हुम्ला घटना फलोअप : चन्द्रे कामी खोज्न कर्णाली झर्‍याे प्रहरी

A+ A A-

एक सातादेखि बेपत्ता हुम्लाका चन्द्रे कामीलाई खोज्न प्रहरी कर्णाली नदीतिर अघि बढेको छ । मुगु र हुम्लाका विभिन्न गाउँ चहारेको प्रहरी टोली कर्णाली नदीतिर हिँडेकाे जिल्ला प्रहरी कार्यालय हुम्लाका प्रमुख डीएसपी हेरम्भ शर्माले जानकारी दिए । घटनालाई लिएर दबाब बढेपछि गत शनिबारदेखि डीएसपी शर्मा आफैँ खोजबिनमा सक्रिय छन् ।

एक सातादेखि छैन अत्ताेपत्ताे

मुगुकी १७ वर्षीया रमिला मल्ल (सुन्तली) सँग भागीविवाह गरेका चन्द्रे २९ मंसिरदेखि बेपत्ता छन् । उनलाई केटी पक्षले नै बेपत्ता पारेको परिवारको दाबी छ । १५/२० जनाको समूहले मध्यराति छरछिमेकीको घरमा समेत तालाबन्दी गरी चन्द्रे र सुन्तलीलाई लिएर गएको नातामा चन्द्रेका दाइ पर्ने गगन लाेहार बताउँछन् । तर, केटीका बुबा वीरबहादुरले चन्द्रेलाई घरमै छोडेर सुन्तलीलाई मात्र लिएर गएको प्रहरीसमक्ष बताएका छन् ।

अन्तर्जातीय विवाहपछि हुम्लाका चन्द्रे कामी चार दिनदेखि बेपत्ता

१३ जना मुगुबाट जैर गएकै हुन्

जिल्ला प्रहरी कार्यालय मुगका प्रमुख डीएसपी सुवास हमालका अनुसार सुन्तलीलाई चन्द्रेबाट खोस्न केटीका बुबा वीरबहादुर मल्लसहित १३ जनाको टोली जैर गएको थियो ।

फलाेअप : पूरै गाउँलेलाई घरभित्र थुनेर चन्द्रे कामीलाई लगियो, केटी माइतमै छिन्, उसकाे टिसर्ट भेटियो

केटीलाई लिन गएका भनिएका कोही पनि गाउँमा नभेटिएको डीएसपी हमालले बताए । ती सबै भागेको उनकाे भनाइ छ । सुन्तली र उनका बुबा वीरबहादुर मल्ल प्रहरीको सम्पर्कमा छन् तर चन्द्रेको अवस्था अज्ञात छ ।

कर्णाली किनारतिर

सर्केगाड गाउँपालिका– १, जैरका चन्द्रेलाई कर्णाली नदी किनारकै बाटोहुँदै लगेको आशंकामा प्रहरी त्यो क्षेत्रपट्टि जान लागेको हुम्लाका डीएसपी शर्माले बताए । ‘हामीले केटीको गाउँ सोरु गाउँपालिका- ४, लिब्रुसहित आसपासका सबै गाउँमा खोज्यौँ । केटाको गाउँ, उसको दिदीहरूको गाउँदेखि आफन्त रहेका गाउँहरूमा मेरै कमाण्डमा खाेजियाे । तर, केही क्लु फेला पार्न सकिएन । अब कर्णालीतिर जाँदै छौँ’, डीएसपी शर्माले टेलिफोनमा शिलापत्रसित भने ।

अधिकारकर्मीकाे चिन्ता

अधिकारकर्मी हीरा बिजुली प्रहरी टोली जति नै खटाए पनि परिणाम नदेखिएकोमा चिन्ता प्रकट गर्छन् । 'देख्नलाई प्रहरीले खोजबिन गरिरहेको जस्तो लाग्छ । तर, चन्द्रे लुकेको वा भागेको हो कि भन्ने शंकाले प्रहरीलाई प्रभावित गरेको हाम्रो आशंका छ । मध्यराति अर्काको घर पसेर अपहरण गर्नेलाई पक्राउ गर्न र बेपत्ता चन्द्रेको अवस्था पत्ता लगाउन प्रहरीले कुनै कसर बाँकी नराखोस्', उनले माग गरे ।

गाउँभरि पुलिस

चन्द्रे कामीकाे गाउँ जैर ।

प्रहरीले चन्द्रेको खोजीमा गम्भीर भएर लागेको दाबी गरेको छ । यद्यपि, परिणाम भने देखिएको छैन । जिल्ला प्रहरी कार्यालय हुम्लाका प्रहरी सहायक निरीक्षक बर्मबहादुर रोकायाका अनुसार प्रहरी चौकी गल्फागाढ र अस्थायी प्रहरी पोस्टबाट तुम्चकाे एक/एक टोली, जिल्ला प्रहरी कार्यालयबाट दुईवटा टोली चन्द्रेको खोजीमा परिचालित छ ।

‘जिप्रकाबाट पहिला इन्स्पेक्टर दामु पुनको नेतृत्वमा पाँच जनाको टोली गएको थियो । त्यसपछि डीएसपी सा’बको कमाण्डमा आठ जनाको टोली मुगु पुगेर फर्किंदै छ । प्रहरी चौकी ताजाकोट र प्रहरी चौकी श्रीनगरबाट समेत एउटा टोली मुगुतिर गएर फर्केको छ’, उनले शिलापत्रसित भने ।

भेटिएको थियो टिसर्ट, जुन चन्द्रैकै हाे

सुन्तलीसँग प्रेमविवाह गरेका चन्द्रेलाई केटी पक्षले २९ मंसिर राति घरबाटै उठाएर लगेको थियो । गत बुधबार मध्यरातमा केटीको गाउँ लिब्रुबाट आएको समूहले छिमेकीहरूको घरमा ताला लगाएर छोरालाई कुट्दै लगेकाे चन्द्रेका बुबा धनञ्जय लोहार (कामी)को भनाइ छ । सोही वडाका अध्यक्ष गोकुल बुढाका अनुसार भोलिपल्ट घरभन्दा दुई/तीन सय मिटरको दूरीमा चन्द्रेको टिसर्ट भेटिएको थियो । अहिले प्रहरी चन्द्रेकाे घरबाट करिब ३ घण्टाकाे दूरीमा पर्ने कर्णाली नदी किनारतिर अघि बढेकाे छ ।

शंका

केटाको परिवारले केटी पक्षले चन्द्रेलाई बेपत्ता पारेको आरोप लगाएको छ । तर, केटी पक्षले भने चन्द्रेलाई लुकाइएको बताइरहेको छ ।

हुम्ला घटना : ६ दिन बित्यो, भेटिएनन् चन्द्रे कामी

यसैबीच, विभिन्न अधिकारवादी संघसंगठनहरूले चन्द्रेको अवस्था पत्ता लगाउन र उनकाे अपहरण गर्नेहरूमाथि कारबाही गर्न माग गरेका छन् । केही संगठन त जातीय विभेदको घटनाविरुद्ध सडकमै ओर्लेका छन् । सुर्खेतमा आज अधिकारकर्मीहरूले विरोध प्रदर्शन गर्दैछन् । काठमाडौंमा पनि अनेरास्ववियु क्रान्तिकारीले विरोध प्रदर्शनको कार्यक्रम राखेकाे छ ।

कसरी भयो रूकुम घटना ?
भीमबहादुर मृत्यु प्रकरण: के हो वास्तविकता ?

जातका आधारमा हुने विभेदलाई संविधानले अपराध मानेको छ । तर, देशका विभिन्न क्षेत्रमा यस्ता घटना दोहाेरिँदै आएका छन् । यसअघि जाजरकोट भेरी नगरपालिका- ४, रानागाउँका १९ वर्षीय नवराज विक रुकुमकी सुस्मा मल्लसित विवाह गर्न गएका बेला साथीहरूसहित मारिएका थिए । मन्दिरमा पूजा गर्ने विषयमा विवाद हुँदा गत असाेजमा चितवनको भरतपुर महानगरपालिका-४ का ५८ वर्षीय भीमबहादुर विश्वकर्मा मारिएका थिए ।

प्रकाशित मिति: मंगलबार, पुस ६, २०७८ १३:२४