आफूले पाएको 'महानायक' उपाधिको आफैँ खिल्ली उडाउँदैछन् राजेश हमाल

A+ A A-

उही पुरानो भाषा दोहोर्‍याऊँ- कुनै एउटा यस्तो समय थियो, जति बेला राजेश हमालको टाउको बिक्थ्यो । पोस्टरमा राजेशको टाउको देख्नासाथ हलमा दर्शक खचाखच हुन्थे । निर्माताको गोजी गह्रुँगो हुन्थ्यो ।

राजेश त्यस बेला फिल्मक्षेत्रमा प्रवेश गरे, जति बेला यस क्षेत्रमा लागेर भविष्य सुनिश्चित गर्न सकिन्छ भन्ने कुरामा शंका थियो । एउटा फिल्म बनेपछि अर्को फिल्म बन्न लामो समय कुर्नुपर्थ्यो । रहरैरहरमा राजेश यस क्षेत्रमा छिरे ।

डेब्यु फिल्म 'युगदेखि युगसम्म'बाटै राजेश चम्किए । त्यसपश्चात् त उनको हातमा फिल्मको कमी नै भएन । फिल्महरू निरन्तर बन्न थाले । निर्माताहरू राजेशको समय पाउन एक वर्षसम्म कुर्थे ।

त्यो व्यस्ततामा राजेश यसरी चुके कि उनले झुर-झुर फिल्ममा पनि काम गरे । त्यसैले त राजेशका हिटभन्दा फ्लप फिल्महरू बढी छन् । करिअरको उत्तरार्द्धमा राजेशलाई एक टेलिभिजन कार्यक्रममा 'महानायक'को उपाधि दिइयो । तुरुन्तै चलचित्र प्राविधिक संघले पनि उनलाई 'महानायक'ले नै सम्बोधन गरिदियो । त्यसपश्चात् त राजेश 'महानायक'कै रूपमा चिनिन थाले ।

तर, राजेशको 'महानायक' उपाधि विवादरहित भने छैन । उनले खेलेका फिल्महरूको संख्याकै आधारमा उनलाई महानायक मान्दिनँ भन्ने फिल्मकर्मीहरू पनि छन् । हिट फिल्म कम भएका कारण पनि राजेशको 'महानायक' पदवीमाथि प्रश्न उठ्ने गरेको छ ।

आफूले पाएको उपाधिमा प्रश्‍न उठिरहँदा राजेश भने मौन छन् । किनकि, उनलाई विवादमा मुछिनु छैन । उनका शुभचिन्तकहरूले नै राजेशको बचाउमा बोलिदिन्छन् ।

लकडाउनको समयकै कुरा सम्झौँ न । निर्देशक दीपाश्री निरौलाले राजेशको 'महानायक' उपाधिमा प्रश्न गर्दा राजेशका समर्थकले उनलाई डिप्रेसनमा नै जाने गरी गाली गरे । राजेशले दीपाश्रीलाई माफी देऊबाहेक एक शब्द बोलेनन् ।

तीन दशकको फिल्मयात्रामा राजेशले गजबको फ्यान-फलोइङ बनाएका छन् । जसको पुष्टि उनको समर्थनमा आउने प्रतिक्रियाहरूले गर्छन् ।

तर, अब राजेशलाई सजिलो छैन । 'जस्तो पायो त्यस्तै' म्युजिक भिडियोमा काम गरिरहेका राजेशसँग उनका शुभचिन्तकहरू खुसी छैनन् । महानायक उपाधि पाइसकेका राजेशले लोकगीत तथा आधुनिक गीत मात्र होइन, 'जेपिटी गीत'हरूमा पनि काम गरिरहेका छन् । जसका कारण उनका शुभचिन्तकहरू रुष्ट छन् ।

'नाच न कान्छी' गीतको भिडियोमा राजेश हमाल र मोडलहरू ।

पछिल्लो समय सार्वजनिक भएको गीत 'नाच न कान्‍छी'का कारण त धेरै जनाले राजेशको आलोचनासमेत गरेका छन् । एक दर्शकले प्रतिक्रिया दिएका छन्, 'महानायक राजेश हमालप्रति उच्च सम्मान छ । एउटा सुझाव- यस्तो हावा भिडियो गर्नुभन्दा सामाजिक काममा लागे हुन्थ्यो ।'

अर्का एक प्रयोगकर्ताले लेखेका छन्, 'राजेश दाइ, आफ्नो स्ट्याण्डर्ड मेन्टेन गर्नुस् । किन यस्तो गीतमा नाचेको ?'

अर्का एक प्रयोगकर्ताले सुझावसहित लेखेका छन्, 'अब राजेश दाइ चुजी हुनैपर्छ । दर्शकले तपाईंलाई आइडल तथा महानायक मानेका छन् । आफ्नो स्ट्याण्डर्डलाई उच्च नै राख्नुस् ।'

यी सबै आलोचनाको राजेशलाई मतलब छैन । कसैले यस्तो किन गरेको भन्ने प्रश्न गरे भने राजेश ढुक्क जवाफ दिन्छन्, 'मैले आजसम्म हिपहप गीतमा काम गरेको थिइनँ । यस्तोमा काम गर्ने रहर थियो, त्यसैले गरेको हुँ ।'

राजेशको यही जवाफमा पनि धेरैले आलोचना गरेका छन् । राजेशले चाहेको भए योभन्दा धेरै राम्रो हिपहप गीतमा नै काम गर्न सक्थे तर त्यसमा राजेशले ध्यान नपुर्‍याएको भन्दै धेरैले प्रतिक्रिया दिइरहेका छन् ।

राजेशले नयाँ पुस्ता भनेर यस्ता-यस्ता व्यक्तिसँग काम गरेका छन्, जो भाइरल भएकै भरमा चलिरहेका छन् । टिकटकबाट आएका मोडलदेखि युट्युबबाट जन्मिएका भाइरलसम्म राजेशले स्क्रिन शेयर गरेका छन् ।

युट्युबबाट भाइरल भएका सचिन परियार, कमला घिमिरेदेखि टिकटकबाट आएकी गरिमा शर्मासम्मसँग राजेशले कम्मर मर्काएका छन् । अझ, 'नाच न कान्छी'मा त राजेशले सबै नयाँ मोडलसँग स्वीमिङ पुलमा नाचेका छन् ।

राजेशले आफ्‍नो 'नातिनी'को उमेरका मोडलहरूसँग पनि जोडी नै बाँधेर काम गरेका छन् । जुन कुरालाई धेरैले स्वीकारेका छैनन् ।

समकालीन करिश्‍मा मानन्धरले नै राजेशसँगको भेटमा मिडियासामु भनेकी थिइन्, 'म्युजिक भिडियो पनि खेल्नु । तर, नातिनीको उमेरकाहरूसँग ननाच्नू । लाज हुन्छ ।'

एक भिडियोमा भाइरल ब्वाइ सचिन परियारसँग राजेश हमाल ।

राजेशले जवाफमा भनेका थिए, 'मैले पुरानो पुस्ताका धेरै अभिनेत्रीहरूसँग काम गरिसकेँ । अब मलाई नयाँ पुस्तासँग पनि काम गर्ने रहर लाग्यो । त्यसैले काम गरिरहेको छु ।' राजेशले धेरै ठाउँमा धेरै पटक यो जवाफ दोहोर्‍याएका छन् ।

अहिले त राजेशलाई आरोप लाग्न थालेको छ- 'पैसाकै लागि काम गर्छन् राजेश हमाल ।'

तर, राजेश यस कुरालाई स्वीकार्न कहिल्यै तयार देखिएनन् । अभिनयको भोक जागेकाले आफूले म्युजिक भिडियोमा काम गरेको जवाफ उनले दिने गरेका छन् । तर, यो जवाफलाई सहज स्वीकार्न सक्ने अवस्था नै छैन ।

राजेश पछिल्लो समय फिल्‍मक्षेत्र तथा अभिनयबाट निष्क्रिय नै थिए । पछिल्ला फिल्महरू बक्स अफिसमा 'डिजास्टर' भएपछि राजेशले फिल्मक्षेत्रबाट विश्राम नै लिएका थिए ।

यसबीचमा उनलाई केही राम्रो ब्यानरका फिल्मबाट पनि अफर आएको थियो । तर, उनले ती फिल्म अस्वीकार गरे । यसबाट बुझ्‍न सकिन्छ, राजेशमा अभिनयको त्‍यस्तो भोक छैन ।

राजेश फिल्म 'सत्यम'मा अनुबन्धित छन् । जसको छायांकन चाँडै सुरु हुँदैछ । अभिनयको भोक उनले फिल्ममा पोख्न सक्थे । तर, उनमा त्यो धैर्यता पनि देखिएन । उनीले जेपिटी काम नै गरे ।

त्यसैले त अहिले राजेशको महानायक उपाधिमाथि धेरैले नकारात्मक टिप्पणी गरिरहेका छन् । अहिले त राजेशलाई 'म्युजिक भिडियोको महानायक' पो भन्न थालेका छन् ।

म्युजिक भिडियोमा राजेशको फिल्मकै हालत छ- चर्चा हुन्छ, तर सबै फ्लप । राजेशले आफ्नो भिडियोमा भ्युज जम्मा गर्नै सकेका छैनन् ।

०००

अहिले महानायक र महानायिकाको विषयमा विवाद सिर्जना भएको छ । एक कार्यक्रममा अभिनेता भुवन केसीले अर्का अभिनेता शिव श्रेष्ठलाई महानायक बनाइदिए । उनले शिवलाई महानायक मात्र बनाएनन्, राजेशले पाएको उपाधिमाथि अर्को दाबेदारी थपिदिए । भुवन आफैँमा महानायकको दाबेदार मानिन्छन् ।

यता उनै भुवन र शिवले महानायिकाको उपाधि गौरी मल्ललाई भिराए । अहिले महानायिकाको उपाधि पनि बहसको विषय छ ।

सामाजिक सञ्जालमा अहिले कतिपयले शिवलाई महानायक स्वीकारेका छन् । यो बहस चर्किरहेको समयमा राजेश मौन छन् । उनका समर्थक पनि केही बोलेका छैनन् । सायद, राजेशको पछिल्लो क्रियाकलापबाट दर्शक रुष्ट भएकै कारण अहिले उनको पक्षमा आवाज उठेको छैन ।

प्रकाशित मिति: मंगलबार, असोज ५, २०७८ १९:३०