‘सरकार खोज्दै आयौँ, न्याय चाहियो’

A+ A A-

पानी ठेलाले पटपट फुटेका पैताला !

शरीरभरि धुलो र खाली पेट ।

गुर्जुधारा आइपुगेको एक समूहलाई बाटोमा अलपत्र अवस्थामा भेट्न सकिन्थ्यो । हामी पुग्दा कोही खुट्टाभरि उठेका फोका सुुमसुम्याउँदै गरेका भेटिन्थे त कोही खाना पाइन्छ कि भन्ने आशामा बसिरहेका भेटिए ।

'न्यायको भोकले नै आफूहरूलाई यो कठिनाइ पार गर्न सहयोग पुर्‍यायो,' खुट्टामा उठेको ठेला देखाउँदै रुबी खान बोलिन्, '२० दिन हिँडेर आइपुग्यौँ, भोक प्यास, पीडा सबै झेल्दै । तर, कसैले अहिलेसम्म हाम्राबारेमा सोधेका समेत छैनन् ।’

५ सय किलोमिटर यात्राको अगुवाइ गर्दै आएकी रुबी महिला हिंसा रोक्न पीडितसँगै काठमाडौँ आइपुगेकी हुन् । उनीसँग कोही दिदीको मृत्युको शोकमा न्यायको आशासहित आएका भेटिन्थे त कोही छिमेकीको न्यायका लागि । ती सबैको एउटै लक्ष्य थियो– न्याय पाउने ।

रुबी भन्छिन्, ‘सरकार खोज्दै आयौँ, न्याय चाहियो ।’ उनीसहित १६ जनाको समूह २० दिनदेखि न्याय खोज्न सडकमा यसरी नै भौँतारिइरहेका छन् । न्याय दिलाउने आश्वासनसहित २० दिन निरन्तर पैदल यात्रा गरेको यो समूह बल्ल आज काठमाडौँ आइपुगेको हो । ५ सय किलोमिटर पैदल हिँडेर आइपुगेका उनीहरू अब काठमाडौँमा धर्ना दिने योजनासहित आइपुगेका छन् ।

यसरी सुरु भयो यात्रा

बाँके नेवाजी गाउँकी नन्कुन्नी धोबी गत ५ साउनमा मृत भेटिइन् । झुण्डिएको अवस्थामा उनको शव घरमै भेटियो । उनी लामो समयदेखि घरेलु हिंसा व्यहोर्दै आएको र घटनाको प्रकृति हेर्दा शंकास्पद रहेको भन्दै पीडितले प्रहरीलाई गुहारे । तर, प्रहरीले अनुसन्धान नै नगरी आत्महत्या भनिदियो ।

त्यस्तै, एकल महिला निर्मला कुर्मी गतवर्ष मंसिरमा बेपत्ता भइन् । १६ मंसिरमा स्थानीयले प्रहरीमा किटानी जाहेरी दिए । तर, प्रहरीले अनुसन्धान गरेन । अहिले उनको मृत्यु भइसकेको बताइएपछि यी दुई शंकास्पद मृत्युको गहिरो अनुसन्धानको माग गर्दै पीडित र अधिकारकर्मीले प्रदर्शन गरिरहेका छन् ।

‘एकल महिला एकाएक बेपत्ता भइन् । खोजी गरिदिनुपर्‍यो भनेर अपहरण तथा शरीर बन्धकको किटानी जाहेरी दिँदासमेत प्रहरीले चासो देखाएन । दिनहुँ हिंसा भोगिरहेकी महिला मृत भेटिइन्, प्रहरी अनुसन्धान नै नगरी आत्महत्या भन्छ,’ अधिकारकर्मी रुबी खानले भनिन् ‘यो देशमा सरकार छ कि छैन भनेर खोज्न हामी पैदल मार्चमा छौँ ।’

पैदलयात्रामा पीडित परिवारका सदस्यसहित १४ महिला छन् । मृतक नन्कुन्नीकी दिदी बिष्टा धोबी, बहिनी शिला र भाइ माताप्रसाद धोबी पनि मार्चमा छन् । २० दिन निरन्तर हिँडेर न्याय माग्न काठमाडौँ आइपुगेका मृतक नन्कुनीकीका भाइ माता भन्छन्, ‘मान्छेको ज्यान जाँदा पनि जिल्लाको प्रहरी र प्रशासनले सुनेन । त्यसैले हामी प्रधानमन्त्री, गृहमन्त्री र राष्ट्रपतिलाई भेट्न यहाँसम्म आइपुग्यौँ ।’

प्रकाशित मिति: बुधबार, असोज २०, २०७८ १८:५९