कुमारी बैंकको १९ करोड प्रकरण : सीआईबीले अनुसन्धान सक्यो, राष्ट्र बैंक स्थलगत निरीक्षणमै

कुमारी बैंकको १९ करोड प्रकरण : सीआईबीले अनुसन्धान सक्यो, राष्ट्र बैंक स्थलगत निरीक्षणमै

A+ A A-

बैंकिङ किर्ते मामिलामा केन्द्रीय अनुसन्धान ब्युराे (सीआईबी)ले कुमारी बैंकमा कार्यरत कर्मचारीहरूमाथिकाे छानबिन प्रकिया सकेको छ । गायक योगेश्वर अमात्यको जग्गाको नक्कली लालपुर्जाका आधारमा १९ करोड रुपैयाँ ऋण दिएको अभियोगमा कुमारी बैंकका दुई कर्मचारीसहित ५ जना ( ऋण अधिकृत सोनु ठाकुर, मूल्याङ्कनकर्ता राजेश चौरसिया, जग्गा व्यापारी कुसन प्रधान, एसके महर्जन र मुक्तिलाल गौतम) लाई पक्राउ गरिएको थियाे।

कुमारी बैंकका पर्सा शाखाका सहायक म्यानेजर राजेश शाह, जग्‍गा कारोबारी सोभा श्रेष्ठ र अन्य दुई जना भने भागेका छन् ।पक्राउ परेका पाँच जनाको अनुसन्धान सकेपछि भागेका चार जनासहितलाई प्रतिवादी बनाएर आइतबार सरकारी वकिलको कार्यालयमा बुझाउने तयारी गरेको सीआईबीका प्रमुख, डीआईजी धीरजप्रताप सिंहले शिलापत्रलाई जानकारी दिए ।

४ कात्तिकदेखि नै नक्कली लालपुर्जा प्रकरणमा पक्राउ गर्न सुरु गरिएको थियाे । सीआईबीले अनुसन्धानको लागि पाउने २५ दिनको समय सकिन थालेकोले आइतबार नै सरकारी वकिलको कार्यालयमा दर्ता गरिने बताइएको छ ।

यता नेपाल राष्ट्र बैंकले भने स्थलगत निरीक्षणको काम नै सकेको छैन । राष्ट्र बैंकका अधिकारीहरूले यो प्रकरणलाई निकै चासोसँग हेरिएको र अन्य विषयमा पनि हुन सक्ने कमजोरीलाईसमेत ध्यानमा राखेर निरीक्षण गरेको बताएका छन् ।

गत बुधबारदेखि राष्ट्र बैंकले स्थलगत निरीक्षण गरेकाेमा अहिले पनि निरक्षणकर्ताहरू फिल्डमै रहेको राष्ट्र बैंकका निर्देशक नारायणप्रसाद पोखरेलले जानकारी दिए । 'अहिले पनि स्थलगत निरीक्षणको काम जारी रहेको छ, स्थलगत निरीक्षण टोलीले कस्तो फाइन्डिङ निकाल्छ त्यस आधारमा दोषीउपर राष्ट्र बैंकले पनि आवश्यक कदम चाल्ने छ', पोखरेलले भने ।

राष्ट्र बैंकका अधिकारीहरूले अनुसन्धान सकिन कम्तीमा एक साताको समय लाग्न सक्ने बताएका छन् ।

कायममुकायम सीईओ तिमिल्सिनामाथि पनि अनसुन्धान

सीआईबीको टोलीले कुमारी बैंकका कायममुकायम सीईओ अनुजमणि तिमिल्सिानामाथि पनि अनुसन्धान गरे पनि प्रतिवादीका रूपमा उनको नाम नराखेको स्रोतले बताएका छन् । यद्यपि सरकारी वकिलकाे कार्यालयले फाइल फिर्ता गरेर थप अनुसन्धान गर्न दिएमा उनको नाम पनि जान सक्ने देखिएको छ भने सरकारी वकिलकाे कार्यालयकै तर्फबाट सीईओको भूमिका देखिएमा अदालतमा प्रतिवादी बनाएर पेस गर्न सकिने आधार रहेको छ ।

एक करोडमाथिको ऋणका लागि सीईओको नै स्वीकृति चाहिने र त्यस क्रममा उनले स्वीकृति दिएका कारण जिम्मेवार बन्नुपर्ने बैंककै अधिकारीहरूको माग रहेको छ । यस विषयमा राष्ट्र बैंकले पनि अनुसन्धान गर्ने जनाएको छ ।

कतिपयले सीईओकै दबाबमा कागजपत्रको राम्ररी अध्ययन नगरी ऋण दिएको समेत बताएका छन् ।

गुपचुप राख्‍ने प्रयास तर भयो असफल

स्रोतका अनुसार नक्कली लालपुर्जा राखेर ऋण प्रवाह भएको भन्ने विषयमा कुमारी बैंकको उच्च व्यवस्थापनलाई थाहा भइसकेको थियो । यो विषय जानकारीमा आएपछि पनि बैंकले न त प्रहरीलाई खबर गर्‍यो नत नियमनकारी निकाय नेपाल राष्ट्र बैंकलाई नै ।

बैंकका डेपुटी सीईओ मनिष तिमिल्सिनाले ऋण सेटलमेन्ट गर्नको लागि प्रहरीलाई खबर नगरेको बताएका छन् । उनले बैंकलाई यो ऋण उठाउने कसरी भन्ने चिन्ता भएकोले ऋण उठाउनतर्फ लागेको प्रतिक्रिया दिए ।

केही सयमअघि मात्रै यस्तै विषयमा बैंक अफ काठमाडौंका तत्काली सीईओ अजय श्रेष्ठले सजाय भोगेको सन्दर्भमा कुमारी बैंकले भने विषय गुपचुप राख्ने प्रयास गरेको हाे । ऋण सेटल भइसकेपछि पनि दोषी उपर कारबाही हुन आवश्यक ठानेर गायक अमात्यले उजुरी दिएका थिए । २ कात्तिकमा उनले उजुरी दिएर ४ कात्तिकबाट पक्राउ प्रकिया सुरु गरिए पनि २३ कात्तिकसम्म गुपचुप नै रहेको थियो । २३ कात्तिकमा शिलापत्रले नक्कली लालपुर्जा राखेर ऋण दिएको र ऋण दिनेलाई पक्राउ गरेको विषय उठान गरेको थियो ।

१० साउनमा अमात्यको बाराको विश्रामपुरमा बिरुवा भूमि वनकाली कम्पनीको नाममा रहेको १२ बिघा जग्गा डायनिल कम्पनीको नाममा रहेको भन्दै नक्कली कागजात बनाएर काठमाडौंका कुसन प्रधान, ललितपुरका एसके महर्जन, मुक्तिलाल गौतमले कुमारी बैंक शाखा पर्साबाट १९ करोड रुपैयाँ ऋण लिएका थिए ।

सो किर्ते अभियोगमा प्रहरीले हाल बैंकका पर्सा शाखाका लोन अधिकारीसहित पाँच जनालाई पक्राउ गरिसकेको छ । सीआईबीले उनीहरूलाई विभिन्न मितिमा पक्राउ गरेको हो । अमात्यको जग्गाको नक्कली लालपुर्जा बनाउने गिरोहका मुख्य नाइके कुसन प्रधान भएको खुलेको छ ।

सम्बन्धित समाचार

प्रकाशित मिति: शनिबार, कात्तिक २७, २०७८ १३:१७