खुला सर्वेक्षण : तपाईं नै छान्नुहोस् महानायक र महानायिका

A+ A A-

नेपाली सिनेजगत् केही समययता ‘महानायक’ र ‘महानायिका’ बहसको वरिपरि छ । तर, यसबारे भइरहेका तर्कवितर्क निचोडोन्मुखचाहिँ देखिँदैनन् । त्यसैले जसले, जसलाई, जहाँबाट पनि महानायक वा महानायिका घोषणा गर्ने सिलसिला जारी छ।

यस क्रममा सामाजिक सञ्जालमा बारम्बार विवाद अनि छेडछाड हुने गरेको छ । केही महिनाअघि महानायकबारेको अभिव्यक्तिकै कारण अभिनेत्री दीपाश्री निरौलाले असह्य गाली खाएकी थिइन् ।

कसरी पाउँछन् कलाकारले उपाधि ?

विश्वकै ठूलाे फिल्म उद्याेगमध्ये एक मानिएको बलिउडमा अमिताभ बच्चन शताब्दी महानायक मानिएका छन् । यो उपाधि अमिताभबाहेक अरू कुनै अभिनेताको नामकाे अगाडि कसैले उच्चारण गरेको पाइँदैन । यसको अर्थ सिङ्गो बलिउडले उनलाई महानायक स्वीकारेको छ । रेखा, हेमा मालिनी, श्रीदेवी र माधुरी दीक्षित त्यहाँका दिग्गज अभिनेत्री हुन् । यद्यपि, उनीहरूलाई कसैले ‘महानायिका’ भनेको सुनिँदैन । तर, हाम्रोजस्तो साँघुरो फिल्मक्षेत्रमा महानायक र महानायिकाहरूको संख्या ६ पुगिसकेको छ । यो उपाधिका लागि तानातान, भनाभन चलिरहेको छ ।

अभिनेताहरू राजेश हमाल, भुवन केसी र शिव श्रेष्ठलाई उनीहरूका शुभचिन्तकले महानायक मान्छन् । तीन दशकदेखि फिल्मक्षेत्रमा सक्रिय राजेशले २ सय २० भन्दा बढी फिल्ममा काम गरेका छन् । भुवनको नाममा ५० भन्दा बढी फिल्म छन् । उनकाे सिनेयात्रा झण्डै चार दशक पुरानो हो ।

उपाधिमा खेलाँची: मनलाग्दी बनाइँदैछ महानायक र महानायिका

२०३८ सालतिर जीवन रेखा फिल्मका लागि भुवन र शिव अडिसन दिन गएका थिए । भुवनलाई उछिनेर त्यो फिल्मका लागि छानिएका शिवले पनि ५० भन्दा बढी फिल्ममा काम गरेका छन् ।

राजेशलाई केही वर्षअघि एक टेलिभिजनकर्मीले ‘महानायक’ घोषणा गरिदिएका थिए । भुवनलाई उनका शुभचिन्तकले अनि शिवलाई भुवनले महानायक भनिदिए ।

अभिनेत्रीहरू करिश्मा मानन्धर, गौरी मल्ल र रेखा थापालाई तिनका समर्थकले ‘महानायिका’ मान्छन् । ३४ वर्षअघि सन्तान फिल्मबाट डेब्यु गरेकी करिश्माले ७० भन्दा बढी फिल्ममा काम गरेकी छन् ।

करिश्मासँगै सिनेयात्रा थालेकी गौरीले ५५ फिल्ममा अभिनय गरेकी छन् । दुई दशकदेखि चलचित्रक्षेत्रमा सक्रिय रेखाले यस अवधिमा झण्डै १ सयवटा फिल्ममा काम गरेकी छन् । गाैरी र करिश्मा लामाे समय अमेरिका बसेर नेपाल फर्केका हुन् । रेखा कलाकारितासँगै राजनीतिमा समेत सक्रिय छिन् ।

करिश्मालाई केहीअघि आरके इन्टरटेन्मेन्ट नामको संस्थाले महानायिका उपाधि दिएको थियो । रेखालाई उनका फ्यानहरूले धेरै हिट फिल्म र छोटो समयमा पाएको चर्चाका कारण महानायिका भन्छन् । गौरीलाई अभिनेताद्वय भुवन र शिवले महानायिका बनाएका हुन् ।

तर, यी सबैलाई दिइएको पदवी निर्विवाद छैन । न त महानायक, महानायिका बनेका वा बनाउनेहरूले उपाधि पाउने/दिने चित्तबुझ्दो आधार नै देखाउन सकेका छन् । यो भुलभुलैयामा फिल्मप्रेमी रनभुल्ल छन् ।

बलिउडमा दर्शकले नै अमिताभलाई महानायक चुनेका थिए । नेपालमा पनि त्यसै गर्नुपर्ने आवाज नउठेको होइन । तर, फिल्मक्षेत्रमा सक्रिय ठूला र जिम्मेवार संघ, संगठन, निकाय यसमा अघि सरेका छैनन् । बरू आ–आफैँ महानायक र महानायिका घोषणा गर्दै हिँडेका छन् ।

यही सन्दर्भमा शिलापत्रले नेपाली फिल्मका शुभचिन्तकहरूको मत बुझ्ने प्रयास गरेकाे छ । यो एकखाले सर्वेक्षण नै हो । यसमा सहभागीले स्वतन्त्र मत जाहेर गर्न पाउँछन् । खासमा महानायक/महानायिका को-काे हुनुपर्छ, किन हुनुपर्छ भन्नेमा सहभागीले भोट गर्नुपर्ने हुन्छ । महानायक र महानायिकाका लागि अघि आएका नामहरूमध्ये एक/एक जनालाई छान्न पाइन्छ ।

तपाईं छान्नुहोस्, महानायक र महानायिका :

Loading…

प्रकाशित मिति: बिहीबार, असोज १४, २०७८ १६:५३