हिमेशको भविष्यवाणी- भरतमणि र विक्कीमध्ये एक बन्‍नेछन् कमेडी च्याम्पियन

A+ A A-

'कमेडी च्याम्पिन सिजन २' ले आज नयाँ च्याम्पियनको घोषणा गर्दैछ । भोटका आधारमा भरतमणि पौडेल, विक्की अग्रवाल र सन्तोष थापामध्ये एकले च्याम्पियनको उपाधि चुम्नेछन् । भोटिङको समय राति साढे १० बजेसम्म रहेको छ ।

च्याम्पियन घोषणा हुने समय नजिकिँदा विजेता को बन्ला भन्नेबारे अड्कलबाजी चलिरहेको छ । कसैले भरतमणिलाई मुख्य दावेदार मानेका छन्, कसैले विक्की त कसैले सन्तोष ।

यस्तैमा, कमेडी च्याम्पियन पहिलो सिजनका विजेता हिमेश पन्तले आफ्नो अनुमान सार्वजनिक गरेका छन् । उनले भरतमणि वा विक्कीमध्ये एकले उपाधि जित्ने पूर्वानुमान गरेका हुन् । शिलापत्रसँग कुरा गर्दै उनले भने, 'फाइनलमा जो-जो आइपुग्नु भएको छ एकदमै राम्रो प्रतियोगीहरु हुनुहुन्छ । तर, विजेता बन्ने त भोटले हो । त्यसैले भरत र विक्कीमध्ये एकले जित्‍छन् जस्तो लाग्छ ।'

हुन त, कमेडी च्याम्पियनमा भरत र विक्कीबीच 'नेक टु नेक' को अवस्था छ । सुरुआती दिनदेखि नै यी दुईबीच कडा प्रतिस्पर्धा छ ।

हिमेश भन्छन्, 'पैसाले भोट गर्ने हो । कायापलट नहोला भन्न सकिन्न । यदि त्यस्तो भयो भने सन्तोषले पनि बाजी मार्न सक्छन् ।'

हिमेशलाई भरतमणिले स्टेजमा पुगेपछि देखाउने जोश तथा उनले दिने प्रस्तुति मन पर्छ । अझ, भरतले गरेको आफ्नै क्यारिकेचर हेरेर हिमेश मुर्छा परेर हाँसेका थिए ।

उनी भन्छन्, 'भरतमणि अब्बल प्रतियोगी हुन् । उसको विषयवस्तु र प्रस्तुति दुबै गज्जब लाग्छ ।'

यता विक्कीको फरकपनले पनि हिमेशको मन जितेको छ । 'विक्कीले सुरुआती दिनदेखि नै कमेडीमा केही फरकपन देखाइरहेका छन् । उनले फरकपनसँग राम्रो पनि गरिरहेका छन्,' हिमेश भन्छन्, 'यसअर्थ, मलाई विक्की पनि मन पर्छ ।'

हिमेश सन्तोषको त फ्यान नै हुन् । सन्तोषका पन्चलाइनहरु हिमेशलाई रोचक लाग्छ । उनी भन्छन्, 'सन्तोष पनि अब्बल दर्जाको कमेडियन हुन् । उनको प्रस्तुतिहरू निकै राम्रा छन् । टप ३ मा उसले दिएको प्रस्तुतिले पनि त्यसको प्रमाण दिइसकेको छ ।'

च्याम्पियनको उपाधि जसले जिते पनि खुसी हुनेछन्, हिमेश ।

सम्बन्धित समाचार :

काे बन्ला कमेडी च्याम्पियन ? यस्‍तो छ भोटिङको पूर्वानुमान

प्रकाशित मिति: शनिबार, असोज २, २०७८ १७:३८