अस्पतालहरूमा कोभिड संक्रमण भएर आउनेको संख्या १ अंकमा झर्‍यो, उपत्यकामा जोखिम कम भएको हो ?

अस्पतालहरूमा कोभिड संक्रमण भएर आउनेको संख्या १ अंकमा झर्‍यो, उपत्यकामा जोखिम कम भएको हो ?

A+ A A-

काठमाडौं उपत्यकाका अधिकांश अस्पतालहरूमा कोभिड भएर आउने बिरामीको संख्या एक अंकमा झरेको छ । शुक्रराज ट्रपिकल तथा सरुवा रोग अस्पताल टेकु, वीर अस्पताल, त्रिवि शिक्षण अस्पताल र एपीएफ अस्पतालमा दैनिक कोरोनाका बिरामी १० भन्दा कम उपचारका लागि आउने गरेका छन् ।

‘इमरजेन्सीमा कोरोना संक्रमण भएर आउनेको संख्या १ अंकमा झरेको छ,’ टेकु अस्पतालका निर्देशक डा. अनुप बाँस्तोलाले भने । पछिल्लो समय संक्रमित भएर आउने बिरामी खोप लगाएका रहेको उनले बताए । ‘कोरोना लक्षण भएर आउने खोप लगाएका छन् । खोप लगाएको छ भनेर हेलचेक्र्याइँ गरेका कारण संक्रमण भएर आएका छन् । खोप लगाएका व्यक्ति आईसीयूमा पुगेका छन्,’ उनले भने, ‘हाल १४ जना कोभिडका बिरामी भर्ना छन् । आईसीयूमा ८ जना छन् ।’

दसैंअघि ५० जना बिरामी भर्ना भएका त्रिवि शिक्षण अस्पताल महाराजगञ्जमा हाल ३७ जना छन् । जसमा १६ जना आईसीयू र ९ जना एचडीयूमा र अरु वार्डमा भर्ना भएका छन् । ‘दैनिक ५ जनाको हाराहारीमा बिरामी अस्पताल आएका छन् । यो दोस्रो चरणको अन्तिमतिरको हो,’ अस्पतालका कोभिड फोकल पर्सन डा. सन्तकुमार दासले भने ।

एपीएफ अस्पतालमा पनि बिरामी आउने संख्या एक अंकमा झरेको छ । ‘दैनिक तीन जनाको हाराहरीमा आएका छन् । दुई तीन दिनदेखि बढेको छैन । अरु अस्पतालबाट आएका बिरामी सिकिस्त छन् । अरु सामान्य अवस्थाका बिरामी छन्,’ अस्पतालका कोभिड फोकल पर्सन डा. प्रविन नेपालले भने, ‘इमरजेन्सीमा आउने बिरामीको संख्या कम छ ।’

कोभिड युनिफाइड केन्द्रीय अस्पताल (वीर अस्पताल) मा पनि कोभिडका बिरामीको संख्या घटेको छ । ‘४१ जना बिरामी भर्ना भएका छन् । दैनिक नयाँ बिरामी ७ जना आउँछन्,’ अस्पतालका कोभिड फोकल पर्सन डा. अच्युत कार्कीले भने, ‘हिजो एक जना भर्ना भएको थियो । अरुलाई वार्डमा हेरेका थियौं । आईसीयूमा भने १७ जना बिरामी छन् ।’

घट्नुको कारण के हो ?

खोप नै मुख्य कारण रहेको चिकित्सकहरू बताउँछन् । ‘नयाँ भेरियन्ट पनि आएको छैन । पुरानो भेरियन्टलाई खोपले काम गरेको छ,’ डा. कार्कीले भने ।

डा. बाँस्तोला पनि कार्कीको भनाइसँग सहमत छन् । ‘दोस्रो चरणमा धेरै संक्रमित भए । भाइरस फेरिएको छैन । एन्टिबडीले काम गरेको छ,’ उनले भने ।

जोखिम घटेको छैन

संक्रमणको जोखिम भने कम नभएको उनीहरूको भनाइ छ । ‘संख्या कम भए पनि जोखिम कम भएको छैन । खोप लगाएको भनेर ढुक्क हुने स्थिति छैन । खोप लगाएका पनि संक्रमित भएका छन् । स्वास्थ्य मापदण्डलाई छोड्ने बेला भएको छैन,’ डा. बाँस्तोलाले भने ।

दसैंअघि पाँच प्रतिशतमा झरेको कोरोना संक्रमण दसैंपछि १० प्रतिशतमा पुगेको थियो । फेरि बिहीबार संक्रमणदर झरेर ५ प्रतिशतमा आइपुगेको छ । स्वास्थ्य तथा जनसंख्या मन्त्रालयले संक्रमणको घटबढका कारण अहिले नै भन्ने स्थिति नरहेको बताएको छ । ‘बढेकै भन्ने छैन । १० प्रतिशतभित्र छ । केही समय हेरेर मात्र भन्न सकिन्छ,’ मन्त्रालयका प्रवक्ता डा. कृष्ण पौडेलले भने, ‘परीक्षण कम भए पनि संक्रमणदरमा असर गरेको छैन ।'

दसैंपछि कारोना संक्रमण बढेको हो ? ‘डेल्टा प्लस’ कति घातक ?

प्रकाशित मिति: शुक्रबार, कात्तिक १२, २०७८ १२:५७