बझाङमा आफ्नै रकम फिर्ताकाे माग राख्दै हुलाक बचत बैंकका बचतकर्ताहरू धर्नामा

बझाङमा आफ्नै रकम फिर्ताकाे माग राख्दै हुलाक बचत बैंकका बचतकर्ताहरू धर्नामा

A+ A A-

बचत रकम फिर्ताकाे माग राख्दै जिल्ला हुलाक कार्यालय बझाङमार्फत सञ्चालन भएको हुलाक बचत बैंकका बचतकर्ताहरूले आन्दाेलन सुरु गरेका छन् । आफूहरूले जेनतेन गरेर जम्मा गरेकाे रकम फिर्ताकाे माग राखेर उनीहरूले बै‌ंककाे कार्यालयमै धर्ना सुरु गरेका हुन् ।

यसअघि हुलाक बचत बैं‌कमा दुई वर्षादेखि जम्मा भएकाे बचत रकम फिर्ता नपाएकाे भन्दै गएकाे शुक्रबार प्रमुख जिल्ला अधिकारी मोहन अधिकारीमार्फत सरकारलाई ज्ञापन बुझाएका बचतकर्ताहरूले आजदेखि धर्ना दिन सुरु गरेका हुन् ।

खाइनखाई जम्मा गरेको रकम आफूहरूले नपाउँदा संघर्ष समिति गठन गरी आन्दोलन सुरु गरेकाे संयोजक खडक बोहराले बताए । उनले भने, ‘हामीले हाम्रो समस्या सबैलाई सुनायौँ । हाम्रो आवाज कसैले पनि सुनेन । केही उपाय नलागेपछि बाध्य भएर आन्दोलन गर्नुपरेको हो ।'

आर्थिक वर्ष २०७०/७१ मा हुलाक बचत बैंकले बझाङमा आफ्नो सेवा सुरु गरेको थियो । तत्कालीन समयमा जिल्लामा कृषि विकास बैंक र राष्ट्रिय वाणिज्य बैंकबाहेक अन्य बैकहरू नभएको र आकर्षक ब्याज पाउने भएपछि बचतकर्ताहरू हुलाक बचत बैंकतर्फ आकर्षित भएका थिए ।

बचतकर्ताहरू बढेसँगै तत्कालीन कार्यालय प्रमुख रणबहादुर कडायत र खरिदार शिवराज उपाध्यायले कार्यालयको बचत किताबमा बचतकर्ताले जम्मा गरेको देखाउने तर रकम आफैँ चलाउने गरेका कारण रकम हिनामिना भएको हो । दुवै जनाले रकम हिनामिना गरेपछि १ हजार ७ सय १ जना बचतकर्ताको ५ करोड ७८ लाख ६४ हजार रुपैयाँ गुम्ने खतरा छ ।

घटनाबारे अख्तियार दुरुपयाेग अनुसन्धान आयाेगमा मुद्दा पनि परेकाे थियाे । बचतकर्ताको ४ करोड ९५ लाख भन्दा धेरै रकम हिनामिना गरेर अनियमितता गरेको ठहर गरी तत्कालीन हुलाकका कार्यालय प्रमुख कठायत र खरिदार उपाध्यायविरुद्ध अख्तियारले विशेष अदालतमा मुद्दा दर्ता गरेको थियो । तर अदालतले कठायतसँग १५ लाख र खरिदार शिवराज उपाध्यायसँग १२ लाख रुपैयाँ धरौटी लिएर रिहा गरेको थियो ।

याे पनि : छाक काटेर गरेको बचत फिर्ता लिन पाँच वर्षदेखि धाएको धायै

प्रकाशित मिति: आइतबार, कात्तिक १४, २०७८ १४:००