दसैंपछि कारोना संक्रमण बढेको हो ? ‘डेल्टा प्लस’ कति घातक ?

A+ A A-

दसैंअघि पाँच प्रतिशतमा झरेको कोरोना संक्रमण दर फेरि बढेर १० प्रतिशतको हाराहारीमा पुगेको छ । तर, स्वास्थ्य तथा जनसंख्या मन्त्रालयले के कारणले बढेको हो अहिले नै भन्ने स्थिति नरहेको जनाएको छ ।

‘बढेकै भन्ने छैन । १० प्रतिशतभित्र छ । केही समय हेरेर मात्र भन्न सकिन्छ,’ मन्त्रालयका प्रवक्ता डा. कृष्ण पौडेलले भने । दसैंको समयमा परीक्षण कम भएका कारण संक्रमण कम देखिएको हो भन्ने प्रश्नमा डा. पौडेल भन्छन्, ‘परीक्षण कम भए पनि प्रतिशतमा असर गरेको छैन । संख्या मात्र कम भएको हो ।’ दसैंमा स्वास्थ्य मापदण्ड पालना नभएकाले संक्रमण बढ्ने जोखिम रहेको उनले बताए ।

‘मापदण्ड पालना भएको देखिएन । भिडभाड पनि भयो फेरि संक्रमण बढ्ने जोखिम छ,’ उनले भने । दसैंपछि केही अस्पतालमा बिरामीको संख्या बढेको रिपोर्ट आएको बताउँछन्, शुक्रराज ट्रपिकल तथा सरुवा रोग अस्पतालका रिसर्च युनिटका प्रमुख डा. शेरबहादुर पुन ।

‘दसैंपछि केही अस्पतालमा मध्यम र सामान्य खालका बिरामी बढेका छन् । तर, जटिल खालका बिरामी भने होइन,’ उनले भने ।मन्त्रालयको तथ्यांकले पनि दसैंपछि संक्रमण बढेको देखाउँछ ।

डेल्टा प्लस कति घातक ?

युकेमा डेल्टा प्लस (AY.4.2) भेरियन्ट फेला परेको छ । विज्ञहरूले यो भेरियन्ट छिटो फैलिने क्षमताको रहेको बताएका छन् । ‘युकेमा परीक्षण गरेकोमा ६ प्रतिशतमा देखिएको छ । यो डेल्टाबाट छुट्टिएकाले ‘डेल्टा प्लस’ हो । १० देखि १५ प्रतिशत छिटो फैलिने रिपोर्ट आएको छ,’ डा. पुनले भने, ‘छिटो फैलिने भएकाले चासोका साथ हेरिएको छ । कति घातक छ यो अनुसन्धानको विषय हो।’

नेपालमा यसको असर कति ?

आवातजावत खुला गरेकाले नेपालमा पनि डेल्टा प्लस भित्रिएको छ छैन भनेर हेर्नुपर्ने बताउँछन्, डा. पुन । ‘सबै देशबाट मानिस आउने भएकाले यसको अनुगमन गर्नुपर्छ । नेपालमा भित्रिएको छ छैन भनेर सिक्वेन्सिङ गरेर हेर्नुपर्छ,’ उनले भने । दोस्रो लहरको जस्तो समस्या देखिने सम्भावना कम रहेको उनको बुझाइ छ । तर, खोप लगाउन बाँकी र संक्रमण नभएकाहरू बढी जोखिममा रहेकाले सर्तकता अपनाउन उनको सुझाव छ । ‘खोप लगाएकालाई जटिल बनाउने सम्भावना कम छ । तर, खोप लगाएको भनेर ढुक्क हुने स्थिति छैन,’ उनले भने ।

नेपालमा कतिले लगए खोप ?