साइकलले भरियो मुख्यमन्त्रीको कार्यालय परिसर

A+ A A-

प्रदेश २ को मुख्यमन्त्री तथा मन्त्रिपरिषदको कार्यालय परिसर यतिबेला साइकलले भरिएको छ ।

मुख्यमन्त्री ‘बेटी पढाऊ, बेटी बचाऊ’ अभियानअन्तर्गत प्रदेश २ का ८ वटै जिल्लामा छात्रालाई प्रदान गर्न साइकल खरिद गरिएको छ । पहिलो चरणमा वितरण गरिने साइकल जनकपुरधामस्थित मुख्यमन्त्री तथा मन्त्रिपरिषदको कार्यालयमा धमाधम तयार गरिँदै छ ।

मुख्यमन्त्री कार्यालयले सामुदायिक विद्यालयमा अध्ययनरत ८ जिल्लाका १४ हजार छात्रालाई साइकल वितरण गर्न लागेको छ । छोरीलाई पढाइमा प्रोत्साहित गर्ने उद्देश्यले पहिलो चरणमा ४ हजार र दोस्रो चरणमा १० हजार साइकल वितरण गर्न लोगेको मुख्यमन्त्री कार्यालयले जनाएको छ ।

‘पहिलो चरणमा ४ हजार साइकल खरिद गरी वितरण गरिने प्रक्रियामा छ,’ अभियानका कार्यक्रम संयोजक प्रियंका यादवले भनिन्, ‘दलित, गरिब, जेहनदार र टाढाबाट आउने विद्यार्थीको नाम विद्यालयले सिफारिस गरेपछि मागअनुसार साइकल उपलब्ध गराउनेछौं ।’

सप्तरी राजविराजकी यादवलाई मुख्यमन्त्री राउतले करारमा नायब सुब्बासरहको पारिश्रमिक दिने गरी मन्त्रालयमा सहजकर्ताका रूपमा भर्ना गरेका छन् ।

रौतहट, बारा र पर्साका विद्यालयका लागि वीरगन्जमा, सर्लाही, महोतरी र धनुषाका विद्यालयका लागि जनकरपुधाममा, सिरहा र सप्तरीका लागि राजविराजमा साइकल राखिएको छ ।

पहिलो चरणमा सामुदायिक विद्यालयको कक्षा ८ देखि १० कक्षासम्म र दोस्रो चरणमा कक्षा १२ सम्मका छात्रालाई साइकल वितरण गरिने योजना रहेको मुख्यमन्त्री कार्यालयले जनाएको छ ।

प्रदेश २ मा अधारभुत तहको पढाइपछि छात्रा विद्यालय छोड्ने संख्या उच्च रहेकाले माध्यमिक तहसम्म छात्रालाई पढन प्रोत्सान गर्न साइकल उपलब्ध गराउन लागिएको बताइएको छ ।

साइकल कस्सिँदै गरेको भए पनि कहिले र कुन कुन विद्यालयका छात्रालाई साइकल वितरण गरिने भन्ने विषयको टुंगो नलागेको यादवले बताइन् ।

‘५ र ६ कक्षा पढदा पढ्दै छोरी विद्यालय जान छोडछन्,’ कृषि तथा सहकारीमन्त्री शैलेन्द्र साहले भने, ‘माध्यमिक स्तरको विद्यालय घरबाट टाढा हुन्छ । टाढा भएकै कारण छोरी विद्यालय जानबाट वञ्चित हुनु परेको छ ।’

प्रदेश २ का मुख्यमन्त्री लालबाबु राउतले ल्याएको ‘बेटी पढाऊ, बेटी बचाऊ’ अभियानअन्तर्गत छोरी बिमा, विद्यालयमा छात्रामैत्री शौचालय र साइकल वितरण कार्यक्रम रहेकाे जानकारी दिए ।

सरकारले छोरी बिमा कार्यक्रममा २० वर्ष १ लाख २५ हजार रकम दिने योजना ल्याएको छ । ‘बेटी पढाऊ, बेटी बचाऊ’ अभियानले प्रदेशमा सामाजिक रूपान्तरणको प्रयास भएको मुख्यमन्त्री राउत बताउँछन् ।

प्रदेशमा बालविवाह, महिला हिंसा र भ्रुण हत्या न्यूनीकरण गरी शिक्षामा छोरीको पहुँच बढाउन अभियान ल्याइएको हो ।

मुख्यमन्त्री तथा मन्त्रिपरिषदको कार्यालयका सूचना अधिकारी पदमप्रसाद पोखरेलका अनुसार मन्त्रालयले विराटनगरका हेलिस इन्टरप्राइजेजलाई साइकल आपूर्ति गर्न टेन्डर दिएको छ ।

‘प्रतिसाइकल ४ हजार २ सयका दरले पहिलो चरणमा ४ हजार साइकल सो इन्टरप्राइजेजले आपूर्ति गर्नेछ,’ सूचना अधिकारी पोखरेलले भने, ‘निर्देशक समितिको बैठक बसेर निर्णय गरेपछि आउँदो १५ असारभित्र ती साइकल वितरण गरिनेछ ।’

प्रकाशित मिति: बुधबार, असार ४, २०७६ १८:१७