कुन्ती शाहीसँग अन्तर्वार्ताः पार्टीको झण्डा बाेकेर हामी सडकमा लड्दा रेखाजी कहाँ हुनुहुन्थ्यो ? (भिडियाे)

कुन्ती शाहीसँग अन्तर्वार्ताः पार्टीको झण्डा बाेकेर हामी सडकमा लड्दा रेखाजी कहाँ हुनुहुन्थ्यो ? (भिडियाे)

A+ A A-

कुन्ती शाही राप्रपामा पुरानो नाम हो । राप्रपा राजनीतिबाटै उनै सभासद्, सांसद हुँदै राज्यमन्त्री बनिन् । पार्टीमा पनि राम्रै भूमिकाहरू पाइन् । प्रमुख सचेत भएर काम गरिन् । उनी जारी एकता महाधिवेशनमा कमल थापाको प्यानलबाट राप्रपा महामन्त्रीमा लड्दैछिन् । उनलाई नेतृ रेखा थापाले चुनौती दिएकी छन् । हुन पनि कमल थापाइतरको प्यानललाई यसपालि कम आँकिएको छैन । यस्तोमा चुनाव जित्न कुन्तीसित केकस्ता आधार छन् ? महामन्त्रीमा जिते के गर्छिन् ? यसबारे शिलापत्रले गरेको संक्षिप्त कुराकानी ।

हुन त तपाईंले राप्रपाबाट राजनीति गरेको लामो समय भयो । तर, यसपालि महामन्त्रीमा लड्न तपाईंलाई रेखा थापाले चुनौती दिइरहनुभएको छ, कसरी लिनुभएको छ ?

तपाईंले ठीक भन्नुभयो । म लामो समयदेखि राजनीतिमा सक्रिय छु । अहिले राप्रपामा युवा, महिलाका लागि जेजति भूमिका, अवसरहरू सिर्जित छन्, त्यसमा मेरो पनि अहम् योगदान छ । जस्तो कि, ३३ प्रतिशत महिलाको आरक्षण सुविधा संविधानमै व्यवस्था गर्न मेरो पनि योगदान छ । अब जहाँसम्म रेखाजीको कुरा छ, उहाँ कलाकारिताबाट राजनीतिमा आउनुभो, उहाँलाई बधाईसँगै स्वागत छ । तर, कलाकारिता गर्नु र राजनीति गर्नु भिन्न कुरा हो । राजनीति फिल्म खेलेजस्तो सजिलो छैन । सच्चा राष्ट्रवादी भएर बाँच गाह्रो छ ।

रेखा थापासित अन्तर्वार्ता- राप्रपालाई कमल थापाको कोठेबारीबाट बाहिर निकाल्नु छ

अस्ति एउटा इन्टरभिउ सुनेकी थिएँ, उहाँ वैशाखमा सुटिङ गर्न जाँदै हुनुहुन्छ । वैशाखमा स्थानीय चुनाव छ । जनताको घरघरमा जानुस् । दूरदराजमा बसेका महिलाहरूका माझमा जानुस् । चुनाव जित्ने, हार्ने त भोलिको कुरा हो । मेरो चाहना, कामना छ उहाँ यो पार्टीमा टिकिरहनुहोस् ।

भनेपछि तपाईं महामन्त्री जित्छु भन्नेमा पूर्ण विश्वस्त हुनुहुन्छ ?

हाम्रो प्यानल विश्वस्त छ । हामी सबैले जित्ने छौँ ।

जित्ने आधार के छन् ?

हामीसँग पार्टीको स्पष्ट नीति छ । यसलाई कसरी व्यवहारतः लागू गर्ने अनुभव छ । प्रतिनिधिहरू साथ छ । तमाम जनताको विश्वास छ । यही नै हामीले चुनाव जित्ने आधार हो ।

अनि रेखा पर्दाबाट निस्केर राजनीतिमा पसिन्

तपाईं कमल थापाको प्यानलमा हुनुहुन्छ, जो वर्षौंदेखि राप्रपाको नेतृत्व गरिरहनुभएको छ । तपाईं स्वयं राप्रपामा दुईपल्ट सांसद हुनुभयो, मन्त्री हुनुभयो । पार्टी, कार्यकर्ताका लागि के गर्नुभयो ?

कमल थापा नभएको भए राप्रपा रहन्थ्यो ? राप्रपा जोगाउन, यसका एजेण्डा स्थापित गर्न, यसलाई अगाडि बढाउन कमल थापाको योगदान भुल्न हुँदैन । उहाँ राजनीतिमा सफा चरित्र भएको व्यक्ति हुनुहुन्छ । उहाँमाथि अनियमितताका आक्षेप छैनन् । जनताका विरुद्धमा चलखेलका गरेका आरोप छैनन् ।

अब मैले पदमा रहँदा के गरेँ भन्ने कुरा त आम प्रतिनिधि र कार्यकर्तामाझ जगजाहेर नै छ । सभासद, सांसद हुँदा पार्टीका एजेण्डालाई संसद्मा दरिलो ढंगले राखेँ । पार्टीको हितविपरीत केही बोलिनँ, गरिनँ । राज्यमन्त्री हुँदा महिला, युवाहरूका लागि सक्दो काम गरेकी छु ।

कमल थापा : राजनीतिमा चतुर, खेलमा कुशल

तपाईंकी प्रतिस्पर्धी रेखाजीले तपाईंलाई आरोप लगाउनुभएको छ, पदमा रहँदा तपाईंले केही नै गर्नुभएन, महिलाहरूको समेत प्रतिनिधित्व गर्न सक्नुभएन ।

कांग्रेस, एमालेजस्ता पार्टीले पनि महिलाका लागि ३३ प्रतिशत आरक्षणको व्यवस्था कार्यान्वयन गरेका छैनन् । म आफैँ महिला संगठनको अध्यक्ष तथा विधान समितिको सदस्य भएको नाताले उम्मेदवारी दिँदा महामन्त्री, उपाध्यक्षसहितका पदमा महिला राख्नैपर्ने बाध्यात्मक व्यवस्था लागू गराउन सफल भएकी छु । म सोध्न चाहन्छु, मैले महिलाका लागि यसरी लडिरहँदा रेखाजी कहाँ हुनुहुन्थ्यो ? सडकमा आन्दोलन गर्दा कहाँ हुनुहुन्थ्यो ?

कमल थापालाई टक्कर दिने राजेन्द्र लिङ्देन काे हुन् ?

प्रतिनिधिले रेखाजीलाई छोडेर तपाईंलाई नै किन चुन्नुपर्ने त ?

उहाँ अहिले राजसंस्थाको वकालत गर्ने पार्टीमा हुनुहुन्छ । तर, गणतन्त्रको पक्षमा उहाँले दिएका अन्तर्वार्ताहरू युट्युबमा छरपस्ट छन् । राजा र हिन्दुत्वको माग राख्दै हामी सडकमा लड्दै गर्दा रेखाजीहरू ज्ञानेन्द्र मान्दिनँ, हिन्दु धर्म मान्दिनँ भनेर हिँड्नुभएको थियो । सडकमा पानी खुवाउने मान्छे थिएन । हावा, ढुंगा, माटो सबैले तिरस्कार गरेका बेला युवा, राजसंस्था र हिन्दुत्वको मुद्दामा दृढ भएर लाग्ने हामी हौँ । यो कुरा प्रतिनिधि साथीहरूले बुझ्नुभएको छ । त्यसैले हामीले नै जित्छौँ भन्नेमा ढुक्क छौँ । विचरा रेखाजीलाई राजनीति थाहै छैन । अब बुझ्नुहुने छ राजनीति के हो ।

प्रकाशित मिति: शुक्रबार, मंसिर १७, २०७८ १८:५१