घुस लिँदालिँदै इन्जिनियर पक्राउ

A+ A A-

सप्तरीको रुपनी गाउँपालिकामा कार्यरत इन्जिनियर विकास श्रेष्ठलाई अख्तियार दुरुपयोग अनुसन्धान आयोगले १ लाख रुपैयाँ घुससहित पक्राउ गरेको छ ।

सप्तरीको बोदे बर्साइन नगरपालिकास्थित तरही र देउरी गाउँ जोड्ने स्वर्णा खोलाको झोलुंगे पुल निर्माण कार्यको पहिलो किस्ताबापतको पेस्की फर्छ्यौटका लागि मूल्यांकन गर्न इन्जिनियर श्रेष्ठले घुस मागेको भन्ने सूचनाका आधारमा इटहरीस्थित आयोगको कार्यालयबाट खटिएको टोलीले उनलाई आज पक्राउ गरेको हो ।

पेस्की फर्छ्यौटका लागि मूल्यांकन गरिदिने भन्दै स्वर्णा खोला झोलुंगे पुल निर्माण उपभोक्ता समितिका अध्यक्ष राजीव रायसँग श्रेष्ठले घुस लिएको आयोगले जनाएको छ । राजविराज नगरपालिका–६ स्थित डेराबाट श्रेष्ठलाई घुसबापत लिएको १ लाख नगदसहित रंगेहात पक्राउ गरी छानबिन सुरु गरिएको आयोगले जनाएको छ ।

प्रहरी नायब उपरीक्षक सारुको नेतृत्वमा आएको टोलीले श्रेष्ठको डेरामा छापा मारी १ लाख रुपैयाँ फेला पारेको राजविराज नगरपालिका–६ का वडा अध्यक्ष प्रेमकुमार यादवले बताए ।

स्वर्णा खोलाको झोलुंगे पुल निर्माण कार्यको पहिलो किस्ताबापत पेस्की लिएको ८ लाख रुपैयाँबराबरको काम सम्पन्न नभएको भन्दै मूल्यांकन हुन नसक्दा उपभोक्ता समितिले दोस्रो किस्ताबापतको पेस्की रकम उठाउन पाएको छैन ।

तत्कालीन जिल्ला विकास समिति सप्तरीद्वारा २०७० सालदेखि नै थालिएको पुल निर्माणको काम मूल्यांकन नहुँदा अधुरो छ । पक्राउ परेका श्रेष्ठले स्वर्णा खोलाको काम बोदे बर्साइन नगरपालिकाअन्तर्गत परेकोले आफूले मूल्यांकन गर्न नमिल्ने बताए पनि उपभोक्ता समितिले मूल्यांकन गरिदिन दबाब दिँदै आएको बताए ।

प्रकाशित मिति: शुक्रबार, जेठ ३१, २०७६ २२:१२