काे बन्ला कमेडी च्याम्पियन ? यस्‍तो छ भोटिङको पूर्वानुमान

A+ A A-

आज 'कमेडी च्याम्पियन'ले नयाँ च्याम्पियनको घोषणा गर्दैछ । दोस्रो सिजनको उपाधिको प्रतिष्पर्धामा ताप्लेजुङका भरतमणि पौडेल, गोरखाका सन्तोष थापा र सिक्किमका विक्की अग्रवाल छन् । यी तीन जनाबाट भोटिङका आधारमा कमेडी च्‍याम्पियनको विजेता घोषणा गरिनेछ ।

नजिताको समय नजिकिँदै गर्दा कसले जित्ने हो भन्ने धेरैको चासोको विषय बनिरहेको छ । तीन जना नै राम्रो प्रस्तुति दिइरहेका प्रतियोगी भएकै कारण पनि याे नै विजेता बन्छ भन्न सक्ने अवस्था छैन । तर, प्रतियोगीहरुले क-कसको भोट पाइरहेका छन् भन्ने विषयमा भने पूर्वानुमान लगाउन सकिन्छ ।

प्रतियोगिताको सुरुवाति भागहरूबाट नै भरतमणि विजेताको दाबेदारका रुपमा कहलिए । उनले गरेको 'घरबेटी बा'को प्रस्‍तुतिलाई धेरैले रुचाएका थिए । त्यसमा पनि उनले बोलेको एक संवाद सर्वाधिक चर्चामा रह्यो ।

भरतमणिले पूर्वमन्त्री गोकुल बास्कोटाको लवजमा भनेका थिए- 'हेप्नी, मान्छेलाई डिस हान्नी, औडा अर्नी....' । उक्त प्रस्तुतिबाट नै चम्किएका भरतले ब्याक टु ब्याक राम्रो प्रस्तुति दिए ।

रियालिटी शोमा एउटै प्रतियोगी सात पटकसम्म पर्फर्मर अफ द राउण्ड बनेको इतिहास बिरलै भेटिएला । कमेडी च्याम्पियनको दोस्रो सिजनमा भरतले त्यो रेकर्ड राख्दिए ।

भरतले टप २४ बाट नै पर्फर्मर अफ द राउण्ड जित्न सुरु गरे । जसको सिलसिला टप ४ सम्म आइपुग्यो । भरतले नै पहिलो र अन्तिम पर्फर्मर अफ द राउण्ड जिते ।

भरतमणि कहिले पत्रकार बने, कहिले एलियन बनेर दर्शकलाई हँसाए । उनले कलाकार बन्न गरेको संघर्ष सुनाउँदा पनि दर्शकमा हाँसोको फोहोरा चलेको थियो । झाक्री परिवारको डाक्टर बन्दा पनि उनी पर्फमर अफ द राउण्ड बनेका थिए ।

यो पनि ...
कमेडी च्याम्पियनका 'मणि', जसले हँसाएरै लोभ्याउँदै छन् दर्शकदेखि नेतासम्म

भरतले टप ४ मा दिएको प्रस्तुतिले त झनै उनलाई चर्चाको शिखरमा नै पुर्‍यायाे । उनले गरेको ‘पारस सरकार’वाला प्रस्तुति यति हिट भयो कि, कमेडी च्याम्पियनले नै गज्जब हाईप नै बढायो ।

कमेडी च्याम्पियन दोस्रो सिजनका सर्वाधिक चर्चित प्रतियोगी हुन्, भरत । यसअर्थ, कमेडी च्याम्पियन हेर्ने दर्शकबाट भरतले राम्रो भोट पाउन सक्ने अनुमान लगाउन सकिन्छ ।

त्योमात्र होइन, भरतको लागि ताप्लेजुङ तथा झापाबाट राम्रो समर्थन मिलिरहेको छ । केही दिन अगाडि भोट माग्न पूर्व पुगेका भरतको रवाफ विजेताको जत्तिकै थियो । पूर्वेली ठिटोलाई पूर्वबाट राम्रो साथ छ ।

भरतको लागि राष्ट्रिय स्तरका नेताहरु नै मैदानमा छन् । पूर्वमन्त्री योगेश भट्टराई, पूर्वमन्त्री गगन थापा भरतका लागि भोट मागिरहेका छन् । उनीहरूले भरतको लागि व्यक्तिगत सहयोग पनि गरेका छन् ।

योसँगै स्कुल तथा कलेजहरुमा पनि भरतको पक्कड राम्रै देखिन्छ ।

उपाधिका लागि प्रतिष्पर्धा गरिरहेका सन्तोष पनि बलिया प्रतियोगी हुन् । उत्कृष्ट ३ मा उनले दिएको प्रस्तुतिले सन्तोषलाई गतिलो हाइप दिएको छ ।

प्रतियोगिताको अन्त्यतिर सन्तोषले ‘इमोशनल’ प्रस्तुति दिए । फाइनलसम्म आइपुग्दा पनि आफूलाई नचिन्दाको पीडा उनले हाँस्यरस मिसाएर प्रस्तुत गरे । स्टेजमा सन्तोषको मायालाग्दो अनुहार देखिन्थ्यो । तर, उनले बोलेका संवादहरूले दर्शकमाझ हाँसो गुञ्जायमान गराइरहेको थियो ।

उत्कृष्ट ३ मा दिएको प्रस्तुतिपछि धेरै दर्शकले भनेका छन्, ‘मुख्य दाबेदार हुन्, सन्तोष ।’

यो पनि ...
डिप्रेसनलाई जितेर कमेडीमा लागेका सन्तोष: जो च्याम्पियनको उपाधि जित्न भिड्दै छन्

नेपालमा रियालिटी शोहरूमा इमोशन बिक्छ । मतलब कसैले मार्मिक प्रस्तुति दियो वा उसले पीडा सुनायो भने त्यसले धेरै भोट पाउने सम्भावना रहन्छ । सन्तोषले पनि अहिले इमोशनल भोट पाइरहेका छन् भन्ने अनुमान च्याम्पियनको पछिल्ला भागहरूमा आएको प्रतिकृयाबाट अनुमान गर्न सकिन्छ ।

सन्तोषको लागि पनि पूरा गोरखाले सहयोग गरिरहेको छ । त्यहाँका मेयरदेखि स्थानीयसम्म उनलाई जिताउन लागि परेका छन् । अझ, पूर्वप्रधानमन्त्री बाबुराम भट्टराईले पनि सन्तोषलाई सहयोग गरिरहेका छन् ।

सन्तोषले च्याम्पियनमा आफूलाई भिन्न-भिन्न भूमिकामा प्रस्तुत गरेका छन् । उनी कहिले पुलिस बन्थे, कहिले डन । मेन पावरको मान्छेदेखि पानीको जार ओसार्नेसम्मको भूमिकामा उनी देखिए । अझ, उनले गरेको 'नेपाली टिचेर' निकै उत्कृष्ट प्रस्तुति मानिन्छ ।

सर्वाधिक भोट ल्याएर फाइनल छिरेका सिक्किमेली विक्की अग्रवाल यो उपाधिका बलिया दाबेदार हुन् । ‘गोल्डेन कि’ जित्दै च्याम्पियनको यात्रा सुरु गरेका विक्कीले धेरैपटक पटक पर्फर्मर अफ द राउण्डको उपाधि जितेका छन् ।

विक्की कहिले फिल्म निर्देशक बने, कहिले सुपरम्यान बने, कहिले कमेडीको टिचर बने । सबै प्रस्तुतिहरू उत्कृष्ट थिए । अझ, प्रप्सको प्रयोग गरेर दिइएको यमराज र गाडीको सहचालकवाला प्रस्तुति निकै रुचाइएको थियो । टप ४ मा गरेको पोन्टोमाइम र टप ३ मा गरेको प्रस्तुतिले विक्कीलाई थप चर्चा दिएको छ ।

यो पनि ...
हँसाउने मञ्चबाट धेरैलाई रुवाएका विक्की: जो च्याम्पियन बन्न नेपाल छिरे

फाइनल छिर्दा सर्वाधिक भोट ल्याएका विक्कीको समर्थनमा सिंगो सिक्किम/दार्जलिङ लागेको छ । उनलाई जिताउन त्यहाँ विभिन्न क्याम्पेनिङ भए । जसबाट विक्कीले राम्रो भोट पाएका छन् ।

त्यतिमात्र होइन, सिक्किमका मुख्यमन्त्री प्रेमसिंह तामाङले विक्कीलाई जिताउनका लागि व्यक्तिगत रूपमा नै ५ लाख सहयोग गरिसकेका छन् ।

उत्कृष्ट ४ मा विक्कीले दिएको 'पेन्टोमाइम' प्रस्तुतिले कमेडी जगतमा बहसको विषय बन्यो । उक्त प्रस्तुति निर्णायक सन्तोष पन्तले नबुझेको भनेपछि विक्की केही भावुक भएका थिए । अन्ततः उनले पनि ‘सिम्प्याथी भोट’ पाए । जसको कारण उनी सर्वाधिक भोट पाउने प्रतियोगी बने ।

अहिले पनि विक्कीलाई नेपालबाट राम्रो साथ छ ।

सरसरर्ती हेर्दा, काे विजेता बन्ला भन्न सक्ने अवस्था छैन । विजेता पत्तो पाउन बेलुकी साढे १० बजेसम्म कुर्नुपर्ने हुन्छ । विजेताले कार र २५ लाख नगद पुरस्कार पाउनेछन् भने दोस्रो र तेस्रो हुनेले क्रमशः बाइक र स्कुटर पुरस्कार पाउनेछन् ।

प्रकाशित मिति: शनिबार, असोज २, २०७८ ०६:१६