शिलापत्र सर्भे नतिजा: महानायकमा राजेशलाई ९२ प्रतिशत भोट, महानायिकामा छानिइन् करिश्‍मा

शिलापत्र सर्भे नतिजा: महानायकमा राजेशलाई ९२ प्रतिशत भोट, महानायिकामा छानिइन् करिश्‍मा

A+ A A-

शिलापत्रले गत १४ असोजमा महानायक तथा महानायिकाको विषयमा मत बुझ्ने प्रयासले एक सर्भे सुरु गरेको थियो । महानायक र महानायिकाको विवाद चर्किरहेको समयमा शिलापत्रले दर्शकलाई नै महानायक तथा महानायिका छान्ने अवसर दिएको थियो ।

भोटिङ सुरु भएको ५७ दिनपश्चात् हामीले महानायक र महानायिकाको नतिजा सार्वजनिक गरेका छौँ ।

दर्शकले महानायकमा अभिनेता राजेश हमाललाई छनोट गरेका छन् । प्राप्त कुल भोटमा ९२.१ प्रतिशतले राजेशलाई महानायक मानेका छन् । अभिनेता भुवन केसी र अभिनेता शिव श्रेष्ठको पक्षमा समान २.३ प्रतिशत भोट प्राप्त भएको छ । बाँकी भोट अन्य अभिनेताको नाममा छ ।

महानायकको वैकल्पिकका रूपमा अभिनेता विपिन कार्की, दयाहाङ राईलगायतलाई दर्शकले छनोट गरेका छन् ।

महानायक किन मान्नुहुन्छ भन्ने प्रश्नमा भने दर्शकको विशेषत: दुई जवाफमा बढी भोट गरेका छन् । 'फिल्मक्षेत्रमा अनुकरणीय योगदान दिएकाले'मा ५७ प्रतिशत भोट आएकाे छ भने 'क्षमतावान् भएकाले'मा ३४.५ प्रतिशत भोट प्राप्त भएको छ ।

बाँकी भोट 'धेरै फिल्ममा काम गरेकाले', 'बौद्धिक तथा सकारात्मक सोच भएकाले', 'शानदार व्यक्तित्व भएकाले' तथा 'सदावहार फिल्म दिएकाले' जस्ता जवाफमा दर्शकले मत हालेका छन् ।

त्यस्तै, महानायिकाको रूपमा दर्शकले करिश्मा मानन्धरलाई छानेका छन् ।

प्राप्त कुल भोटको ४३.२ प्रतिशत भोट करिश्माको पक्षमा छ । उनकी प्रतिस्पर्धी अभिनेत्री रेखा थापाले २४.३ प्रतिशत भोट पाएकी छिन् भने अभिनेत्री गौरी मल्ललाई २१.४ प्रतिशतले भोट गरेका छन् ।

दर्शकले अन्यमा पनि धेरै भोट गरेका छन् । कसैले भने नेपालमा महानायिका हुन याेग्य अभिनेत्री नै नभएको तर्कसमेत गरेका छन् । महानायिकामा भुवन चन्द, मिथिला शर्मा, निरुता सिंहदेखि स्वस्तिमा खड्कासम्मको नाम लिएका छन् ।

'महानायिका किन मान्ने' भन्ने प्रश्नमा दर्शकले ४७.४ प्रतिशत भोट 'फिल्मक्षेत्रमा अनुकरणीय योगदान दिएकाले' भन्ने जवाफमा दिएका छन् । त्यस्तै, 'क्षमतावान् भएकाले' भन्ने जवाफमा ३८.४ प्रतिशत भोट प्राप्त भएको छ । दाेस्राे जवाफमा रेखा थापाले राम्रै मत पाएकी छन् ।

महानायिका छान्नुको कारणमा कसैले सुन्दरता पनि रहेको जवाफ दिएका छन् । बौद्धिकता तथा व्यवहारलाई पनि दर्शकले महानायिका छान्नुको कारण उल्लेख गरेका छन् ।

सर्वेक्षण विधि

नेपाली सिनेजगतमा ‘महानायक’ र ‘महानायिका’ बारे लामै समय विवाद भयाे । यसबारे भइरहेका तर्कवितर्क निचोडोन्मुख थिएन । जसले, जसलाई, जहाँबाट पनि महानायक वा महानायिका घोषणा गर्ने सिलसिला चलिरहेकाे थियाे । यही सन्दर्भमा शिलापत्रले यसबारे सर्वेक्षण गरी नेपाली फिल्मका शुभचिन्तकहरूको मत बुझ्ने प्रयास गर्‍याे । र्‍यान्डम स्याम्पलिङका आधारमा अनलाइनमार्फत पाठकबीच यो सर्वेक्षण गरिएको थियो ।

सर्वेक्षण फारम भर्न तोकिएको अवधि (१४ असाेज–८ मंसिर) मा पाठकको उत्साहजनक सहभागिता रह्यो अनलाइनमार्फत भरिएका १ हजार ५३ फारमहरू शिलापत्रले प्राप्त गरेको छ । त्यही संख्यालाई आधार मानेर तथ्यांक प्रशोधन गरिएको छ । शिलापत्रको यो सर्वेक्षणमा फारम भरेर सहयोग गर्नुहुने देशविदेशमा रहनुभएका सबै पाठकप्रति हामी आभारी छौँ । यस्तै जनचासो, सामाजिक सन्दर्भ र राष्ट्रिय राजनीतिका विविध विषयमा आगामी दिनमा शिलापत्रले सर्वेक्षणलाई निरन्तरता दिनेछ ।

प्रकाशित मिति: बिहीबार, मंसिर ९, २०७८ ०८:१४