको हो । सहभागीहरूले चन्द्रे कामीको अवस्था सार्वजनिक गर, जात व्यवस्था मुर्दावादलगायतका नारा लेखिएका पर्चासहित प्रदर्शन गरेका हुन् ।

जात व्यवस्था उन्मूलन मोर्चा सुर्खेतकी संयोजक अस्मिता बादीले सरकारले चन्द्रे कामीको खोजीमा पनि विभेद गरेको बताइन् । चन्द्रे कामी दलित भएकैले उनको खोजीमा सरकारले तदारुकता नदेखाएको उनको दाबी छ ।

‘यदि चन्द्रेको पछाडि कामी हुन्थेन भने सरकारले खोजी कार्यमा तदारुकता देखाउँथ्यो होला,’ बादीले भनिन्, ‘दलित भएकाले सरकारले खोजी कार्यमा पनि विभेद र बेवास्ता गरेको छ ।’

बेपत्ता पारिएका चन्द्रे कामीको स्थिति तत्काल सार्वजनिक नगरे थप संघर्षका कार्यक्रम गर्ने उनले बताइन् ।

प्रकाशित मिति: मंगलबार, पुस ६, २०७८ १७:१२