प्रचण्डको इच्छाले खुलेको डोबाटेको मन्त्री बन्ने बाटो

A+ A A-

गण्डकीमा शपथ लिने दिनमात्रै डोबाटे विश्वकर्मा मन्त्री बन्ने खबर बाहिरियो । डोबाटे स्वयंलाई एकपटक फुत्किएको मन्त्री पद फेरि पाउँला भन्ने आश थिएन । तर, मुख्यमन्त्री कृष्णचन्द्र नेपाली पोखरेलको गत हप्ताको काठमाडौं यात्राले डोबाटेले मन्त्री बन्ने अवसर पाए ।

२९ जेठमा कांग्रेस नेतृत्वमा सरकार बनेपछि मन्त्रीमण्डलले पूर्णता पाउन डेढ महिना लाग्यो । लामो समयपछिको पूर्णता डोबाटेको नाम काटिँदा आलोचित भयो । डोबाटेलाई संसदीय समितिको सभापति बनाएर थम्थमाउने प्रयास नगरिएको होइन । तर, उनले सभापति नबन्ने निधो गरे । अहिले मुख्यमन्त्री पोखरेल डोबाटेलाई क्याबिनेट सदस्य बनाउन सफल भएका छन् ।

मन्त्रीमा नियुक्त डोबाटे भन्छन्- काम गर्न प्रधानमन्त्रीसँग आशीर्वाद मागेँ

डोबाटे मन्त्री बन्नुको पछाडि माओवादी केन्द्रका अध्यक्ष पुष्पकमल दाहाल 'प्रचण्ड'को हात छ । डोबाटेलाई मन्त्री बनाउन कांग्रेस सभापति शेरबहादुर देउवाको खासै चासो थिएन । किनकि डोबाटे कांग्रेसमा रामचन्द्र पौडेल पक्षका हुन् ।

गत १८ असोजमा मुख्यमन्त्री पोखरेल प्रधानमन्त्री एवं कांग्रेस सभापति शेरबहादुर देउवालाई भेट्न काठमाडौं गएका थिए । १९ असोजमा उनी प्रधानमन्त्रीलाई भेट्न प्रधानमन्त्री कार्यालय गए । त्यहाँ माओवादी केन्द्रका अध्यक्ष प्रचण्ड, नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादवलगायत गठबन्धनका नेता पनि थिए ।

प्रचण्ड र मुख्यमन्त्रीबीच त्यहीँ भेट भयो । भेटमा प्रचण्डले स्वयं डोबाटेको प्रसँग निकालेको स्रोतले बतायो । ‘प्रचण्डले नै त्यो दिन डोबाटे विकको कुरा निकाल्नुभयो । धेरै आवाज उठ्यो उहाँलाई क्याबिनेटमा ल्याउनुस् भन्नुभयो,’ कांग्रेस निकट स्रोतले शिलापत्रसँग भन्यो । त्यसपछि प्रधानमन्त्री देउवा, माओवादी अध्यक्ष प्रचण्ड, कांग्रेस वरिष्ठ नेता रामचन्द्र पौडेलबीच कुराकानी भयो । यसरी प्रचण्डको इच्छाले डोबाटेले मन्त्री बन्ने मौका पाएका हुन् ।

मन्त्रीको शपथ लिन आउँदा–आउँदै जसलाई अर्कैले उछिन्यो

अहिले माओवादीले समर्थन जनाए पनि १२ वटा मन्त्रालय बनाउने बहसको विपक्षमा माओवादी नै थियो । गण्डकीमा कांग्रेस पहिल्यै मन्त्रालयको संख्या १२ पुर्‍याउन चाहन्थ्यो । मन्त्रालय भागबण्डा मिलाउन पटकपटक भएका छलफलमा पनि कांग्रेसले १२ वटा मन्त्रालय बनाउने प्रस्ताव गरेको थियो । तर, यहाँका माओवादी सांसदले मानेनन् । मन्त्रालय भागबण्डादेखि मन्त्री छनोटको जिम्मा कांग्रेस र माओवादीले केन्द्रीय नेतृत्वलाई दिए । त्यतिबेला भने केन्द्रका नेता पनि ११ मन्त्रालयभन्दा बढाउन नहुने पक्षमा थिए ।

अहिले माओवादीको केन्द्रीय नेतृत्वले ‘ग्रिन सिग्नल’ दिएपछि मन्त्री संख्या १२ पुर्‍याइएको छ । यो विषयमा गण्डकीका गठबन्धन दलसँग भने छलफल भएको छैन । माओवादी संसदीय दलका नेता हरिबहादुर चुमान भन्छन्, ‘१२ वटा मन्त्रालय बनाउने भनेर केन्द्रतिर कुरा भएको छ रे ! हामीलाई केही थाहा छैन ।’

गण्डकीमा मन्त्रालय थप्न चाहन्छ कांग्रेस, कति छ सम्भावना ?

गण्डकीमा कांग्रेस, माओवादी, जसपा, राष्ट्रिय जनमोर्चा र एक स्वतन्त्र सांसद संलग्न गठबन्धन सरकार छ । डोबाटे गत ८ साउनमै मन्त्री बन्ने पक्का भइसकेको थियो । तर, अन्तिममा उनको नाम काटेर व्यापारिक पृष्ठभूमिका सांसद विन्दुकुमार थापालाई मन्त्री बनाइयो । एउटा दलित समुदायबाट आएकाको नाम काटेर व्यापारी सांसदलाई भाग दिइएको भन्दै कांग्रेस र त्यहाँको नेतृत्वको चर्को आलोचना भएको थियो ।

माओवादी अध्यक्ष प्रचण्डले डोबाटेलाई मन्त्री बनाउन तयार भएपछि प्रधानमन्त्री देउवाले पनि असहमति जनाएनन् । आइतबार गण्डकीलाई साक्षर प्रदेश घोषणा गर्न र कार्यकर्ता भेटघाटको शिलशिलामा देउवा पोखरा आएका थिए । पार्टी सभापतिलाई भेट्न डोबाटे राष्ट्रबैंक गेस्ट हाउस पुगेका थिए ।

८ साउनमा मन्त्री बन्न नपाउँदा डोबाटे शपथ ग्रहण समारोहमा सहभागी भएनन् । त्यतिबेला उनको गुनासो थियो, ‘निष्ठावान् कार्यकर्ताको योगदानको मूल्यांकन नहुँदो रहेछ ।’

२०३६ सालमा कांग्रेसको सदस्यता लिएका डोबाटे पहिलोपटक गत निर्वाचनदेखि संसदीय राजनीतिमा छिरेका हुन् । शपथ लिन आउँदाआउँदै निराश बनेर फर्किएका डोबाटे साढे दुई महिनापछि मन्त्री बनेका छन् । अहिले उनी भन्छन्, ‘राजनीतिक इतिहास हेर्दा छुटाएर न्याय भएन कि भन्ने पार्टीलाई लाग्यो होला ।’

प्रकाशित मिति: सोमबार, असोज २५, २०७८ १४:०७