न्याय माग्दै २० दिन हिँडेर काठमाडौं आएका उनीहरू माइतीघरमा रोटी खाँदै थिए, प्रहरीले घिसार्दै भ्यानमा कोच्यो (भिडियोसहित)

न्याय माग्दै २० दिन हिँडेर काठमाडौं आएका उनीहरू माइतीघरमा रोटी खाँदै थिए, प्रहरीले घिसार्दै भ्यानमा कोच्यो (भिडियोसहित)

A+ A A-

२० दिनको हिँडाइले शिथिल भएको शरीर । पट्पट् फुटेका पैतला । खुट्टामा जिलजिलाउँदो फोका । लरबराउने आवाज । झोलामा आड लगाएर माइतीघर मण्डलाको चिसो भुइँमा पल्टिरहेका थिए, उनीहरू ।

न्याय माग्दै नेपालगन्जबाट २० दिन हिँडेर बुधबार काठमाडौं आइपुगेको थियो, १४ जना महिलाको टोली । तर, काठामाडौं आइपुग्दा पनि उनीहरूको माग सम्बोधन गर्न सरकारले चासो दिएन ।

‘अहिलेसम्म कोही पनि सोध्न आएको छैन । २० दिन हिँडेर आयौँ, सरकारले चासो दिएन,’ १४ महिलाको नेतृत्व गरेर आएकी रुबी खान भन्दै थिइन्, ‘उता न्याय नपाएपछि सिंहदरबार आउन बाध्य भएका हौँ ।’

कतैबाट पनि सुनुवाइ नभएपछि शुक्रबार रातिबाट माइतीघरमै रिले अनशन बस्न विवश भए, उनीहरू । बिहानैदेखिको भाेको पेट । खानको लागि होटेलसम्म पुग्ने तागत पनि थिएन उनीहरूसँग । अभियन्ता सञ्जीव उप्रेतिसहितको टोलीले रिले अनशनस्थलमै रोटी तरकारी ल्याइपुर्‍यायो ।

रोटी तरकारी उनीहरूको मुखमा परेको मात्र थियो । प्रहरीको टोली आइपुगेर भन्न थाल्यो, ‘यो निषेधित क्षेत्र हो । राति यहाँ बस्न पाइँदैन ।’

‘न्यायको लागि कहाँ जाउ ? २० दिन हिडेर यहाँ आइपुगेका हौँ । हाम्रो माग पूरा नभएसम्म यहीँ बस्छौँ,’ दुई हात जोडेर प्रहरीसामू खानले याचना गरिन् ।

तर उनको आवज सुन्ने पक्षमा थिएन, प्रहरीको टोली । खाँदाखाँदै उनीहरूलाई प्रहरीले गिरफ्तार गर्‍यो । माइतीघरमा महिलाहरूको रुवाबासी चल्यो । उनीहरू चिच्याइरहे । प्रहरीले भ्यानभित्र कोचिरह्यो । उनीहरूले प्रश्न गरिरहे, ‘अभियुक्तहरुलाई किन समातिएन ? हामीलाई किन पक्राउ गरियो ? हामीलाई न्याय चाहियो ।’

अभियन्ताको टोलीले उनीहरूको लागि म्याट र त्रिपालको प्रबन्ध गरेको थियो । उनीहरूलाई चिसोबाट जोगाउन त्रिपाल टाँग्न बाँस पनि ल्याइएको थियो । तर, प्रहरीले महिलाहरूलाई गिरफ्तार गरेपछि अभियन्ताहरूले त्रिपाल टाँग्न पनि पाएनन् ।

अभियन्ता उप्रेती भन्छन्, ‘५ सय किलोमिटर हिँडेर आउनुभएको छ । काठमाडौंका मानिसले फराकिलो मन बनाउनुपर्छ । यतिबेला समातेर लैजानु गैरकानुनी हो । राज्य सत्ता आफैँ कमजोर रहेछ भन्ने देखाउँछ । सानो विरोधबाट पनि तर्सिने सरकारको चरित्र देखियो ।’

रिले अनशनमा बसेका महिलालाई पक्राउ गरेको भन्दै सामाजिक सञ्जालमा सरकारको विरोध सुरू भएको छ । उनीहरूको माग सम्बोधन गर्न सामाजिक सञ्जालबाट अभियन्ताहरूले सरकारलाई दबाब दिएका छन् ।

बेलुकाको खाना खाँदै गरेका उनिहरूलाई खाना पनि राम्ररी खान नदिई प्रहरीले भ्यानमा हालेर लग्यो। किन यस्तो ज्यादती ? @SherBDeuba @hello_sarkar @NepalPoliceHQ https://t.co/BcYzDSE2n1
— Archana Thapa (@archana_thapa) October 8, 2021

नेपालगंज देखि २०दिनको हिडाई पछि राजधानी पुगेका यि सबै महिलाहरुलाई भर्खरै प्रहरीले माईतीघर मण्डला बाट गिरफ्तार गरेको छ । के न्याय माग्नु अपराध हो ? शान्तिपूर्ण धर्ना मा बस्नु गैर कानूनी हो ? नेपालप्रहरी तत्काल रिहा गर । नेपालप्रहरी को अत्यन्त निन्दनिय कार्यको घोर भर्सना गर्दछु । pic.twitter.com/0hzYvRANjq
— Mohna Ansari ‎ موھنا انصاري (@MohnaAnsari) October 8, 2021

उनीहरूको माग के हो ?

बाँके नेवाजी गाउँकी नन्कुन्नी धोबी गत ५ साउनमा मृत भेटिइन् । झुण्डिएको अवस्थामा उनको शव घरमै भेटियो । उनी लामो समयदेखि घरेलु हिंसा बेहोर्दै आएको र घटनाको प्रकृति हेर्दा शंकास्पद रहेको भन्दै पीडितले प्रहरीलाई गुहारे । तर, प्रहरीले अनुसन्धा नै नगरी आत्महत्या भनिदियो ।

एकल महिला निर्मला कुर्मी गत वर्ष मंसिरमा बेपत्ता भइन् । १६ मंसिरमा स्थानीयले प्रहरीमा किटानी जाहेरी दिए । तर, प्रहरीले अनुसन्धान गरेन । अहिले उनको मृत्यु भइसकेको बताइएपछि यी दुई शंकास्पद मृत्युको गहिरो अनुसन्धानको माग गर्दै पीडित र अधिकारकर्मी न्याय माग्दै काठमाडौं आइपुगेका हुन् ।

न्याय नपाएसम्म फर्किन्नौँ

न्याय नपाएसम्म जिल्लामा नफर्किने उनीहरूको अडान छ । प्रहरीले पक्राउ गर्नुअघि नन्कुन्नीकी बहिनी शिला धोबीले भनेकी थइन्, ‘न्याय नपाएसम्म फर्किन्नौँ । जेलमा बसे पनि सडकमा बसे पनि न्याय नपाएसम्म यहीँ बस्ने हो ।’

याे पनि...

पक्राउ परे न्याय माग्दै माइतीघरमा धर्ना दिइरहेका पीडित परिवार

‘सरकार खोज्दै आयौँ, न्याय चाहियो’

न्यायका लागि ५२० किलोमिटर पैदल यात्रा (भिडियो)

पैदल हिँडेर नेपालगञ्जबाट काठमाडौं आइपुगे पीडित (फोटो फिचर)

नन्कुन्नी धोबीको मृत्यु किन शंकास्पद ?

प्रकाशित मिति: शुक्रबार, असोज २२, २०७८ २३:१६

दिनेश गौतम

प्रतिक्रिया दिनुहोस्

भर्खरै

वाईवाई चाउचाउ गणस्तरहीन, महानगरले गर्‍यो आर्थिक जरिवाना

जिल्ला भ्रमणमा भीआईपीहरूलाई अगुवा पछुवा उपलब्ध नगराउन गृह मन्त्रालयको निर्देशन

खडेरीले मकै सुक्न थालेपछि नारायणी लिफ्टबाट पानी छाडियो

देशका ९९२ स्थानमा डढेलो, नेता सत्ताको राेइलोमा, नागरिकको बिपत्तिमा छैन सहारा

युट्युब पत्रकारितामा आचार संहिता अनिवार्य छ : अध्यक्ष बस्नेत

लोकप्रिय

सरकार ढाल्न कांग्रेसले दाेहाेराे संवाद थालेपछि प्रचण्डले तयार पारे तीन विकल्प

डेढ महिनामै प्रचण्डले भन्न थाले- उता अप्ठेरो भयो भनेर यता आइयाे, यता झन् टाल्नकै हैरान

बुद्धनगरमा कांग्रेस–एमालेका चार नेताकाे वार्ता, बालकाेट पुग्दासम्म गगन थापा निराश

२५ अर्ब किलोमिटर टाढाबाट आयो पृथ्वीमा सन्देश, उत्साहित भए नासाका वैज्ञानिक

इरान र इजरायलः कसको शक्ति कति ?

विचार

चीनमा एउटै भूकम्पले लिएको थियो ८ लाख ३० हजारको ज्यान (भिडियो)

तीन जनाको मुट्ठीमा ३ करोड जनताको लोकतन्त्र

बीसौँ शताब्दीका प्रभावशाली नेता लेनिन (भिडियो)

ब्लग

सधैँ हाँसीखुसी देखिने गाउँकी काकी, डाक्टर र अर्जुन मैनालीले राेजेकाे गलत बाटाे

छोटो तर मनमोहक पदयात्रा 'लाङटाङ'

एक जनमुखी प्रधानपञ्चको नाममा

शिक्षा

बालेनको प्रयाससँगै काठमाडौंका सामुदायिक विद्यालयमा आकर्षण, गुणस्तर धान्न भने चुनौती

डीएभी विद्यालयमा राग र तालमिश्रित सांस्कृतिक कार्यक्रम ‘तरङ्ग’ सम्पन्न

दलका कार्यसमितिको विवरण माग्दै निर्वाचन आयोगलाई शिक्षा मन्त्रालयले पठायो पत्र