नन्कुन्नी धोबीको मृत्यु किन शंकास्पद ?

A+ A A-

बाँकेको जानकी- २, नेवाजी गाउँकी नन्कुन्नी धोबी ५ साउनको बिहान घरमै झुण्डिएको अवस्थामा मृत भेटिइन् । पटकपटक घरेलु हिंसामा परेकी नन्कुन्नीको मृत्यु स्थानीयका लागि शंकास्पद हुने नै भयो ।

स्थानीय बासिन्दाले त्यसको कारण खोज्न र गहिरो अनुसन्धान गर्न प्रहरीसँग आग्रह गरे । तर, प्रहरीले आत्महत्या भनेर चासो देखाएन ।

नन्कुन्नीले गत ७ असारमा महिला अधिकार मञ्चमा आएर आफ्ना पतिबाट ज्यानको खतरा रहेको भन्दै सुरक्षाका लागि पहल गरिदिन निवेदन दिएकी थिइन् । मञ्चले सो घटनाबारे प्रहरीलाई खबरसमेत गर्‍यो । प्रहरीले धोबीको घरमा गएर त्यतिबेला मिलापत्र गराइदिएको थियो ।

नन्कुन्नी धोबी रामकुमारकी तेस्री श्रीमती हुन् । उनीबाट सन्तान जन्मिएको थिएन । रामकुमारमाथि पहिलो श्रीमतीलाई मट्टीतेल हालेर जलाएको आरोप छ । दोस्रो श्रीमती पनि यातना सहन नसकेर भागेको नन्कुन्नीको माइती पक्षले आरोप लगाएको छ । बारम्बार घरेलु हिंसा गरेकाले रामकुमारले नन्कुन्नीको हत्या गरेको उनीहरूको दाबी छ ।

नन्कुन्नी र रामकुमारबीच धर्मपुत्र राख्ने र सम्पत्ति दिने विषयमा पनि विवाद थियो । नन्कुन्नीले आफ्नो भागको सम्पत्ति जेठी श्रीमतीतर्फकी छोरीलाई दिन चाहेकी थिइन् । रामकुमार भने दाइको छोरालाई धर्मपुत्र राखेर उसैलाई सम्पत्ति दिन दबाब दिइरहेका थिए । त्यसमाथि रामकुमारले बारम्बार मोटरसाइकल दाइजो मागेर दिदीलाई दुःख दिइरहेको भाइ माताप्रसाद बताउँछन् ।

नन्कुन्नीको शव झुण्डिएको ठाउँमा वरपर कुनै टेक्ने वस्तु थिएन । नन्कुन्नीले केमा चढेर झुण्डिइन् भन्ने केही चीज त्यहाँ देखिँदैन । घरका दुवै ढोकाभित्रबाट बन्द थिए । तर, भित्र जाने अर्को बाटो रहेकाले त्यो पनि शंकास्पद छ । प्रहरी आफैँ घरभित्र पसेर ढोकाको चुकुल खोलेको थियो । शवको नाक, कान मुखबाट रगत बगेको स्थानीय प्रत्यक्षदर्शीले बताएकाले त्यो आत्महत्या नभई हत्या नै भएको माइती पक्षको दाबी छ ।

प्रकाशित मिति: बुधबार, असोज २०, २०७८ १८:५७