हुम्ला घटना : ६ दिन बित्यो, भेटिएनन् चन्द्रे कामी

६ दिनदेखि बेपत्ता हुम्लाका चन्द्रे कामी ।

A+ A A-

मुगुकी किशाेरीसँग अन्तर्जातीय विवाह गरेका हुम्लाका चन्द्रे कामी ६ दिनदेखि बेपत्ता छन् । सोरु गाउँपालिका–४, लिब्रुकी १७ वर्षीया रमिला मल्ल (सुन्तली) सँग प्रेम विवाह गरेका चन्द्रेलाई केटी पक्षले २९ मंसिर राति घरबाटै उठाएर लगेका थिए । चन्द्रे हुम्लाकाे सर्केगाड गाउँपालिका-१ जैरका हुन ।

गत बुधबार मध्यरातमा केटीकाे गाउँ लिब्रुबाट आएको समूहले छिमेकीहरूको घरमा ताला लगाएर छोरालाई कुट्दै लगेका चन्द्रेका बुवा धनञ्जय लोहार (कामी)ले बताएका छन् । सोही वडाका अध्यक्ष गोकुल बुढाका अनुुसार भोलिपल्ट घरभन्दा दुई/तीन सय मिटरको दूरीमा चन्द्रेको टिसर्ट भेटिएको थियो ।

चन्द्रेसँग भागी विवाह गरेकी सुन्तलीचाहिँ उनकै घरमा भेटिएकी थिइन् । अहिले सुन्तलीसहित उनका बुवा वीरबहादुर मल्ल हुम्ला प्रहरीको नियन्त्रणमा छन् । मुगु प्रहरीले नियन्त्रणमा लिएर उनीहरूलाई हुम्ला प्रहरीकाे जिम्मा लगाएकाे थियाे । यद्यपि, हुम्लाबाट गएकाे टाेली फर्किसकेकाे छैन ।

चन्द्रेको खोजीमा प्रहरीकाे विभिन्न टाेली खटिएकाे जिल्ला प्रहरी कार्याल हुम्लाका प्रहरी सहायक निरीक्षक बर्मबहादुर राेकायाले जानकारी दिए । उनका अनुसार प्रहरी चाैकी गल्फागाढ र अस्थायी प्रहरी पोस्टबाट तुम्च एक/एक टाेली, जिल्ला प्रहरी कार्यालय प्रकाबाट दुई वटा टोली चन्द्रेकाे अवस्था पत्ता लगाउन सक्रिय छ । 'जिप्रकाबाट पहिला इन्स्पेक्टर दामु पुनको नेतृत्वमा पाँच जनाको टोली गएकाे थियाे । त्यसपछि डीएसपी सा'बको कमाण्डमा आठ जनाकाे टाेली मुगुमै पुगेर खाेजबिन गरिरहेकाे छ । प्रहरी चौकी ताजाकोटकाे टोली । प्रहरी चौकी श्रीनगरबाट समेत एउटा टोली मुगुतिर गएको छ', उनले शिलापत्रसित भने ।

यसैबीच चन्द्रेकाे खाेजी र दाेषीमाथि कारबाही माग गर्दै विभिन्न संघसंस्थाले विज्ञप्ति जारी गरेका छन् ।

नेपाल दलित मुक्ति मोर्चा, श्रमिक समुदाय मोर्चा नेपाल, जात व्यवस्था उन्मुलन मोर्चालगायतले चन्द्रेलाई न्याय माग्दै दाेषीमाथि कारबाही गर्न सम्बन्धित निकायकाे ध्यानाकर्षण गराएका हुन् ।

केही दिनअघि मात्र चन्द्रेकाे टिसर्ट भेटिएकाले चिन्ता थपिएकाे नेपाल दलित मुक्ति मोर्चाका संयोजक टेकबहादुर विकले बताए । ‘गत वर्ष भीमबाहादुुर विक र नवराज विकमाथि पनि यस्तै भयो । हामीले उनीहरूको न्यायको निम्ति सडकमा आन्दोलन गर्‍याैँ । चुस्त अनुसन्धान गर्नुकाे साटाे उल्टै हाम्रा धेरै साथीहरूलाई हिरासतमा लिइयाे । तर अझै न्याय मिलेकाे छैन । चन्द्रे कामीको हकमा पनि त्यस्तै नियती नदोहोरियोस्’, उनले भने ।

दलित मोर्चा पार्टीको बैठक बसेर चन्द्रे कामीको न्यायका लागि सडकमा जाने तयारी गरिएकाे जात व्यवस्था उन्मुलन मोर्चाको कार्यकारी संयोजक राजकुुमार हिमाङले बताए । ‘दलित मुक्ति मोर्चाभित्र हामी १४ वटा संस्था छौँ । बैठक बसेर संयुक्त आन्दोलनका कार्यक्रम घोषणा गर्दैछाैँ', उनले भने ।

प्रकाशित मिति: सोमबार, पुस ५, २०७८ १८:०१