ब्लाइण्ड डेटः थानकोटसम्म केटाको लाइन लगाइदिने शीलुदेखि स्कुटर काण्डसम्म हेरेपछि...

ब्लाइण्ड डेटः थानकोटसम्म केटाको लाइन लगाइदिने शीलुदेखि स्कुटर काण्डसम्म हेरेपछि...

A+ A A-

‘जब देवेन्द्रजीको इन्ट्री भयो, मलाई यस्तो फिल भयो, योजस्तो लक्की केटा यो वर्ल्डमै छैन । किनकि मजस्तो ब्युटिफुल केटीसँग यो डेटमा आइरा’छ । जबकि मेरा रियल फ्यान्सलाई मैले बालै दिँदैन । लाइनै लगाए पनि नयाँ बानेश्वरदेखि थानकोटसम्म पुग्छ ।’

अलि पछि '१५ हजारकाे म फाउन्डेसन लगाउँछु । त्यसै यस्ताे ब्राइट फेस हुन्छ ? लिपस्टिकै कुरा गर्दा पाँच/छ हजारकाे एउटा लिपस्टिक हुन्छ । मेराे हेयर कलरकै कुरा गर्ने हाे भने नाै/दस हजारकाे एउटा कलर हुन्छ । त्यसमा पनि मैले मन्थ्ली चेञ्ज गर्छु । एकचोटि लगाएको कपडा म दुईचोटि लाउँदैन । त्यो मैले आफूले आफूलाई इस्टेब्लिस गरेको छु ।'

निषेधाज्ञाले सारा मानिस घरमा थुनिनुपरेका बेला एउटी युवतीले माथिको डायलग बोलेको भिडियो क्लिप टिकटक, फेसबुकतिर भाइरल थियो । उनले स्ट्याण्ड अप कमेडीको कुनै क्लिप्समा भोइसओभर गरेजस्तो लाग्यो ।

यही जिज्ञासाले मलाई युट्युबसम्म पुर्‍यायो । कि-वर्ड सर्च गरेँ, ‘नयाँ बानेश्वरदेखि थानकोट’ । ठ्याक्कै त्यही क्लिप भेटियो । तर, त्यहाँ त्यो भिडियोको स्रोत र युवतीको नाम थिएन । अनि कमेन्ट सेक्सनमा छिरेँ । बल्ल थाहा भयो, युवतीको नाम रहेछ शीलु पोखरेल अनि त्यो कुनै स्ट्याण्ड अप कमेडी नभएर युट्युब बेस्ड रियालिटी शो ब्लाइण्ड डेटको क्लिप रहेछ । एक वर्षअघि अमेरिकन टीभी सेरिज ‘ब्लाइण्ड डेट’ को केही एपिसोड युट्युबमा हेरेको थिएँ । निकै मन परेको थियो ।

ब्लाइण्ड डेट भनेकै एकअर्कालाई नचिनेका केटाकेटीबीच कुनै एकान्तमा हुने भेटघाट हो । यस क्रममा उनीहरूबीच रुचि, बेरुचि, भावनाबारे खुलेर कुराकानी हुन्छ । तपाईंमध्ये कतिपयलाई थाहा हुनुपर्छ, बेलायतका पूर्वराजकुमार ह्यारी र अमेरिकी अभिनेत्री मेघन मार्कलबीचको सम्बन्ध ब्लाइण्ड डेटबाट सुरु भएको थियो । तर, यो डेट कुनै रियालिटी शोमा थिएन । साथीले मिलाइदिएको रियल ब्लाइण्डेट थियो । पछि उनीहरूले बिहे गरे । मेघनका लागि ह्यारीले बकिङ्घम दरबार त्यागिदिए ।

उस्तै जोडी परे ब्लाइण्ड डेट शो हेर्न कम्ता स्वाद पर्छ र ! एकाएक मेरो अपेक्षा बढ्ता भइहाल्यो ।

र, युट्युबमा नेपाली ब्लाइण्ड डेट शो सर्च गरेँ । लौ, यो त युट्युबमा बबाल भ्युज भएको शो पो रहेछ ! नेपालको पहिलो डेटिङ रियालिटी शो । म छक्क परेँ । किनकि, त्यति चर्चित नेपाली शोबारे म त्यो बेलासम्म बेखबर थिएँ । अचम्मको कुरा त के भने, ती माथिकी शीलु पोखरेललाई रोस्ट गरेर कतिपयले युट्युब नै मनिटाइज गरिसकेछन् । ‘नेपाली क्राइम पेट्रोल’ चलाउने अमृत नामका युट्युबरले शीलु र देवेन्द्रबारे भिडियो बनाएर राम्रै सब्स्क्राइबर बटुले । सुजन श्रेष्ठले पनि युट्युबमा ‘ब्लाइण्ड डेट रियाक्सन’ भिडियो बनाएर अच्छा डलर झारे । सुजनले बनाएका अक्सर भिडियो रमाइला लाग्छन् । ब्लाइण्ड डेटले नै मलाई उनको युट्युब च्यानलसम्म पुर्‍याएको हो । खासमा जब १४ फेब्रुअरीमा यो शोको टिजर रिलिज भयो, त्यो नै भाइरल बनेको थियो । त्यसबेला भिडियो हेरे पनि वास्ता गरिएन ।

मैले सर्च गर्दासम्म ब्लाइण्ड डेटको १०औँ एपिसोड अपलोड भइसकेको थियो । मैले केही भिडियो हेरेँ । रियालिटी शो भनिए पनि कुनै एपिसोड यस्तो लागेन, जुन स्क्रिप्टेड होइन । अनि कहिलेकाहीँ कन्टेन्ट र क्यारेक्टर पनि झुर नै लाग्यो । यो शोचाहिँ सुपरहिट सिनेमा नेपालले उत्पादन गर्दो रहेछ । उसैको युट्युब च्यानलमा गएर भिडियोहरू हेर्न सकिन्छ ।

आजकल यो शो टेलिसिरियलजस्तै बनिसकेको छ । यो यस्तो कार्यक्रम हो, जुन युट्युबमा आइसक्दा ट्रोल, मिम, रोस्ट गर्नेहरूको मसला बनिसक्छ । टिकटकमा भाइरल हुन्छ । शो हेर्नेहरू सामाजिक सञ्जालमा स्टाटस लेखेर आफ्ना प्रतिक्रिया जाहेर गर्न थाल्छन् ।

सोलपेनकेक नामको युट्युब च्यानलबाट अमेरिकी ब्लाइण्ड डेटका केही एपिसोड हेर्दा त्यो साँच्चै रोमान्टिक लागेको थियो । फेरि त्योचाहिँ स्क्रिप्टेड होइन भन्न खोजेको होइन । शो हेर्दा लाग्थ्यो, जेसुकै होस्, राम्रो छ । मैले नभेट्टाएको हुन सक्छु, हेरेकामध्ये कुनै पनि एपिसोडमा झैझगडा गरेको र एकले अर्कालाई होच्याएको देखिनँ । कसैले भेट्नुभयो भने पठाइदिनु होला, तिनिहरू झगडा गर्दा कुन तहसम्म झर्दा रैछन् हेर्न मन लागेको छ ।

नेपाली ब्लाइण्ड डेट शोमा हुने हर्कतको त कुरा गरिसाध्य छैन । उनसीहरू डेट बस्छन्, बाझ्छन्, फाइट गर्छन् अनि गालीचाहिँ कुकुर, बाँदर, गधादेखि झापाली अनि पाण्डव सुनुवारसम्मलाई गर्न भ्याउँछन् !

भिडियो हेर्दा लाग्छ, एलन मस्क, बर्नार्ड अर्नल्ट, बिल गेट्स, ल्यारी इलिसन, वारेन बफेट सबै उनीहरूका अगाडि गरिब हुन् । दाऊद इब्राहिम, एल चापोका ती गुरु हुन् । राफेल अघायेव, रयो कियूना, रिका उसामीभन्दा राम्रो किक हान्ने उनीहरू नै हुन् । तर, के गर्नु, हामीलाई यस्तै हेर्न मन पर्छ !

केहीअघि बसन्त बस्नेतले एउटा लेखमा भनेका कुरा यहाँनेर लागू हुन्छ ‘हामीलाई सिनेमाको गफ दिँदा अकिरा कुरोसावादेखि अब्बास किरुस्तामी या स्पिलवर्गदेखि अलेजान्द्रो इनारितुसम्मको गफ दिन मन पर्छ, खासमा चैँ कबिर सिंह, राधे टाइपमा छिरेर मजा लिन्छौँ । साउथ इन्डियन फिल्ममा धुलो उडाउँदै मान्छेको हड्डी भाँचेको हेर्न हामीलाई घच्चीको स्वाद पर्छ ।’

हुन पनि हो, केही महिनाअघि ‘हसिन दिलरुबा’लाई लिएर आपत्ती जनाउनेहरू अहिले ब्लाइण्ड डेटको मजा लुटिरहेका छन् ।

अपवादबाहेक मानवीय गुण नै हो, असामान्यजस्तो देखिने कुराले ध्यान तान्ने, अरुका दुःख अनि गाली गरे/पाएको हेर्न मन लाग्ने । टाइटानिक चलचित्रमा धेरैले रुचाएका दुई वटा सिन छन् । एउटा रोज र ज्याकको रोमान्स र अर्को डुब्दै गरेको टाइटानिक जहाज । टाइटानिक जहाज डुब्दै गर्दा मानिसहरू आत्तिएको, डराएको सिनले धेरैलाई तान्छ । एक त बडेमानको जहाज, त्यो पनि समुद्रमा डुब्न लागेको, मानिसहरू अत्तालिएको, पानीमा हामफालेको सिनले नै सायद टाइटानिक हिट भएको हुनुपर्छ । हिजोआज युट्युबतिर हिट हुने भिडियोहरू प्रायः यस्तै हुन्छन्, झैझगडा, आँसु, गालीगलौज ।

कोरोनाको दोस्रो लहरले मान्छेलाई साह्रै अत्याएको थियो । अस्पतालमा मान्छे मरिरहेका थिए । मन भुलाउन पनि गालीगलौज शो, होइन होइन, ब्लाइण्ड डेट शो हेर्न थालियो ।

ब्लाइण्ड डेटको कन्सेप्ट सिम्पल छ । शोमा पाँच केटा, पाँच केटी छन् । यी सबै फरक-फरक व्यवहार, प्रकृतिका छन् । मैले युट्युबमा हेर्न सुरु गर्दा शोमा शीलु पोखरेल र देवेन्द्रराज पाण्डेसँगै विकास खरेल, मीना बूढाथोकी, प्रनिमा दाहाल, नर्वदा लकान्द्री, रामप्रसाद पोखरेल, लक्ष्मण बानियाँ, असल अधिकारी र ममता माझी थिए ।

पछि नमुना ए सरी सरी, मुना लामिछाने र दुबईको साइँलो दाइको भाइ किरण खाती (गोल्डी) ब्लाइण्ड कार्डबाट छिरे ।

शीलु र्‍यापर भइहालिन् । कतिपयले भन्छन्, शीलुले र्‍याप हानेको हो कि शीलुलाई र्‍यापले हानेको बुझ्न कठिन छ । धेरैले उनलाई एउटा आत्मविश्वासी केटीको रूपमा चिन्छन् । तर, शोमा उनको हर्कत हेरेर हैरान हुनेहरू पनि कमचाहिँ छैनन् । अरूलाई होच्याउने, अपाच्य शब्द बोल्नमा उनलाई पछि आएकी मुनाले पनि टप्न सकिनन् । नर्वदाले ‘डोजर वार’ गरेर पनि नसकेकी कन्टेस्टेन्ट हुन शीलु । यसअघि उनी कलाकारितामा सक्रिय थिइन् । भनिन्छ, ‘अहिले पनि कलाकारितामै सक्रिय छिन्, ब्लाइण्ड डेटमा अभियन गरेर ।’

आफूलाई बिजनेसम्यान बताउने देवेन्द्रलाई धेरैले ‘फन्निएस्ट पर्सन अफ ब्लाइण्ड डेट’ भन्छन् । सामाजिक सञ्जालमा ‘स्कुटरकाण्ड’को चर्चा त सुन्नु भएकै होला । हो, मीनालाई लभ गर्छु भन्दै स्कुटर दिएर पछि फिर्ता माग्ने मनुवा देवेन्द्र नै हुन् । तर, नझुक्किनु हाेला है, याे पनि सबै स्क्रिप्टेड नै हाे । शोमा अन्टसन्ट बोल्नेमा देवेन्द्र शीलुभन्दा कम छैनन् । यिनीहरूको सामाजिक सञ्जालको खाता हेर्ने हो भने यस्तै भनाभन, गालीगलौज गरेको देख्न सकिन्छ ।

प्रनिमा आउट भइसकिन् । खासमा उनको जोडी रामसँग खुब मिल्छ भनेर भिडियोमुनि प्रशस्तै कमेन्ट देखिन्थ्यो । तर, रामले नै रिजेक्ट गरेपछि उनले म्युजिक भिडियो खेल्ने काममै आफूलाई फर्काइसकिन् । आफूलाई उद्यमी बताउने राम शोमा सबैभन्दा भद्र पात्रका रूपमा आफूलाई देखाउने प्रयास गर्छन् । तर, कसैलाई नटेर्ने शीलु उनलाई ‘ओए सुन रामे’ भन्छिन् । रामको ‘ब्रोकन इंग्लिस’ को चर्चाले पनि कमेन्ट बजार पिट्ने गरेको छ ।

घमण्डी केटाको उपमा पाएका लक्ष्मण बाहिरिसकेका छन् । हुन पनि शोबाट बाहिरिँदा उनी रिजेक्ट भएर होइन, ममतालाई रिजेक्ट गरेर बाहिरिए । आफूलाई डान्सर बताउने असल अधिकारी शोबाट सबै केटीको भाइ बनेर निस्किए । विकास खरेललाई कोठामा लगेर शीलुले चिया पकाउन लगाएको भिडियो क्लिप पनि टिकटकतिर भाइरल थियो । इलिमिनेसन राउन्डमा कुनै पनि केटीले नरोजेपछि उनी आफ्नो पुरानै आइटीको काममा फर्किएका छन् । इलिमिनेसन राउन्डबाट आफूलाई ‘सिंह’ बताउँदै इन्ट्री मारेका डाइरेक्टर पनि कम फन्नी छैनन् ।

ब्लाइण्ड कार्डबाट छिरेका मुना (शेर्नी) र किरण (गोल्डी) ले डेटमा चर्कोचर्को स्वरले बाझेर एक मिलियनभन्दा ज्यादा भ्युज बटुले । तर, इलिमिनेसन राउण्डमा देवेन्द्रले रिजेक्ट गरेपछि मुना शायद हङकङ फर्किसकेकी छन् । जसोतसो टिक्न सफल गोल्डी लाजिम्पाटतिरको अपार्टमेन्टमा शीलुको सेवा गरिरहेका छन् । बिहान उठेर कफी बनाउँछन्, दिउँसाे खाजा तयार गर्छन् अनि राति कुर्सीमा सुत्छन् ।

यो शोबारे मान्छेका फरक-फरक राय पाउँछु । कसैले यसलाई ‘बकवास’ मानेका छन् । कसैले मनोरञ्जनका लागि उपयुक्त ठानेका छन् । कोहीचाहिँ मन पनि पराउँदैनन् तर हेर्न पनि छुटाउँदैनन् । जसले जे भने पनि छोटो समयमै राम्राे चर्चा कमाएको यो शोले अझै भ्युअर्स पाउने पक्का छ । किनकि, भर्खर मात्र मुन्द्रेको कमेडी क्लब सकिएको छ । हुन पनि ५६ औँ एपिसोडको कम्पेटेबल राउण्डसम्म आइपुग्दा यो शो ठ्याक्कै कुनै टेलिसिरिअलजस्तो बनेको छ । जे होस्, यसले भ्युअर्स चाहिँ मजाले पाइरहेको छ ।

त्यसैले यो शोका केही कमजोरीप्रति चाहिँ निर्माण पक्षले अलि गम्भीर हुन जरुरी छ । हेलिकप्टरबाट 'फन्नी इन्ट्री' मारेका डाइरेक्टर राेशन दाहालले सुरुमा दिएको प्रवचन सुन्दा अब शाे सुध्रिएला, गालीगलौज र झगडा रोकिएला भन्ने अपेक्षा धेरै दर्शकले गरेका थिए । हेर्दै जाँदा उनैले देवेन्द्र र शीलुलाई पछि पर्लानजस्तो भइसक्यो ।

केटाकेटी झगडा गर्दा पाण्डव सुनुवारलाई गालीको बीचमा किन ल्याउने ? ‘मान्छे हेर्दा सर्लाहीबाट आएकोजस्तो छ, कुरा गर्छ’, ‘झापाली कतिसम्मका फटाहा हुन्छन् भन्ने कुरा मलाई थाहा छ’, ‘जा अर्घाखाँचीतिरकै केटी खोजेर बिहे गर, मजस्तो पाउने कुरा नसोच्’ ‘म केटी मान्छे हुँ नि त’, ‘तँजस्तो भिखारी, खाते, गाेल्ड डिगर’ साराले हेर्ने भिडियोमा यस्ता डायलगहरू राख्दा त्यसले अरूको भावनामा कति असर गर्छ भन्ने कुराको हेक्का राख्नुपर्छ । याे शाेले कुनै न कुनै रूपमा कैयाैँ रूढीवादी मान्यतालाई समर्थन गरेकाे देखिन्छ । जस्ताे कि, 'केटी भएपछि भात पकाउनु परेन ?'

वर्ग, समुदाय, जात, धर्म अनि निश्चित व्यक्तिको भावनामा चोट पुर्‍याउने खालका हर्कतहरू हुनबाट राेक्नुपर्छ । आफूलाई माथि पार्ने प्रयासमा प्रतिस्पर्धीहरूले गर्ने व्यवहार अनि उनीहरूले प्रयाेग गर्ने शब्दले आगामी पुस्तामा पार्नसक्ने असरबारे पनि हेक्का राख्नुपर्छ ।

धेरैलाई थाहा भइसक्याे, ब्लाइण्ड डेट स्क्रिप्टेड हो । र पनि कतिसम्म देखिन्छ भने, ८ नोभेम्बरमा अपलोड भएको भिडियोमा शीलुले गोल्डीलाई सेक्रेट कुरा गर्नु छ भन्दै तानेर बाथरुममा लगेको देखाइएको छ । त्यहाँ उनले भन्छिन्, ‘यहाँ सीसी क्यामेरा छैन । त्यसैले तिमीसित डिल गर्न यहाँ तानेर ल्याएकी हुँ ।’ क्यामेरा छल्न बाथरुममा आएको भन्दै क्यामेरामुनि नै गरेको संवाद हेर्दा तपाईंलाई लागेन, ब्लाइण्ड डेटले मलाई उल्लु सम्झेको छ कि के हो ? ए माफ पाऊँ, यहाँ मैले भुलवश मासुम उल्लुलाई बीचमा ल्याएँ । बिग बाेसलाई बिर्सने हाे भने मलाई त लाग्याे है ।

नेपालीमा एउटा कानले सुनेर अर्को कानबाट उडाइदिने भन्ने भनाइ छ ! त्यही भनाइअनुसार ब्लाइन्ड डेट शाे हेरेर मजा मात्र लिने हो, शिक्षा होइन पनि भनिन्छ । तर, भुल्न नहुने कुरा के भने, यस्ताे शाेले कुनै न कुनै रूपमा कसै न कसैलाई प्रभावित गरिरहेको हुन्छ । यस कुराप्रति सचेत भएर मनोरञ्जन दिलाए त भइहाल्यो नि । फेरि एउटा स्ट्याण्डर्डको बनाएपछि 'ह्या यस्ताे शो हेरिन्न' भन्नेहरू पनि हेर्न आउलान् नि ! साेचाैँ है डाइरेक्टर सा'व ।

प्रकाशित मिति: बुधबार, कात्तिक २४, २०७८ १४:२४