१४ वर्षमा हिरोइन बनेकी करिश्मा, जो अभिनेत्री शब्दको पर्याय बन्न पुगिन्

A+ A A-

अभिनेत्री करिश्‍मा मानन्धरको नामसँगै जोडिएर आउने एउटा विशेषण छ । त्‍यो हो, 'सदावहार सुन्दरी' ।

उमेरले ५ दशकको नजिक पुगिसकेकी करिश्‍माको सुन्दरताको चर्चा अहिले पनि उस्तै छ । कुनै एउटा यस्तो समय थियो, जुन बेला हिरोइन भनेको नै करिश्मा मानन्धर हुन् भन्ने गरिन्थ्यो । हो पनि, एउटा हिरोइनमा हुनुपर्ने सम्पूर्ण गुण थियो उनमा ।

शिलापत्र सर्भे नतिजा: महानायकमा राजेशलाई ९२ प्रतिशत भोट, महानायिकामा छानिइन् करिश्‍मा

करिश्माले कलिलो उमेरमा नै अभिनययात्रा सुरु गरिन् । १४ वर्षे उमेरमा उनी हिरोइन बनिसकेकी थिइन् । २०४२ सालमा रिलिज भएको फिल्म 'सन्तान'मा काम गर्दा उनी भर्खरै १४ वर्षकी थिइन् ।

'सन्तान' रिलिजपश्चात् अभिनेत्री करिश्माले करिअरमा पछाडि फर्किनु परेन । झण्डै तीन दशकको समय उनले फिल्मक्षेत्रमा राज गरिन् । 'मायालु', 'कस्तुरी', 'ट्रक ड्राइभर', 'पन्छी', 'साथी', 'वसन्ती' आदि फिल्मले उनको चर्चालाई सेलाउन दिएनन् ।

करिश्माले धेरै सफल फिल्ममा काम गरेकी छिन् । विशेषत: अभिनेता राजेश हमालसँगको केमिस्ट्रीलाई दर्शकले खुबै रुचाए । निर्माता-निर्देशक पनि राजेश र करिश्मालाई लिएर फिल्म बनाउन लालायित नै थिए ।

फिल्मक्षेत्रमा आउनुपूर्व करिश्माको परिचय फरक थियो । काठमाडौंको बत्तीसपुतलीमा हुर्किरहेकी उनको परिचय बुनु केसीको मात्र थियो ।

उनै बुनुलाई फिल्मबारे ज्ञान थिएन । फिल्म खेल्नेसम्मको सोच राख्न सक्ने भएकी पनि थिइनन् । तर, उनका छिमेकी प्रकाश अधिकारीले बुनुमा हिरोइन बन्ने क्षमता देखे । जो आफैँ फिल्मका लागि संघर्ष गरिरहेका थिए ।

उनै प्रकाशले बुनुलाई प्रकाश थापासँग भेट गराए । जो फिल्म ‘सन्तान’को तयारीमा थिए । प्रकाशले बुनुको स्क्रिन टेस्ट लिए । स्क्रिनमा पनि उत्तिकै राम्री देखिएपछि प्रकाशले बुनुलाई करिश्मा बनाएर 'सन्तान'बाट फिल्मक्षेत्रमा डेब्यु गराए ।

उनै करिश्माले फिल्मक्षेत्रमा लामो समय जादु छरिरहिन् ।

अमेरिका बस्नुपर्दा

नेपाली फिल्मक्षेत्रमा करिश्मा मानन्धरको बोलवाला चलिरहेकै थियो । फिल्ममा उनको माग राम्रै थियो । तर, यो सबै चर्चालाई भुलेर करिश्मा अमेरिका पुगिन् ।

२०६१ सालमा करिश्मा अमेरिकामा पुगिन् । पाँच वर्षभन्दा लामो समय उनले उतै बिताइन् ।

अमेरिका उडेकी करिश्माको नेपालमा धेरै आलोचना भयो । करिश्मा भने आफू 'रिफ्रेस' हुन अमेरिका पुगेको बताउँदै आएकी छिन् । उनी भन्छिन्, 'एक्सन/कटमा मात्रै मैले लामो समय बिताइसकेकी थिएँ । त्यही चोभार, नगरकोट र पोखराबाहेक अन्त पुग्न पाइएको थिएन । त्यसैले केही समय आराम गर्छु र नयाँ ठाउँ घुम्छु भनेर अमेरिका गएकी थिएँ ।'

अमेरिका बसाइ करिश्माका लागि शान्तिको बसाइ थिएन । उनको तन अमेरिका भए पनि मन सधैँ नेपाली फिल्मबाट हट्न सकेको थिएन । 'म अमेरिकामा बस्दा पनि नेपाली फिल्मलाई नै सम्झिरहन्थेँ', करिश्माले भनिन् ।

किताब पढ्न रुचाउने करिश्मालाई कर्ण शाक्यको एक पुस्तकले नेपाल फर्किन हुटहुटी पैदा गरायो ।

‘पुस्तकमा जब मान्छे विदेश जान्छ, ऊ रुटलेस, नेमलेस र फेसलेस हुन्छ । त्यो ठाउँमा तिमी आफूलाई कसरी टिकाउन सक्छौ भनेर लेखिएको थियो', करिश्मा भन्छिन्, 'उक्त लाइनले मलाई निकै छोयो । म बस्ने धर्ती त नेपालै हो भनेर फर्किएँ ।’

नेपाल फर्किएर करिश्मा पुनः फिल्मक्षेत्रमा नै सक्रिय रहिन् । अभिनयदेखि फिल्म निर्माणसमेत गरिन् । तर, फिल्मबाट उनले अपेक्षित चर्चा भने पाएकी छैनन् । बरु उनलाई पढाइ र राजनीतिले चर्चामा ल्याइरहेको छ ।

कसले भन्यो महानायिका ?

आजभन्दा १५ वर्षअगाडि अभिनेता राजेश हमाललाई प्राविधिक संघले 'महानायक'को उपाधि दियो । एक कार्यक्रमका बीच राजेशलाई महानायक बनाइएको थियो ।

सोही कार्यक्रममा प्राविधिक संघले अभिनेत्री करिश्मा मानन्धरलाई पनि 'महानायिका' घोषणा गर्ने तयारी गरिरहेको थियो । तर, कार्यक्रमको समयमा करिश्मा विवादमा तानिन पुगिन् । अन्तत: प्राविधिक संघले राजेशलाई मात्र 'महानायक' घोषणा गरेर 'महानायिका' घोषणालाई स्थगित गर्‍यो ।

यसबीचमा करिश्‍मा अमेरिका पलायन भइन् । प्राविधिक संघले पनि उनको खासै खोजी गरेन ।

झण्‍डै १ वर्षअगाडि 'आरके इन्टरटेन्टमेन्ट ग्रुप'ले करिश्मालाई महानायिका घोषणा गरिदियो । फिल्मक्षेत्रमा पुर्‍याएको योगदानलाई सम्मान गर्न 'महानायिका' घोषणा गरिएको आयोजक संस्थाको भनाइ थियो ।

करिश्मालाई अभिनेता राजेश हमालले नै महानायिकाको स्यास लगाइदिएका थिए । महानायिकाको उपाधि पाउँदा खुसी थिइन्, करिश्‍मा ।

महानायककाे विगत : राजेशले फिल्म खेल्छु भनेपछि बुवासँग बोलचाल नै बन्द भयो

करिश्माले महानायिकाको उपाधि पाएपछि धेरैले आलोचना गरे । कतिपयले करिश्मालाई महानायिका नमान्ने तर्क राखे, कतिपयले उपाधि दिने संस्थामाथि नै प्रश्न गरे ।

महानायिकामा अभिनेत्री गौरी मल्ल, अभिनेत्री रेखा थापालगायतका नाम सुनिए ।

०००

कलिलो उमेरदेखि नै फिल्मक्षेत्रमा सक्रिय करिश्माले फिल्मक्षेत्रमा आफ्नो ऊर्जाशील समय खर्चिएकी छिन् । झण्डै २५ वर्षको समय उनले फिल्मक्षेत्रलाई दिएकी छिन् ।

करिश्मा अभिनेत्रीको पर्यायवाचीजस्तै हुन् । जहाँ नेपाली अभिनेत्रीहरूको कुरा आउँछ, त्यहाँ करिश्माको नाम जोडिएकै हुन्छ ।

सुन्दरताले मात्र होइन, अभिनय र नृत्यमा पनि पोख्त करिश्मालाई नयाँ पुस्ताका धेरै अभिनेत्रीहरूले आफ्नो आइडल मान्छन् । अभिनेत्रीहरूको परिचय बिस्तारमा करिश्माले ठूलो योगदान दिएकी छिन् ।

यी र यस्तै कारणले पनि करिश्मालाई 'महानायिका' मान्न सकिन्छ । शिलापत्रले हालै गरेको सर्भेमा दर्शकले समेत करिश्मालाई नै महानायिका चुनेका छन् ।

प्रकाशित मिति: बिहीबार, मंसिर ९, २०७८ ०८:४४