रेखा थापासित अन्तर्वार्ता- राप्रपालाई कमल थापाको कोठेबारीबाट बाहिर निकाल्नु छ

रेखा थापासित अन्तर्वार्ता- राप्रपालाई कमल थापाको कोठेबारीबाट बाहिर निकाल्नु छ

A+ A A-

फागुन ०७३ को राप्रपा महाधिवेशनमा रेखा थापा अत्यधिक मतका साथ केन्द्रीय सदस्यमा विजयी भएकी थिइन् । त्यो बेला कोमल वली र कुन्ती शाहीलाई समेत पछि पार्ने मत पाएकी रेखाले काठमाडौंमा जारी महाधिवेशनमा आज महामन्त्री पदमा लड्नेगरी नाम लेखाएकी छन् । तर, यसपल्ट उनको प्यानल अलि फरक छ । कमल थापाबाट प्रभावित भएर राजनीतिमा लागेको बताउने रेखा अहिले थापाइतर पक्षबाट महामन्त्री लड्दैछिन् । अर्थात् राजेन्द्र लिङ्देन प्यानलबाट महिलातर्फकी उम्मेदवार हुन् उनी । महामन्त्रीकै उम्मेदवार कुन्ती शाही राप्रपा राजनीतिमा रेखाभन्दा पुरानो नाम हो । सभासद, सांसद, राज्यमन्त्री भइसकेकी कुन्तीलाई रेखाले चुनौती दिएकी छन् । राजनीतिमा करिब खारिएकी कुन्तीलाई नचुनेर प्रतिनिधिले रेखालाई किन छान्ने ? यसबारे रेखासित गरिएको संक्षिप्त कुराकानी :

तपाईंलाई महामन्त्री जित्छुजस्तो लाग्छ ?

जित्छुजस्तो होइन । प्रतिनिधिले मलाई जिताउने कुरामा म विश्वस्त नै छु ।

यति साह्रो आत्मविश्वासको आधार ?

राप्रपामा आवद्ध भएयता राप्रपाको एजेण्डाभन्दा बाहिर नगई, आमकार्यकर्ताको भावनाभन्दा विपरीत नगई, पार्टीको हितविरुद्धका गतिविधिमा संलग्न नभई निरन्तर, इमानदारीसाथ खटेकी छु । युवा र अवसरविहीन कार्यकर्ताको पक्षमा उभिएकी छु । महिलाका हकहित, अवसरका लागि सक्रिय छु । मसँग व्यवहारिक र पार्टीका वास्तविक एजेण्डाहरू छन् । यिनै मुद्दा मेरो आत्मविश्वासको आधार हुन् ।

तपाईंकी प्रतिस्पर्धी कुन्तीजी त झन् लामो समयदेखि राप्रपा राजनीतिमै हुनुहुन्छ । तपाईंसँग त्यस्ता के एजेण्डा छन्, जसलाई देखाएर तपाईं कुन्तीजी भन्दा अगाडि जान सक्नुहुन्छ ?

तपाईंले अझ छुटाउनुभयो । कुन्तीजी दुईपल्ट संसद् छिर्नुभयो । मन्त्री हुनुभयो । पार्टीमा बहुपदीय जिम्मेवारीमा रहनुभयो । तर, यसरी पदमा रहँदा उहाँले आफूजस्ता महिलाका खातिर के गर्नुभयो ? आफूले अवसर पाउँदा यस्तै अवसर आफूजस्ता महिलाका लागि सिर्जना गर्ने कुरामा कति काम गर्नुभयो ? पार्टीमा युवाहरूको भूमिका विस्तार गर्न के गर्नुभयो ? आफ्नो कोठेबारीका सीमित मान्छेलाई बाहेक पार्टीका सच्चा नेता, आम कार्यकर्ताका लागि उहाँले के गर्नुभयो ? त्यो देखाउनुपर्‍यो नि ! अब पुरानो हुँ, अनुभवी छु भनेर आजको युवा अलमलिनेवाला छैनन् । काम गरेर देखाउनुपर्छ । म काम गर्न आएकी हुँ ।

अनि रेखा पर्दाबाट निस्केर राजनीतिमा पसिन्

त्यस्तै कुरा गर्ने हो भने तपाईंले के काम गर्नुभएको छ त राप्रपामा रहेर ?

पार्टीमा नबस्नेले समाजका लागि केही नै गरेका हुँदैनन् त ? म राजनीतिमा आउनुअघि पनि समाजसेवा, अधिकारकै क्षेत्रमा काम गरिरहेकी थिएँ । ग्रामिण महिलाका लागि काम गरेँ । युवा महिला खेलाडीका लागि काम गरेँ । अल्पसंख्यक महिलाको हकहितका लागि बोलेँ, बोलिरहेकी छु । मैले अघि पनि भनेँ, म राप्रपाको त्यस्तो सदस्य हुँ, जो पार्टीको एजेण्डा र कार्यदिशाबाट विल्कुल विचलित नभई सक्रिय छु । म पद नै नहुँदा त जनताकै मुद्दामा काम गरिरहेकी थिएँ भने पदमा पुगेँ भने कुन्तीजी वा कमल थापाजी भन्दा कैयौँ गुणा बढी काम गर्नेछु ।

०७३ को महाधिवेशनमा त्यत्रो मत पाएर निर्वाचित तपाईं बीचमा निस्क्रिय देखिनुभयो । किन ?

म निस्कृय भएकी होइन । मलाई निस्कृय पार्न खोजिएको चाहिँ हो । भूमिका नै दिइएन । अवसर नै दिइएन । मलाई बोलाउँदै बोलाइएन । म पनि पार्टी सदस्य हुँ, त्यस्तो व्यवहार नै गरिएन । सकेसम्म सबै पद आफैँ लिने, उब्रेको आफ्नै घरका, चिनेजानेका, आफ्नो सेवा गर्नेहरूलाई बाँडियो । तर, पद नै नपाउँदा पनि म निस्कृयचाहिँ भइनँ । आम कार्यकर्ताकै माझमा रहेर काम गरेँ ।

कमल थापाबाट प्रभावित भएर राजनीतिमा आएँ भन्नुहुन्थ्यो । अहिले कमल थापाभन्दा फरक प्यानलमा जानुभयो, अवसरकै लागि त होइन ?

अवसरका लागि भए त मलाई कमल थापातिर बस्दै फाइदा थियो होला नि ! त्यसैले अवसरका लागि होइन । पार्टीले तय गरेको बाटो छोडेकाले मैले कमल थापाको साथ छोडेकी हुँ । उहाँहरूले पार्टीमा मनलाग्दी गर्नुभयो । आफूनजिकका मान्छेलाई सदस्यता बाँड्ने, आफ्नै मान्छेलाई उम्मेदवार बनाउनेजस्ता पार्टी हितविपरीतका काम गर्नुभयो । आम कार्यकर्ताको भावनामाथि खेलवाड गर्नुभयो । संविधानमाथि पार्टीको प्रष्ट असन्तुष्टि हुँदाहुँदै यही संविधानअनुसार बनेको सरकारमा दौडेर जानुभयो । अन्तर्राष्ट्रिय समुदायमाझ गएर यसलाई विश्वकै उत्कृष्ट संविधान भन्दै हिँडनुभयो । राजसंस्थालाई धोका दिनुभयो ।

म त एक अभियन्ताकै रूपमा सक्रिय हुनु चाहन्थेँ । उपल्लो पदमा नरहेरै पनि पार्टीमा योगदान गर्ने योजनामा थिएँ । तर, मलाई पार्टीभित्रै युवा, महिला साथीहरूले उठ्न आग्रह गर्नुभयो । कुन्तीजीले पदमा हुँदा आफूहरूका लागि देखाउन मिल्ने काम नगरेको गुनासो पोख्नुभयो । मैले पनि सोचेँ, राजनीति भनेको सेवा नै हो, अभियान नै हो । त्यसैले म प्रतिनिधि, कार्यकर्ता साथीहरूको भावनालाई सम्मान गर्दै महामन्त्री लड्न लागेकी हुँ ।

कमल थापालाई टक्कर दिने राजेन्द्र लिङ्देन काे हुन् ?

राजेन्द्र लिङ्देनकै प्यानलचाहिँ किन रोज्नुभयो ?

प्रस्ट छ, राजेन्द्र लिङ्देन राप्रपाका इमानदार नेतामध्ये एक हुनुहुन्छ । अझ म उहाँलाई राप्रपामा बाटो नबिराएका नेता मान्छु । उहाँको विचार, व्यवहार युवामैत्री छ । मजस्तै समान अवसरको हिमायती हुनुहुन्छ । धेरै वर्षदेखि नातावाद, कृपावादमा रुमल्लिएको पार्टीलाई उद्धार गर्नसक्ने साहस र क्षमता उहाँसँग छ । एजेण्डा बेच्नेहरूविरुद्ध संघर्ष गर्ने हिम्मत, तागत छ ।

तपाईंको टिभी अन्तर्वार्ताको क्लिप रिट्विट गरेर कमल थापाले ‘हा..हा नो कमेन्ट’ लेख्नुभएको छ । हेर्नुभयो ?

हेरेँ । उहाँबाट यस्तो अपेक्षा मैले गरेकी थिइनँ ।

राजावादी पार्टीमा बसेर तपाईं गणतन्त्र रोज्ने त ?

तपाईंलाई स्मरण गराउन चाहन्छु, एकताअघिको राप्रपा प्रजातान्त्रिकले गणतन्त्र स्वीकारेको थियो । म त्यही खेमाबाट कमल थापाहरूसँग मिसिएकी हुँ । अहिले हामी सबै राजतन्त्रको पक्षमा बिनादोधार उभिएका छौँ । राजसंस्थाको एजेण्डाप्रति दृढ छौँ । हामीलाई लाग्छ, यो नै देशको आवश्यकता हो ।

कमल थापा : राजनीतिमा चतुर, खेलमा कुशल

अब तपाईं नै भन्नुहोस्, राजतन्त्र मासेको संविधानमा लाहा छाप लगाउने कमल थापा हुन् कि होइनन् ? गणतन्त्रका ठेकेदारहरूको कोठेबारीमा माली बन्ने कमल थापा हुन् कि होइनन् ? राप्रपाको कार्यदिशालाई रद्दीको टोकरीमा हाल्ने कमल थापा हुन् कि होइनन् ? उहाँले त व्यवहारमै गणतन्त्रवादीहरूलाई सघाउनुभएको छ । राजतन्त्रलाई धोका दिनुभएको छ । मैले के बोलेँ, त्योभन्दा धेरै ठूलो अपराध त उहाँले पार्टीको मर्ममाथि गर्नुभएको छ । उहाँले शायद भुल्नुभयाे, गणतन्त्र नेपालको उपप्रधानमन्त्री भएकाे कुरा । जाे राजसंस्थालाई पुनर्स्थापित गर्न हिँड्नुभएकाे थियाे, गणतन्त्र नेपालकाे उपप्रधानमन्त्री भएर याे संविधान त विश्वकै उत्कृष्ट हाे भन्दै हिँडेकाे कुरा उहाँले भुल्नुभयाे ? मेराे व्यवहार त्यस्ताे छैन । पार्टीकाे एजेण्डा जे छ, त्याेभन्दा टसमस हुने छैन । जनतालालाई, पार्टीलाई धाेका दिने छैन ।

तपाईंले जित्नुभयो राप्रपाले के पाउँछ ?

पार्टीको मूल एजेण्डा, मूल्यमान्यता, कार्यकर्ताको भावनाप्रति दृढ र इमानदार नेतृत्व पाउँछ । हाम्रो प्यानलले जित्यो भने सबैभन्दा पहिला एक व्यक्ति एक पदको मान्यतालाई स्थापित गराउँछौँ । सबैलाई समान अवसरको वातावरण बनाउँछौँ । कार्यकर्ताले सर्वथा गुनासो गरिरहनुपर्ने स्थितिको अन्त्य गर्छौँ । चुनाव आउँदैछ । हाम्रा प्रस्ट एजेण्डा लिएर जनमाझाझ जानेछौँ । राप्रपालाई एउटा बलियो वैकल्पिक शक्तिका रूमा अघि सार्छौं । अनि एजेण्डा स्थापित गराउने छाैँ । (तस्वीरः सुशील श्रेष्ठ)

प्रकाशित मिति: शुक्रबार, मंसिर १७, २०७८ १८:४९