महानायककाे विगत : राजेशले फिल्म खेल्छु भनेपछि बुवासँग बोलचाल नै बन्द भयो

A+ A A-

बाल्यकालदेखि नै पढाइमा तेज राजेश हमालले कहिल्यै अभिनेता बन्छु भन्ने सपना देखेका थिएनन् । उमेर बढ्दै गएपछि उनले अभिनेता बन्नेबाहेक विकल्प देखेनन् ।

फिल्म हेर्न रुचि राख्ने राजेशलाई आफू पनि पर्दामा देखिने रहर जाग्यो । उनले सोचे, 'म नेपाली फिल्ममा हिरो बन्छु ।'

परिवारलाई राजेशले फिल्ममा काम गर्ने कुरा चित्त बुझेको थिएन । राजेशले फिल्म खेल्ने कुराले त बुबासँग बोलचाल नै बन्द गर्नुपरेको थियो ।

शिलापत्र सर्भे नतिजा: महानायकमा राजेशलाई ९२ प्रतिशत भोट, महानायिकामा छानिइन् करिश्‍मा

राजेशले यस्तो बेलामा फिल्मक्षेत्रमा प्रवेश गरेका थिए, जुन समय नेपाली फिल्मक्षेत्रको चित्र निकै धमिलो थियो । यसै क्षेत्रमा लागेर जीवन चलाउँछु भनेर ढुक्क हुन सक्ने अवस्था नै थिएन । मुख्य कुरा, फिल्म नै बन्ला वा नबन्ला भन्ने प्रश्न थियो ।

त्यही प्रश्न र शंकाका बीच राजेशले फिल्ममा काम गर्ने निधो गरेका थिए । उनको रहरको अगाडि कसैको केही लागेन ।

राजेश भन्छन्, 'मेरो उमेर धेरै भएको थिएन । केही वर्ष फिल्मक्षेत्रका काम गरेर हेरौँ न भन्ने लागेर फिल्मक्षेत्रमा आएको थिएँ । म आएपछि फर्किनु परेन ।'

राजेशले फिल्म 'युगदेखि युगसम्म'बाट फिल्मक्षेत्रमा डेब्‍यु गरे । जसको निर्देशन राजेशका मामा दीपक रायमाझीले गरेका थिए ।

राजेश यस फिल्म गर्नुअगाडि दीपक रायमाझीकै एक फिल्ममा अनुबन्धित भएका थिए । तर, छायांकनको बीचबाट नै अभिनेत्रीसँगको प्रेमचर्चाका कारण उनी 'आउट' भएका थिए ।

फिल्म 'युगदेखि युगसम्म' रिलिज भएपछि राजेशको लुक्स, कपाल, एक्सनदेखि बोलीको सम्म प्रशंसा भयो । राजेशको तुलना बलिउडका स्टार अभिनेताहरूसँग पनि हुन थाल्याे । राजेश दंग परे ।

'त्यो सफलता पाउँछु भन्ने लागेर काम गरेको थिइनँ', राजेश भन्छन्, 'तर, पहिलो फिल्मबाटै जुन चर्चा पाएँ, त्यसका कारण पनि फिल्मक्षेत्र छोडेर जान सकिनँ ।'

फिल्म बन्नका लागि वर्षौं कुर्नुपर्ने समयमा राजेशले भने निरन्तर फिल्ममा काम गर्ने मौका पाए । डेब्यु गरेको अर्को वर्षमा नै राजेशका तीन फिल्म रिलिज भए ।

देउकी, देउता, चट्याङ, अधिकारजस्ता फिल्ममा काम गरिसक्दा राजेश सुपरस्टार भइसकेका थिए । फिल्म निर्माण गर्न डराइरहेका निर्माताहरू पनि राजेशलाई लिएर फिल्म बनाउन लालायित बने ।

क्रेज र आरोप

एउटा यस्तो समय आयो, जुन समय राजेश हमालको टाउको बिक्थ्यो । मतलब, कुनै फिल्मको पोस्टरमा राजेश हमालको टाउको देखियो भने त्यसले हलमा मारामार व्यापार गर्थ्यो ।

राजेशको त्यो क्रेज देखेका निर्माताहरू सकेसम्म फिल्म खेलाउन चाहन्थे । नसके राजेशलाई विशेष भूमिकामा भए पनि आफ्नो फिल्ममा राख्थे नै ।

दर्शकमाझ राजेश निकै लोकप्रिय थिए । किनकि, राजेशले आमदर्शकको कथा बोल्थे, त्यस्तै भूमिका निर्वाह गर्थे । कहिले भरिया बन्थे, गोठालो बन्थे, गरिब बन्थे । पुलिस बने भने पनि समाजकै पक्षमा लड्थे ।

राजेश भन्छन्, 'मैले हासिल गरेको ठूलो उपलब्धि भनेको मलाई फिल्मक्षेत्रले आमनेपाली समुदायसँग नजिक बनाइदियो । मैले उहाँहरूकै आवाज, उहाँहरूकै कथा, उहाँहरूकै दुःख भन्दै गर्दा उहाँहरूले मलाई आफ्नो प्रिय पात्र मान्नुभयो । उहाँहरूले मलाई मनैदेखि माया गर्नुभयो ।'

करिअरको उच्च विन्दुमा रहेकै समयमा राजेशलाई एउटा आरोप लाग्यो- फिल्म छान्न जानेनन् ।

राजेश भने यस कुरामा आफ्नो बचाउ गर्छन् । अहिले राजेशले भन्ने गरेका छन्- 'मलाई त्यो बेला झुक्याइयो । जोसुकै निर्माता-निर्देशकले खतरा फिल्म बनाउँछु भन्नुहुन्थ्यो, कथा पनि सुन्दा राम्रै लाग्थ्यो, बनाउन सुरु भएपछिचाहिँ अर्कै बन्थ्यो ।'

१४ वर्षमा हिरोइन बनेकी करिश्मा, जो अभिनेत्री शब्दको पर्याय बन्न पुगिन्

तर, राजेश आफूले नराम्रो फिल्ममा काम गरेँ भनेर कुनै दुःख मान्दैनन् । बरु उनी गर्व गर्छन् । त्यसको पनि जवाफ छ उनीसँग ।

राजेश एउटा फिल्ममा काम गर्दा सयौँ व्यक्तिले रोजगारी पाउँथे । अर्कालाई रोजगारी दिनैका लागि पनि आफूले फिल्ममा काम गरिरहेको राजेशको तर्क छ ।

मैले त्यो बेला धेरैभन्दा धेरै फिल्म बनोस् भन्ने सोचेँ । धेरैभन्दा धेरै फिल्म बने भने नै यसक्षेत्रको विकास हुन्छ र टिक्छ भन्ने लाग्यो', राजेश भन्छन्, 'मलाई लिएर फिल्म बनाउन चाहने निर्माताहरूलाई पनि हतोत्साहित गरिनँ । धेरै चलचित्र बन्दा धेरै व्यक्तिले काम पाउनुहुन्थ्यो । त्यसका लागि पनि काम गरेँ ।'

अनि भन्न थालियो 'महानायक'

करिब १५ वर्षअगाडि फर्कौं । टीभी कार्यक्रम 'रजतपट'मा पहिलो पटक राजेशलाई 'महानायक' सम्बोधन गरिएको थियो । त्यसको लगत्तै प्राविधिक संघले राजेशलाई महानायक घोषणा गरिदियो ।

यसरी राजेशलाई दिइएको महानायक उपमालाई दर्शकले सहजै स्वीकारे । तर, फिल्मकर्मीले नै बेला-बेला उनको उपमाप्रति प्रश्न गरिरहे । त्यसको सिलसिला जारी नै छ ।

लकडाउनको समयमा निर्देशक दीपाश्री निरौलाले एक टीभी कार्यक्रममा राजेश हमालको महानायक उपाधिमा प्रश्न गरिन् । जसका कारण राजेशका समर्थकबाट दीपाश्रीले यति गाली सहनुपर्‍यो कि, उनी डिप्रेसनमा नै पुगिन् ।

केही समयअगाडि निर्देशक शोभित बस्नेतले पनि राजेश हमाललाई महानायक नस्वीकार्ने भन्दै तर्क राखे । त्यो मात्र होइन, उनले भुवन केसीलाई महानायक घोषणा गरिदिए । राजेशलाई महानायक भनेको नरुचाउने भुवनले पनि जोसैजोसमा शिव श्रेष्ठलाई महानायक सम्बोधन गरिदिए ।

यो कुरा पनि राजेशका शुभचिन्तकलाई पाच्य भएन । शोभितको निर्देशन तथा शिव-भुवन अभिनित फिल्म 'डाँडाको वरपीपल'लाई बहिष्कार अभियान नै चलाए । उक्त फिल्मको प्रचार सामग्रीमा डिसलाइकको ट्रेन्ड चल्यो ।

अन्तत: शोभितले राजेशलाई महानायक स्वीकारे । सुनिन्छ, अहिले भुवन र शोभितबीच राम्रो सम्बन्ध छैन ।

०००

नेपाली फिल्मक्षेत्रमा सबैभन्दा चिनिएका अभिनेता नै राजेश हमाल हुन् । यसमा कुनै शंका छैन । धेरै फिल्ममा काम गरेर होस् वा अन्य विभिन्न कारणबाट होस् राजेशले आम-दर्शकमा आफ्नो गतिलो छाप बनाएका छन् ।

त्यति मात्र होइन, फिल्मक्षेत्रमा नै काम गरेका विभिन्न व्यक्तिहरूले पनि राजेशलाई महानायक स्वीकार्छन् । उनको व्यक्तित्व र उनले गर्ने व्यवहारका कारण पनि राजेशलाई महानायक स्वीकार्छन् ।

राजेशले फिल्म खेलिदिएकै कारण कोही निर्देशक बन्न पाएका छन्, कोही निर्माताले राम्रो पैसा कमाउन सकेका छन् । उनीहरूले सधैँ राजेशलाई सम्मानका साथ महानायक पुकार्छन् ।

हमाल आउनुपूर्व नेपाली फिल्म अन्योलको अवस्थामा थियो । नेपाली फिल्मलाई चलायमान बनाउन र व्यावसायिकतामा लैजान राजेशको ठूलै हात छ । उनलाई खेलाएपछि दर्शक आउँछन् भन्ने विश्वासमा पनि धेरै निर्माताले फिल्ममा लगानी गरेका छन् । यसले नेपाली फिल्मको संख्यात्मक वृद्धि गर्‍यो ।

यसअर्थ, राजेशले नेपाली फिल्मक्षेत्रलाई अतुलनीय योगदान दिएका छन् । यी र यस्तै कारणले पनि राजेश 'महानायक' बन्न र भनिन लायक छन् । शिलापत्रले हालै गरेको सर्भेमा दर्शकले समेत राजेश हमाललाई अत्यधिक मतका साथ महानायक चुनेका छन् ।

प्रकाशित मिति: बिहीबार, मंसिर ९, २०७८ ०८:३१