लेवान्डाेस्कीबाट मेस्सीले यसरी फुत्काए बालोन डी'ओर

A+ A A-

गत सिजनको ला लिगामा बार्सिलोनाको प्रदर्शन झुर थियो । एकपछि अर्को लज्जास्पद हारले टिम बदनाम हुँदै थियो । बलियो प्रतिस्पर्धीसँग म्याच परेका बेला अक्सर समर्थकको प्रार्थना हुन्थ्यो– आज बार्सिलोनाले धेरै गोल नखाओस् ।

यसमा खेलाडी र व्यवस्थापन दुवैको कमजोरी थियो । यही बेला संघर्षरत टिमलाई एक्लै सम्हाले लियोनल मेस्सीले ।

लिगमा ३० गोलको स्कोर बनाएर ३४ वर्षे मेस्सीले पीचीची ट्रफी जिते । गोल असिस्ट गर्ने खेलाडीको सूचीमा पनि उनी शीर्ष रहे । सुरुबाटै धर्मराएको बार्सिलोनालाई उनले लिग त जिताउन सकेनन् तर उपाधिहीन बाहिरिनबाट जोगाए ।

मेस्सीकै बलबुतामा बार्सिलोनाले एथलेटिको बिलबाओबाट कोपा डेल रेको उपाधि उम्कायो ।

अर्जेन्टिनी मेस्सी विश्व फुटबलका सर्वश्रेष्ठ खेलाडीहरूमध्ये एक हुन् । पीएसजीबाट व्यावसायिक फुटबल खेल्ने यी स्टार खेलाडीको नाममा कैयौँ उपाधि, कीर्तिमान् छन् । अझ भनाैँ, क्लब फुटबलमा यस्तो कुनै उपाधि छैन, जुन मेस्सीले नजितेका हुन् । देशको कुरा गर्दाचाहिँ मेस्सीको उपाधि महिमा अधुरै हुन्थ्यो । किनकि, उनले आफ्नो देश अर्जेन्टिनालाई अन्तर्राष्ट्रिय उपाधि जिताउन सकेका थिएनन् । र, याे कुरालाई लिएर मेस्सी सधैँ चिन्तित थिए ।

सन् २०१६ को काेपा अमेरिका फाइनलमा हारेपछि त उनले राष्ट्रिय टोलीबाट संन्न्यास नै लिएका थिए । पछि उनी राष्ट्रिय टाेलीमा फर्किए । सन् २०२१ काे कोपा अमेरिका टुर्नामेन्टमा भने मेस्सीले देशलाई उपाधि जिताए ।

उनकै कप्तानीमा अर्जेन्टिनाले २८ वर्षपछि कोपा अमेरिकाको उपाधि जित्यो । सर्वाधिक गोल, सर्वाधिक असिस्ट, प्लेयर अफ द टुर्नामेन्टको उपाधि जितेर मेस्सीले साबित गरिदिए, उनी किन संसारका उत्कृष्ट खेलाडी हुन् ।

अर्जेन्टिनालाई अन्तर्राष्ट्रिय उपाधि जिताएसँगै मेस्सी ‘ग्रेटेस्ट अफ अल टाइम’ सूचीको एक नम्बरमा परे । उतिबेलै मेस्सीले सातौँ पटक बालोन अवार्ड पक्का गरेका थिए । २४ जून १९८७ मा अर्जेन्टिनाको रोसारियोमा जन्मेका मेस्सी ३४ वर्षका भए । मेस्सीको कप्तानीमा अर्जेन्टिना चार पटक अन्तर्राष्ट्रिय उपाधिनजिक पुगेर घर फर्केको थियो ।

मेस्सीलाई सातौँ पटक बालोन डी–ओर अवार्ड

बालोन फुटबलको सबैभन्दा ठूलो व्यक्तिगत अवार्ड हो । फ्रान्स फुटबलले वर्षको अन्तिममा दिने यो अवार्ड खेलाडीको व्यक्तिगत प्रदर्शन र टिमले जितेको ट्रफीका आधारमा तय गरिन्छ । ला लिगामा जितेको ट्रफी र कोपा अमेरिकाको उपाधिपछि मेस्सीले बालोन डी ओरको रेसमा आफूलाई अगाडि ल्याएका थिए ।

तर, भुल्न नहुने कुरा के छ भने, बालोन डी'ओरले खेलाडीको प्रदर्शनलाई त मूल्याङ्कन गर्छ नै, सँगै यो एक ‘पपुलारिटी कन्टेस्ट’ पनि हो । खेल पत्रकार, राष्ट्रिय टिमका कप्तान र प्रशिक्षकहरूको भोट यसमा अहम् हुन्छ । फुटबलमा लियोनल मेस्सीको फ्यान बेस सबैभन्दा बढी छ । व्यक्तिगत र टिमको उपलब्धि त छँदै थियो । दुवै कुराले उनलाई साथ दिएकाले बालोन डी'ओर उनका लागि पक्का थियो, जुन हिजो उनले बुझेका छन् । मेस्सीले ६ सय १३ अंक पाउँदा लेवान्डोस्कीले ५ सय ८० र जाेर्गिन्होले ४ सय ६० अंक पाए ।

यसअघि सन् २००९, २०१०, २०११, २०१२, २०१५ र २०१९ को अवार्ड पनि मेस्सीले नै लगेका थिए । मेस्सी यस्ता खेलाडी हुन्, जसले बालोन सबैभन्दा बढी जितेका छन् । अहिले उनी पीएसजीका लागि खेल्छन् । उनी पीएसजीमा बालाेन अवार्ड जित्ने एक्ला खेलाडी हुन् । बताइन्छ, समकालीन खेलाडीमा बालाेन डी'ओर अब मेस्सीले जति अरूले जित्न असम्भवजस्तै छ ।

अभागी लेवान्डोस्की

बालोन डी'ओरको रेसमा बायर्न म्युनिखका रोबर्ट लेवान्डोस्की अभागी साबित भए । अघिल्लो वर्ष कोरोना महामारी नभएको भए, बालोन जित्ने खेलाडीको सूचीमा उनको पनि नाम सम्भवतः लेखिन्थ्यो । किनकि, त्यो वर्षका उत्कृष्ट खेलाडी उनी निर्विकल्प थिए । तर, कोरोनाले त्यस्तो सम्भावना तुहाइदियो । महामारीका कारण अघिल्लो वर्ष अवार्ड रद्द गरियो ।

तिम्रो मेस्सी को हो ?

यो वर्ष पनि उनको व्यक्तिगत प्रदर्शन कमजोर थिएन । तर, टिमको खराब प्रदर्शनले अवार्ड रेसमा उनी कमजोर बन्न पुगे । च्याम्पियन्स लिगमा बायर्न पहिल्यै बाहिरियो । युरोकपमा पोल्याण्डले झुर खेल्यो । बालोन डी'ओरमा लेवान्डोस्कीको सम्भावना न्यून हुनुमा कारण यही बन्यो । यसपालि उनले 'स्ट्राइकर अफ दि इयर' मा चित्त बुझाए ।

अनि कान्टे पछि परे

युरो कप हुनुअघि फ्रान्सका एनगोलो कान्टे पनि बालोन डी'ओरका बलियो दाबेदार मानिएका थिए । उनले चेल्सीलाई च्याम्पियन्स लिग जिताएका थिए । उपाधि भिडन्तमा म्यान अफ म्याच घोषित कान्टेको आरोलो यात्रा युरोकपमा आएर सुरु भयो । युरोकपमा फ्रान्सले राम्रो प्रदर्शन गर्नै सकेन । जसका कारण उनी बालोन डी'ओरको रेसमा कमजोर बन्न पुगे ।

जाेर्गिन्हाे पनि अभागी

बरु युरोकपपछि बालोन डिओर अवार्ड जित्ने सम्भावना भएका खेलाडीको सूचीमा इटालीका जाेर्गिन्हाे छिरे । चेल्सीलाई च्याम्पियन्स लिग, इटालीलाई युरोकप जिताएपछि उनी पहिलोपल्ट बेलोन डी'ओरको रेसमा आएका थिए । तर, बालोन डी'ओर जित्न केवल व्यक्तिगत प्रदर्शन र टिमको उपाधिले काम गर्दैन । लोकप्रियता पनि अहम् हुन्छ । बालोन सूचीमा पर्ने खेलाडीमध्ये जाेर्गिन्हाे सबैभन्दा कम पपुलर खेलाडी हुन् । यो लिस्टमा उनको फ्यान बेस दमदार नभएकाले नै उनी बोलोन डी'ओरको रेसमा कमजोर बने ।

पाँच पटकका विजेता छैटौँमा खसे

बालोन डी'ओर अवार्डको सूची क्रिस्टियानो रोनाल्डोको नामबिना पूरा हुनै सक्दैन । पाँचपल्ट यो अवार्ड जितिसकेका रोनाल्डो यसपल्ट भने उत्कृष्ट पाँचभित्र पनि पर्न सकेनन् ।

डी–ओर अवार्डकाे छैटौँ स्थानमा रोनाल्डो

युरोकपमा ५ गोल र एक असिस्ट गरेका उनले गोल्डेन बुट जितेका थिए । तर, युभेन्टस र पोर्चुगल दुवै टिमको खराब प्रदर्शनपछि रोनाल्डो बालोन डी'ओरको उत्कृष्ट पाँचमा समेत अटाएनन् । उनी हिजाे अवार्ड वितरण समाराेहमा देखिएनन् ।

महिलातर्फको बालोन डी'ओर बार्सिलोनाकी एलेक्सिया पुटेलासकाे नाममा रह्याे । बार्सिलोनाका मिडफिल्डर पेड्री यू-२१ को उत्कृष्ट खेलाडी बन्दै कोपा ट्रफी जिते । इटालीका गोलकिपर जियानलुगी डोनारुम्माले यासिन ट्रफी हात पारे । चेल्सी क्लब अफ दि इयर बन्याे ।

प्रकाशित मिति: मंगलबार, मंसिर १४, २०७८ १२:२२